Nitin Gadkari E20 Case: દેશમાં E20 ઇથેનોલ મિશ્રિત પેટ્રોલને લઈને ચાલી રહેલી ચર્ચા વચ્ચે કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ હવે કાનૂની રસ્તો અપનાવ્યો છે. સોશિયલ મીડિયા પર તેમના અને તેમના પરિવારને E20 ઇથેનોલ બ્લેન્ડિંગ કાર્યક્રમમાંથી કથિત રીતે નફો થતો હોવાના દાવા સાથે વાયરલ થઈ રહેલી પોસ્ટ્સ, ડીપફેક તસવીરો અને વીડિયો સામે તેમણે બોમ્બે હાઈકોર્ટનો દરવાજો ખખડાવ્યો છે. ગડકરીએ આ સામગ્રીને ખોટી, ભ્રામક અને માનહાનિકારક ગણાવી કોર્ટ સમક્ષ કાર્યવાહી કરવાની માંગ કરી છે.
છેલ્લા કેટલાક સમયથી E20 પેટ્રોલને લઈને સોશિયલ મીડિયા પર અનેક પ્રકારના દાવાઓ વાયરલ થઈ રહ્યા છે. કેટલાક પોસ્ટ્સમાં ગડકરી અને તેમના પરિવારને ઇથેનોલ વ્યવસાય સાથે જોડીને આર્થિક લાભ મળતો હોવાના આક્ષેપો કરવામાં આવ્યા હતા. ગડકરીનું કહેવું છે કે, આ દાવાઓ સંપૂર્ણપણે નિરાધાર છે અને તેમની પ્રતિષ્ઠાને નુકસાન પહોંચાડવાના હેતુથી સોશિયલ મીડિયા પર ફેલાવવામાં આવ્યા છે.
બોમ્બે હાઈકોર્ટમાં માનહાનિનો દાવો
નીતિન ગડકરીએ બોમ્બે હાઈકોર્ટમાં દાખલ કરેલી અરજીમાં જણાવ્યું છે કે, સોશિયલ મીડિયા પર તેમના અને તેમના પરિવાર વિશે ખોટી માહિતી ફેલાવવામાં આવી રહી છે. અરજી અનુસાર, વિવિધ પોસ્ટ્સ, ડીપફેક તસવીરો અને વીડિયો દ્વારા એવો ભ્રમ ફેલાવવામાં આવ્યો છે કે તેઓ અથવા તેમના પરિવારજનોને ભારતના E20 ઇથેનોલ બ્લેન્ડિંગ કાર્યક્રમથી સીધો વ્યવસાયિક લાભ મળી રહ્યો છે. ગડકરીએ આ તમામ સામગ્રીને માનહાનિકારક ગણાવી છે અને જવાબદાર લોકો સામે કાયદાકીય કાર્યવાહી કરવાની માંગ કરી છે.
આ પણ વાંચો: પેપર લીક બાદ હવે E20 વિરુદ્ધ દેશવ્યાપી આંદોલનની તૈયારી! : 4 ઓગસ્ટે સંસદ કૂચ કરશે ટેક્સી યુનિયન
મેટા સહિત સોશિયલ મીડિયા પ્લેટફોર્મ સામે અરજી
આ કેસમાં ગડકરીએ Meta સહિતના સોશિયલ મીડિયા પ્લેટફોર્મ અને અજાણ્યા વ્યક્તિઓ અથવા જૂથોને પણ પક્ષકાર બનાવવાની માંગ કરી છે, જેમના પર આ પ્રકારની ખોટી માહિતી ફેલાવવાનો આરોપ છે. બોમ્બે હાઈકોર્ટે ગડકરીને આ મામલે સિવિલ કેસ દાખલ કરવાની મંજૂરી આપી છે. હવે કેસની આગામી સુનાવણી દરમિયાન કોર્ટ સંબંધિત પક્ષોની દલીલો સાંભળશે.
અરજીમાં શું કર્યો દાવો?
