મહિલાઓના આર્થિક સશક્તિકરણ માટે, કેન્દ્ર સરકારે વર્ષ 2023 માં મહિલા સન્માન સેવિંગ્સ સર્ટિફિકેટ (MSSC) યોજના શરૂ કરી હતી. આ યોજના હેઠળ, દેશની કોઈપણ મહિલા MSSC ખાતું ખોલાવી શકે છે. આ યોજના પર હાલમાં 7.5% નો આકર્ષક વ્યાજ દર આપવામાં આવી રહ્યો છે, જે અન્ય કોઈપણ ફિક્સ્ડ ઇન્કમ નાની બચત યોજનાઓ કરતાં વધુ છે. આ સ્કીમમાં એક સાથે રકમ જમા કરવામાં આવે છે અને તે 2 વર્ષમાં પાકી થાય છે. આ યોજનામાં મહત્તમ 2 લાખ રૂપિયા સુધીનું રોકાણ કરી શકાય છે.
1 લાખ રૂપિયાના રોકાણ પર મળશે 16,022 રૂપિયાનું નિશ્ચિત વ્યાજ
આપણે દેશના કોઈપણ બેંકમાં MSSC ખાતુ ખોલાવી શકીએ છીએ. બેન્ક સિવાય, નજીકના પોસ્ટ ઓફિસમાં પણ મહિલા સન્માન સેવિંગ્સ સર્ટિફિકેટ ખાતુ ખોલાવી શકાય છે. જો તમે પુરુષ છો, તો તમે આ સ્કીમનો લાભ લઈ શકતા નથી, પરંતુ તમારી માતા અથવા બહેનના નામે પણ ખાતું ખોલાવી શકો છો. જો તમે વિવાહિત છો, તો MSSCમાં તમારી પત્નીના નામે ખાતુ ખોલાવીને આકર્ષક લાભ મેળવી શકો છો. જો તમે આ સ્કીમમાં તમારી પત્નીના નામે રૂ.1,00,000 જમા કરો છો, તો 2 વર્ષ પછી તમને રૂ.1,16,022 મળશે, જેમાં ₹16,022નું નિશ્ચિત વ્યાજ સામેલ છે.
MSSCમાં રોકાણની છેલ્લી તારીખ 31 માર્ચ, 2025
મહિલા સન્માન સેવિંગ્સ સર્ટિફિકેટ એક સરકારી યોજના છે, સરકારની ગેરંટી સાથે નિશ્ચિત વ્યાજ મળે છે. આ યોજના હેઠળ રોકાણ કરવાની છેલ્લી તારીખ 31 માર્ચ, 2025 છે. 1 એપ્રિલ, 2025 પછી આ યોજનામાં રોકાણ કરી શકાશે નહીં. આ યોજનાની સમયસીમા વધારવાની માંગ કરવામાં આવી હતી, પરંતુ 1 ફેબ્રુઆરી, 2025ના બજેટમાં કેન્દ્રીય નાણામંત્રી નિર્મલા સીતારામણે આ અંગે કોઈ જાહેરાત કરી નથી, તેથી આ યોજના 31 માર્ચે બેંક અને પોસ્ટ ઓફિસમાં બંધ થઇ જશે
આથી, જો તમે તમારી પત્નીના નામે MSSCમાં રોકાણ કરો છો, તો તમે નિશ્ચિત વ્યાજ સાથે સુરક્ષિત અને લાભદાયી બચત કરી શકો છો.
