Indian cricketer : ક્રિકેટ જગતમાંથી ભારતીય ચાહકો માટે ગર્વની લાગણી જગાવે એવા સમાચાર સામે આવ્યા છે. દિલ્હીમાં જન્મેલા ઓલરાઉન્ડર Nikhil Chaudharyને ઓસ્ટ્રેલિયાની T20 આંતરરાષ્ટ્રીય ટીમમાં સ્થાન મળ્યું છે. ઓસ્ટ્રેલિયાએ બાંગ્લાદેશ સામે રમાનારી આગામી ત્રણ મેચોની T20 સિરીઝ માટે નિખિલને ટીમમાં સામેલ કર્યા છે. તેઓ ટ્રેવિસ હેડની ગેરહાજરીમાં ટીમમાં જોડાયા છે, જેમને વ્યક્તિગત કારણોસર રજા આપવામાં આવી છે. 30 વર્ષીય નિખિલ ચૌધરી હાલમાં ઓસ્ટ્રેલિયાની સ્થાનિક ક્રિકેટ વ્યવસ્થામાં પોતાની ઓળખ બનાવી ચૂક્યા છે. હોબાર્ટ હરિકેન્સ માટે બિગ બૅશ લીગમાં તેમના પ્રદર્શન અને તાજેતરના ફોર્મને ધ્યાનમાં રાખીને પસંદગીકારોએ તેમને રાષ્ટ્રીય ટીમમાં સામેલ કરવાનો નિર્ણય લીધો છે.
62 વર્ષ પછી ઓસ્ટ્રેલિયા માટે રમી શકે ભારતીય મૂળનો ખેલાડી
જો નિખિલ ચૌધરીને બાંગ્લાદેશ સામેની T20 સિરીઝમાં પ્લેઇંગ ઇલેવનમાં સ્થાન મળશે, તો તેઓ 1964 પછી ઓસ્ટ્રેલિયા માટે રમનાર પ્રથમ ભારતીય મૂળના ક્રિકેટર બનશે. આ સિદ્ધિ તેમને ઓસ્ટ્રેલિયન ક્રિકેટના ઇતિહાસમાં વિશેષ સ્થાન અપાવી શકે છે. દિલ્હીમાં જન્મેલા નિખિલે પોતાની ક્રિકેટ કારકિર્દીની શરૂઆત ભારતમાં કરી હતી. તેમણે પંજાબ માટે મર્યાદિત ઓવરની ક્રિકેટ રમી હતી અને તે સમય દરમિયાન હરભજન સિંહ, શુભમન ગિલ અને અભિષેક શર્મા જેવા ખેલાડીઓ સાથે ડ્રેસિંગ રૂમ શેર કર્યો હતો. તેમણે મુંબઈ ઇન્ડિયન્સ માટે ટ્રાયલ પણ આપ્યો હતો, પરંતુ ત્યારબાદ તેમનો ક્રિકેટ પ્રવાસ અનપેક્ષિત રીતે ઓસ્ટ્રેલિયા તરફ વળી ગયો.
દિગ્ગજ ક્રિકેટરને ભારે પડ્યો જીતનો જશ્ન!: આ ખેલાડીને સપનામાં પણ ખ્યાલ નહીં હોય કે જીત બાદ તેની સાથે આવું થશે
કોરોના કાળે બદલી નાખ્યું જીવન
કોરોના મહામારી દરમિયાન આંતરરાષ્ટ્રીય મુસાફરી પર પ્રતિબંધ લાગતા નિખિલ પોતાના કાકા પાસે ક્વીન્સલેન્ડમાં રોકાયા હતા. તે સમય દરમિયાન તેમણે ઓસ્ટ્રેલિયામાં જ ક્રિકેટ કારકિર્દી આગળ વધારવાનો નિર્ણય લીધો. ત્યારબાદ તેમણે સ્થાનિક સ્તરે સતત મહેનત કરી અને બિગ બૅશ લીગમાં પોતાનું સ્થાન મજબૂત બનાવ્યું. હાલમાં તેઓ બેલ્જિયમમાં યોજાતી EUT20 સ્પર્ધામાં JB Bruges માટે રમી રહ્યા છે અને આ પહેલાં IPLમાં દિલ્હી કેપિટલ્સના સેટઅપનો પણ ભાગ રહી ચૂક્યા છે.
પસંદગીકાર ટોની ડોડેમાઇડે વ્યક્ત કર્યો વિશ્વાસ
ઓસ્ટ્રેલિયાના મુખ્ય પસંદગીકાર Tony Dodemaideએ જણાવ્યું કે નિખિલ લાંબા સમયથી રાષ્ટ્રીય હિતના ખેલાડીઓની યાદીમાં હતા. તેઓ અગાઉથી જ આ પ્રવાસ માટે સ્ટેન્ડબાય ખેલાડી તરીકે ટીમ સાથે જોડાયેલા હતા. પસંદગી સમિતિ તેમના બિગ બૅશ લીગના પ્રદર્શનથી ખાસ કરીને પ્રભાવિત થઈ હતી અને તેથી તેમને આ તક આપવામાં આવી છે. પસંદગીકારોના જણાવ્યા અનુસાર નિખિલને બાંગ્લાદેશના સ્પિન અનુકૂળ માહોલમાં રમવાનો મહત્વપૂર્ણ અનુભવ મળશે અને તેઓ પ્રથમ T20 મેચ માટે ડેબ્યૂના મજબૂત દાવેદારોમાં સામેલ છે.
વૈભવ સૂર્યવંશી કે સચિન તેંડુલકર?: કોણે બનાવ્યા ભારત A ના ડેબ્યૂમાં સૌથી વધુ રન? આંકડા જોઈ ચોંકી જશો!
બાંગ્લાદેશ સામે T20 સિરીઝનું આયોજન
ઓસ્ટ્રેલિયા અને બાંગ્લાદેશ વચ્ચેની ત્રણ મેચોની T20 સિરીઝ ચટ્ટોગ્રામમાં રમાશે. પ્રથમ મેચ 17 જૂને, બીજી મેચ 19 જૂને અને ત્રીજી તથા અંતિમ મેચ 21 જૂને યોજાશે. આ સિરીઝમાં નિખિલને તક મળે છે કે નહીં અને મળે તો તેઓ કેવી અસર છોડી શકે છે, તેના પર માત્ર ઓસ્ટ્રેલિયન ચાહકો જ નહીં પરંતુ ભારતીય ક્રિકેટપ્રેમીઓની પણ નજર રહેશે.
બાંગ્લાદેશ પ્રવાસ માટે ઓસ્ટ્રેલિયાની T20 ટીમ
Mitchell Marsh (કેપ્ટન), ઝેવિયર બાર્ટલેટ, નિખિલ ચૌધરી, કૂપર કોનોલી, ટિમ ડેવિડ, જોએલ ડેવિસ, નાથન એલિસ, કેમેરોન ગ્રીન, એરોન હાર્ડી, ટ્રેવિસ હેડ, જોશ ઇંગ્લિસ, સ્પેન્સર જોનસન, મેથ્યુ કુહનેમેન, રાઇલી મેરેડિથ, જોશ ફિલિપ, મેથ્યુ રેનશો અને એડમ ઝામ્પા.