અરજીમાં ગડકરીએ સ્પષ્ટ કર્યું છે કે, ભારતની ઇથેનોલ બ્લેન્ડિંગ નીતિનું સંચાલન કેન્દ્રીય પેટ્રોલિયમ અને કુદરતી ગેસ મંત્રાલય કરે છે અને આ નીતિના અમલીકરણ સાથે તેમનો અથવા તેમના પરિવારનો કોઈ વ્યવસાયિક સંબંધ નથી. તેમણે દલીલ કરી છે કે, સોશિયલ મીડિયા પર ફેલાવવામાં આવેલા દાવાઓ તથ્યવિહિન છે અને લોકોમાં ભ્રમ ફેલાવવાનો પ્રયાસ કરે છે.
E20 પેટ્રોલને લઈને કેમ વધી રહી છે ચર્ચા?
તાજેતરમાં દેશના કેટલાક વિસ્તારોમાં E20 પેટ્રોલ અંગે સોશિયલ મીડિયા પર અનેક દાવાઓ સામે આવ્યા હતા. કેટલાક વાહનચાલકો દ્વારા દાવો કરવામાં આવ્યો હતો કે, E20 પેટ્રોલના ઉપયોગથી વાહનોની માઇલેજમાં ઘટાડો થયો છે અથવા એન્જિન સંબંધિત સમસ્યાઓ સર્જાઈ છે. જોકે, વાહન ઉત્પાદક કંપનીઓ અને સરકાર સમર્થિત પરીક્ષણ સંસ્થાઓએ જણાવ્યું છે કે E20 માટે પ્રમાણિત (E20-compatible) વાહનો ખાસ આ ઇંધણને ધ્યાનમાં રાખીને ડિઝાઇન અને પરીક્ષણ કરવામાં આવ્યા છે. તેમના જણાવ્યા મુજબ, કેટલાક અલગ-અલગ કિસ્સાઓમાં સામે આવેલી સમસ્યાઓનું કારણ ઇંધણમાં ભેળસેળ, જાળવણીનો અભાવ અથવા અન્ય તકનિકી કારણો હોઈ શકે છે, માત્ર ઇથેનોલ મિશ્રણ નહીં.
આ પણ વાંચો: E20 જનતા પાર્ટી શું છે? : લાખો લોકો કેમ જોડાઈ રહ્યા છે આ ડિજિટલ અભિયાનમાં, જાણો સંપૂર્ણ માહિતી
કેન્દ્ર સરકાર કેમ આપી રહી છે E20ને પ્રોત્સાહન?
કેન્દ્ર સરકાર લાંબા સમયથી પેટ્રોલમાં ઇથેનોલનું પ્રમાણ વધારવાની નીતિને પ્રોત્સાહન આપી રહી છે. સરકારના જણાવ્યા મુજબ આ પહેલનો હેતુ ક્રૂડ ઓઇલની આયાત પરની નિર્ભરતા ઘટાડવાનો, કાર્બન ઉત્સર્જનમાં ઘટાડો કરવાનો અને શેરડી તથા અનાજ આધારિત ઇથેનોલના સ્થાનિક ઉત્પાદનને પ્રોત્સાહન આપવાનો છે. સરકારનું માનવું છે કે, ઇથેનોલ બ્લેન્ડિંગ કાર્યક્રમથી ખેડૂતોને પણ લાભ મળશે અને ઊર્જા સુરક્ષા મજબૂત બનશે.
તપાસ અને કોર્ટની કાર્યવાહી પર રહેશે નજર
E20 પેટ્રોલને લઈને ચાલી રહેલી જાહેર ચર્ચા વચ્ચે હવે નીતિન ગડકરી દ્વારા દાખલ કરાયેલા આ માનહાનિના કેસ પર સૌની નજર રહેશે. એક તરફ સોશિયલ મીડિયા પર ફેલાતી માહિતીની સત્યતા અંગે પ્રશ્નો ઊભા થયા છે, તો બીજી તરફ સરકાર અને ઓટોમોબાઇલ ઉદ્યોગ E20 ઇંધણ અંગે લોકોમાં વિશ્વાસ વધારવાનો પ્રયાસ કરી રહ્યા છે. આગામી દિવસોમાં બોમ્બે હાઈકોર્ટમાં થનારી સુનાવણી અને કેસની કાર્યવાહી બાદ આ મામલે વધુ સ્પષ્ટતા સામે આવવાની શક્યતા છે.
