ભારતીય વાયુસેના દ્વારા હાથ ધરવામાં આવેલા ઓપરેશન સિંદૂરના પરિણામે પાકિસ્તાનના સૈન્ય માળખાને જે નુકસાન થયું છે તેના પુરાવા હવે સેટેલાઈટ તસવીરો દ્વારા વિશ્વ સમક્ષ આવી રહ્યા છે. પાકિસ્તાનના પંજાબ પ્રાંતમાં સ્થિત વ્યૂહાત્મક રીતે અત્યંત મહત્વના એવા મુરીદ એરબેઝ પર ભારતીય એરફોર્સે કરેલા પ્રહાર બાદ અત્યારે ત્યાં સમારકામની કામગીરી ખૂબ જ ગુપ્ત રીતે ચાલી રહી છે. 16 December 2025 ના રોજ લેવામાં આવેલી નવીનતમ સેટેલાઈટ ઈમેજમાં જોવા મળ્યું છે કે એરબેઝની કમાન્ડ એન્ડ કંટ્રોલ બિલ્ડિંગને લાલ અને લીલા રંગની મોટી તાડપત્રીઓથી સંપૂર્ણ રીતે ઢાંકી દેવામાં આવી છે.
સેટેલાઈટ તસવીરોમાં મોટો ખુલાસો
NDTVના અહેવાલ અનુસાર Vantor દ્વારા પ્રસિદ્ધ કરવામાં આવેલી લેટેસ્ટ તસવીરોમાં મુરીદ એરબેઝની હાલત દયનીય જોવા મળી રહી છે. સેટેલાઈટ ઈમેજિંગ નિષ્ણાત ડેમિયન સાયમનના મતે પાકિસ્તાન આ એરબેઝના ધ્વસ્ત થયેલા ભાગોને છુપાવવા માટે મોટા પાયે તાડપત્રીનો ઉપયોગ કરી રહ્યું છે. આ પદ્ધતિનો ઉપયોગ સામાન્ય રીતે ત્યારે કરવામાં આવે છે જ્યારે કોઈ સૈન્ય સંસ્થા તેની અંદર ચાલી રહેલી પ્રવૃત્તિઓ અથવા થયેલા નુકસાનને વિદેશી સેટેલાઈટની નજરથી બચાવવા માંગતી હોય. બિલ્ડિંગની આસપાસ કરવામાં આવેલી કિલ્લેબંધી સૂચવે છે કે ઓપરેશન સિંદૂર દરમિયાન તેને અપેક્ષા કરતા વધુ આંતરિક નુકસાન પહોંચ્યું છે.
ડ્રોન ઓપરેશનનું મુખ્ય કેન્દ્ર હતું મુરીદ
ચકવાલ જિલ્લામાં આવેલું આ એરબેઝ પાકિસ્તાની વાયુસેના માટે ડ્રોન યુદ્ધનું મુખ્ય કેન્દ્ર હતું. અહીંથી જ ભારતીય સરહદ પર માનવરહિત ડ્રોન મોકલવાનું કાવતરું ઘડવામાં આવતું હતું. જોકે ભારતના એર ડિફેન્સ સિસ્ટમે પાકિસ્તાનના તમામ ડ્રોનને આકાશમાં જ તોડી પાડીને તેમના મનસૂબા પર પાણી ફેરવી દીધું હતું. ત્યારબાદ ભારતીય વાયુસેનાએ વળતો પ્રહાર કરીને આ એરબેઝના કંટ્રોલ સેન્ટરને નિશાન બનાવ્યું હતું. અગાઉની તસવીરોમાં બિલ્ડિંગની છત સંપૂર્ણપણે તૂટી ગયેલી દેખાતી હતી જે હવે ઢાંકી દેવામાં આવી છે.
અન્ય એરબેઝ પર પણ સમારકામની દોડધામ
ઓપરેશન સિંદૂરમાં મળેલી હાર બાદ પાકિસ્તાન હવે તેના અન્ય પ્રભાવિત એરબેઝને પણ ઠીક કરવામાં વ્યસ્ત છે. દક્ષિણ પંજાબમાં આવેલા રહીમ યાર ખાન એરબેઝ અને સરગોધામાં આવેલા મુશફ એરબેઝના રનવેને પણ ભારતીય સેનાએ ભારે નુકસાન પહોંચાડ્યું હતું. હાલના અહેવાલો મુજબ પાકિસ્તાને આ રનવેનું સમારકામ પૂર્ણ કર્યું છે પરંતુ મુરીદ એરબેઝની મુખ્ય ઈમારત હજુ પણ ખંડેર હાલતમાં હોવાથી તેને ઢાંકવાની ફરજ પડી છે.
