Conway-Latham Record: ન્યુઝીલેન્ડ અને વેસ્ટ ઇન્ડિઝ વચ્ચે રમાઈ રહેલી ત્રણ ટેસ્ટ મેચની સિરીઝની ત્રીજી અને અંતિમ ટેસ્ટના પ્રથમ દિવસે ન્યુઝીલેન્ડના ઓપનર્સ ડેવોન કોન્વે અને કેપ્ટન ટોમ લેથમે ધમાકેદાર પ્રદર્શન કરીને ઇતિહાસ રચી દીધો. બંનેએ મળીને પ્રથમ વિકેટ માટે 323 રનની ભાગીદારી કરી, જે ન્યુઝીલેન્ડના ટેસ્ટ ક્રિકેટ ઇતિહાસમાં ઓપનિંગ જોડીની બીજા ક્રમની સૌથી મોટી ભાગીદારી છે. આ રેકોર્ડ પહેલા ગ્લેન ટર્નર અને ટેરી જાર્વિસના નામે હતો, જેમણે 1972માં વેસ્ટ ઇન્ડિઝ સામે જ 387 રનની ભાગીદારી કરી હતી. આ મેચમાં ન્યુઝીલેન્ડના કેપ્ટન ટોમ લેથમે ટોસ જીતીને પહેલા બેટિંગ કરવાનો નિર્ણય લીધો. આ નિર્ણય સંપૂર્ણપણે સાચો પડ્યો કારણ કે કોન્વે અને લેથમે વેસ્ટ ઇન્ડિઝના બોલર્સને કોઈ તક આપી નહીં. પ્રથમ સેશનમાં જ ન્યુઝીલેન્ડે બિના વિકેટે 83 રન બનાવી દીધા. લંચ પછી પણ તેમની આક્રમકતા યથાવત્ રહી અને ટી પછી તેઓએ વધુ ઝડપથી રન ઉમેર્યા.
ICTના ઇતિહાસમાં સૌથી મોટી ઓપનિંગ ભાગીદારી
ડેવોન કોન્વેએ 147 બોલમાં પોતાની છઠ્ઠી ટેસ્ટ સદી ફટકારી, જ્યારે ટોમ લેથમે 183 બોલમાં પોતાની 15મી ટેસ્ટ સદી પૂરી કરી. લેથમે 246 બોલમાં 137 રન બનાવ્યા, જેમાં 15 ચોગ્ગા અને એક છક્કો સામેલ હતો. તેમને કેમર રોચે આઉટ કર્યો, જ્યારે રોસ્ટન ચેઝે સ્લિપમાં શાનદાર કેચ લીધો. પરંતુ તે પહેલા લેથમ 104 રન પર જીવદાન મેળવી ચૂક્યા હતા, જ્યારે વિકેટકીપર તેવિન ઇમ્લાચે એન્ડરસન ફિલિપની બોલ પર તેમનો કેચ છોડ્યો હતો. દિવસના અંતે ડેવોન કોન્વે 279 બોલમાં 178 રન બનાવીને અણનમ રહ્યા, જેમાં 25 ચોગ્ગા સામેલ છે. નાઇટવોચમેન જેકબ ડફી 9 રન બનાવીને તેમની સાથે ક્રીઝ પર હતા. ન્યુઝીલેન્ડે 90 ઓવરમાં 1 વિકેટે 334 રન બનાવીને પ્રથમ દિવસનો અંત કર્યો. આ ભાગીદારી માત્ર ન્યુઝીલેન્ડ માટે જ નહીં, પરંતુ ICC વર્લ્ડ ટેસ્ટ ચેમ્પિયનશિપના ઇતિહાસમાં પણ સૌથી મોટી ઓપનિંગ ભાગીદારી છે, જેમાં તેઓએ ભારતના રોહિત શર્મા અને મયંક અગ્રવાલના 317 રનના રેકોર્ડને તોડ્યો.
કોન્વે-લેથમની સફળ ઓપનિંગ જોડી
કોન્વે અને લેથમની આ જોડીએ હવે ટેસ્ટમાં એકસાથે 40થી વધુ ઇનિંગ્સમાં 2000થી વધુ રન બનાવી લીધા છે, જે ન્યુઝીલેન્ડના કોઈપણ ઓપનિંગ જોડી માટે ત્રીજા ક્રમની સૌથી વધુ રન છે. વેસ્ટ ઇન્ડિઝના બોલર્સ માટે આ દિવસ ખૂબ જ મુશ્કેલ રહ્યો, કારણ કે તેઓ પ્રથમ બે સેશનમાં એકપણ વિકેટ લઈ શક્યા નહીં.
સિરીઝની વાત કરીએ તો ન્યુઝીલેન્ડ 1-0થી આગળ છે. પ્રથમ ટેસ્ટ ડ્રો રહી હતી, જ્યારે બીજી ટેસ્ટમાં ન્યુઝીલેન્ડે 9 વિકેટથી જીત મેળવી હતી. હવે ત્રીજી ટેસ્ટમાં મજબૂત સ્થિતિમાં હોવાથી કિવી ટીમ સિરીઝ જીતવાની નજીક છે. બીજા દિવસે કોન્વે પોતાનું ડબલ સેન્ચુરી પૂરું કરી શકે છે, જે તેમની કારકિર્દીનું બીજું ડબલ હન્ડ્રેડ હશે. આ પ્રદર્શનથી ન્યુઝીલેન્ડના ચાહકો ખુશ છે અને વેસ્ટ ઇન્ડિઝને મેચમાં પાછા આવવા માટે મોટી મહેનત કરવી પડશે. ક્રિકેટ પ્રેમીઓ માટે આ મેચ હજુ ઘણી રોમાંચક થવાની છે.
