પાકિસ્તાની એક્ટ્રેસ ફિઝા અલીની દર્દનાક કહાની : ગૃહ પ્રવેશ પર સાસરિયાએ ફેંક્યા સ્મશાનના ફૂલો

બીજા લગ્ન બાદ સાસરી પક્ષના અત્યાચાર પર અભિનેત્રીનો ચોંકાવનારો ખુલાસો: દિકરીને પણ ઘરમાં ન સ્વીકારી

પાકિસ્તાની મનોરંજન જગતની જાણીતી અભિનેત્રી અને મોડલ ફિઝા અલી (Fiza Ali) એ તાજેતરમાં પોતાના અંગત જીવનને લઈને એક અત્યંત ચોંકાવનારો અને દર્દનાક ખુલાસો કર્યો છે. એક ઈન્ટરવ્યુ દરમિયાન ફિઝાએ જણાવ્યું કે તેના બીજા લગ્ન બાદ સાસરી પક્ષ તરફથી તેની સાથે ખૂબ જ અમાનવીય વ્યવહાર કરવામાં આવ્યો હતો. ક્રૂરતાની હદ તો ત્યારે પાર થઈ ગઈ જ્યારે તેના ગૃહ પ્રવેશ (Griha Pravesh) દરમિયાન સાસરિયાઓએ તેના સ્વાગત માટે સ્મશાન અથવા કબ્રસ્તાનમાંથી લાવેલા ફૂલો તેના પર ફેંક્યા હતા.

ગૃહ પ્રવેશના દિવસે જ સળગાવી દીધા કપડાં

ફિઝા અલીએ પોતાના ભૂતકાળના નરક જેવા દિવસોને યાદ કરતા જણાવ્યું કે, "જ્યારે લગ્ન પછી હું પહેલીવાર મારા સાસરે ગઈ, ત્યારે મારો ગૃહ પ્રવેશ ખુશીઓથી નહીં પણ નફરતથી થયો હતો. મારી સાસુ અને નણંદોએ મારા પર કબ્રસ્તાનમાંથી લાવેલા ફૂલો નાખ્યા, જે નકારાત્મકતા અને અપશુકનનું પ્રતીક માનવામાં આવે છે."

આટલું જ નહીં, ફિઝાએ દાવો કર્યો કે તે જ દિવસે સાસરિયાઓએ તેના લગ્નના કિંમતી કપડાં અને અન્ય સામાનને આગ લગાડીને સળગાવી દીધો હતો. આ પ્રકારના વર્તનથી તે અંદરથી સાવ તૂટી ગઈ હતી.

માસૂમ દિકરીને ઘરમાં રાખવા નહોતા તૈયાર

ફિઝા અલીના આ બીજા લગ્ન હતા અને તેને પહેલા લગ્નથી એક નાની દિકરી છે, જેનું નામ ફરાલ (Faraal) છે. ફિઝાએ રડતા રડતા જણાવ્યું કે સાસરી પક્ષના લોકો તેની માસૂમ દિકરીને પણ સ્વીકારવા તૈયાર નહોતા.

તેમણે શરત મૂકી હતી કે ફિઝાએ તેની દિકરીને પોતાનાથી દૂર રાખવી પડશે અને તે આ ઘરમાં નહીં રહી શકે. પોતાની દીકરી પર આવી આફત જોઈને ફિઝા માટે તે સાસરામાં એક ક્ષણ પણ રહેવું અશક્ય બની ગયું હતું.

'સેલિબ્રિટી' હોવા છતાં સહન કરવો પડ્યો અત્યાચાર

પોતાની આપવીતી શેર કરતા ફિઝાએ કહ્યું કે લોકો સ્ક્રીન પર કલાકારોની ચમકતી જિંદગી જુએ છે, પરંતુ પાછળનું દર્દ કોઈ જાણી શકતું નથી. એક લોકપ્રિય અભિનેત્રી હોવા છતાં તેને માત્ર એટલા માટે નિશાન બનાવવામાં આવી કારણ કે તે છૂટાછેડા લીધેલી (Divorced) મહિલા હતી અને બીજા લગ્ન કરી રહી હતી. આ અત્યાચારો હદથી વધી જતાં આખરે આ લગ્નજીવનનો પણ અંત આવ્યો હતો. હાલમાં ફિઝા અલી સિંગલ મધર તરીકે પોતાની દીકરીનો એકલા હાથે ઉછેર કરી રહી છે અને ગ્લેમર ઇન્ડસ્ટ્રીમાં સક્રિય છે.