થલપતિ વિજય મુખ્યમંત્રી બન્યા બાદ બંને દિગ્ગજોની પ્રથમ મુલાકાત: ફિલ્મ ઇન્ડસ્ટ્રી અને જનહિત મુદ્દે 6 મોટી માંગો રજૂ કરી
તમિલ સિનેમા અને રાજકારણના બે સૌથી મોટા ચહેરા, કમલ હાસન અને તમિલનાડુના નવા ચૂંટાયેલા મુખ્યમંત્રી સી. જોસેફ વિજય (થલપતિ વિજય), તાજેતરમાં એક ખાસ બેઠક માટે ચેન્નાઈમાં આમને-સામને આવ્યા હતા. વિજયે તમિલનાડુના મુખ્યમંત્રી તરીકે શપથ લીધા બાદ બંને દિગ્ગજો વચ્ચેની આ પ્રથમ સત્તાવાર મુલાકાત છે. મક્કલ નીધી મૈયમ (MNM) ના સ્થાપક અને રાજ્યસભા સાંસદ કમલ હાસને મુખ્યમંત્રીને રૂબરૂ મળીને અભિનંદન પાઠવ્યા હતા અને તમિલ ફિલ્મ ઉદ્યોગ તેમજ સામાજિક સુધારાને લગતી 6 મહત્વની માંગણીઓ પત્ર દ્વારા સોંપી હતી.
કમલ હાસને સોશિયલ મીડિયા પર શેર કરી તસવીરો
આ મુલાકાત બાદ કમલ હાસને સોશિયલ મીડિયા પ્લેટફોર્મ X પર મુલાકાતની સુંદર તસવીરો શેર કરી હતી, જે ઇન્ટરનેટ પર ભારે વાયરલ થઈ રહી છે. કમલ હાસને મુખ્યમંત્રી વિજયના નમ્ર વલણ અને તમિલનાડુના વિકાસ માટેના તેમના વિઝનની પ્રશંસા કરી હતી. તેમણે કેપ્શનમાં લખ્યું, "આજે મેં તમિલનાડુના માનનીય મુખ્યમંત્રી અને મારા નાના ભાઈ વિજય સાથે મુલાકાત કરી અને તેમને શુભેચ્છાઓ પાઠવી. તમિલનાડુના ભલા માટેના તેમના સપના તેમણે ઉત્સાહપૂર્વક શેર કર્યા."
કમલ હાસનની 6 મુખ્ય માંગણીઓ શું છે?
અભિનેતા-રાજકારણી કમલ હાસને નવી સરકાર સમક્ષ જે મુખ્ય પ્રસ્તાવો અને માંગણીઓ મૂકી છે, તેમાં સિનેમા જગત ઉપરાંત સામાજિક કલ્યાણના મુદ્દાઓ સામેલ છે:
સિનેમા ટિકિટ પરથી લોકલ ટેક્સ હટાવવો: થિયેટરોના ફાયદા માટે સ્થાનિક મનોરંજન ટેક્સ નાબૂદ કરવો.
પાઇરસી વિરોધી કડક ટીમ: ફિલ્મોની ચોરી (Piracy) રોકવા માટે એક મજબૂત એન્ટી-પાઇરસી સેલની રચના કરવી.
દિવસના 5 શોની મંજૂરી: થિયેટરોની કમાણી વધારવા માટે દિવસ દરમિયાન 5 શો ચલાવવાની મંજૂરી આપવી.
OTT વિન્ડો નિયમ: થિયેટરોના હિતોના રક્ષણ માટે ફિલ્મો રિલીઝ થયા બાદ ઓછામાં ઓછા 8 અઠવાડિયા સુધી તેને OTT પર ન મૂકવાનો નિયમ બનાવવો.
મેન્યુઅલ સ્કેવેન્જિંગ નાબૂદ કરવું: આધુનિક રોબોટિક્સ અને ટેકનોલોજીનો ઉપયોગ કરીને હાથથી ગટર સાફ કરવાની પ્રથાને રાજ્યમાંથી સંપૂર્ણપણે નાબૂદ કરવી.
ગામડાઓમાં ડિજિટલ લાઈબ્રેરી: તમિલનાડુની તમામ 12,525 ગ્રામ પંચાયતોમાં કમ્પ્યુટર સુવિધાથી સજ્જ આધુનિક લાઈબ્રેરીઓ અને કૌશલ્ય વિકાસ કેન્દ્રો શરૂ કરવા.
વિજયના કડક નિર્ણયોની થઈ રહી છે પ્રશંસા
મુખ્યમંત્રી પદ સંભાળ્યા બાદ તમિલનાડુ વેળ્લી કઝગમ (TVK) ના પ્રમુખ વિજયે ધાર્મિક સ્થળો, શાળાઓ અને બસ સ્ટેન્ડ નજીક આવેલી 717 દારૂની દુકાનો બંધ કરવાનો મોટો આદેશ આપ્યો હતો. કમલ હાસને વિજયના આ નિર્ણયને આવકારીને જણાવ્યું હતું કે, "દારૂનું વેચાણ એ સરકારનું કામ હોવું જોઈએ નહીં, પરંતુ તેના પર નિયંત્રણ રાખવું એ સરકારની જવાબદારી છે. વિજયે એક જવાબદાર નેતા તરીકે આની શરૂઆત કરી દીધી છે."
