હવે ભારત પરથી નહીં ઉડી શકે એક પણ પાકિસ્તાની પ્લેન : પહેલગામ હુમલા બાદ મોદી સરકાર એક્શનમાં, એરસ્પેસમાં નાપાક પાકિસ્તાનને No Entry!

પહેલગામ આતંકવાદી હુમલા બાદ પાકિસ્તાન વિરુદ્ધ એક પછી એક કાર્યવાહી કરવામાં આવી રહી છે. તાજેતરમાં ભારતે પાકિસ્તાનથી આવતી તમામ પ્રકારની ફ્લાઇટ્સ માટે તેના હવાઈ ક્ષેત્રમાં પ્રવેશ પર પ્રતિબંધ મૂક્યો છે. 30 એપ્રિલથી ૨૩ મે સુધી પાકિસ્તાનથી આવતી તમામ પ્રકારની ફ્લાઇટ્સ પર પ્રતિબંધ મૂકવામાં આવ્યો છે. આ સંદર્ભમાં, ભારતે NOTAM નોટિસ ટૂ એરમેન જારી કરી છે.

ઉલ્લેખનીય છે કે 22 એપ્રિલે પહેલગામમાં થયેલા આતંકવાદી હુમલા બાદ સંભવિત બદલાની ચિંતાને કારણે પાકિસ્તાની એરલાઇન્સે પહેલાથી જ ભારતીય હવાઈ ક્ષેત્ર ટાળવાનું શરૂ કરી દીધું છે. આ હુમલામાં આતંકવાદીઓએ નાગરિકો પર ગોળીબાર કર્યો હતો, જેમાં 26 લોકો માર્યા ગયા હતા.

એરસ્પેસ પર પ્રતિબંધથી પાકિસ્તાન પર શું અસર પડશે?
અધિકારીઓએ જણાવ્યું હતું કે ભારતે હવે સત્તાવાર રીતે તેના હવાઈ ક્ષેત્રને અવરોધિત કરી દીધું છે, જેના કારણે પાકિસ્તાની એરલાઇન્સને કુઆલાલંપુર જેવા દક્ષિણ-પૂર્વ એશિયાઈ દેશો સુધી પહોંચવા માટે ચીન અથવા શ્રીલંકા જેવા દેશો થઈને લાંબો માર્ગ અપનાવવાની ફરજ પડી છે. અગાઉ, જમ્મુ અને કાશ્મીરમાં થયેલા આતંકવાદી હુમલા બાદ, પાકિસ્તાને ભારતીય ફ્લાઇટ્સ માટે પોતાનું હવાઈ ક્ષેત્ર બંધ કરી દીધું હતું.

ભારતે સિંધુ જળ સંધિને સ્થગિત કરવા જેવા પગલાં લીધાં છે:
ભારતનો પાકિસ્તાની વિમાનો માટે પોતાનું હવાઈ ક્ષેત્ર બંધ કરવાનો નિર્ણય પહેલગામ આતંકવાદી હુમલાના જવાબમાં બદલો લેવાની કાર્યવાહીનો એક ભાગ છે. આ પહેલા ભારતે સિંધુ જળ સંધિને સસ્પેન્ડ કરી દીધી હતી. ઉપરાંત, પાકિસ્તાનીઓના વિઝા પણ રદ કરવામાં આવ્યા હતા. પછી ભલે તે ટુરિસ્ટ વિઝા હોય કે મેડિકલ વિઝા. પાકિસ્તાનીઓને 29 એપ્રિલ સુધી તેમના દેશ પાછા ફરવાની તક હતી. હવે, પાકિસ્તાનની અંદર જો કોઈ મળી આવશે તો તેને ત્રણ વર્ષ સુધીની જેલ અને 3 લાખ રૂપિયા સુધીના દંડની સજા થશે.