NEET UG 2026 Re-Exam: મેડિકલ ક્ષેત્રમાં પ્રવેશ મેળવવા માટેની દેશની સૌથી મોટી પ્રવેશ પરીક્ષા NEET UG 2026ની પુનઃપરીક્ષા (Re-Exam) આપનારા વિદ્યાર્થીઓ માટે મહત્વપૂર્ણ સમાચાર સામે આવ્યા છે. નેશનલ ટેસ્ટિંગ એજન્સી (NTA)એ 21 જૂને યોજાનારી NEET UG રી-એગ્ઝામ માટે અનેક વિદ્યાર્થી-મૈત્રીપૂર્ણ ફેરફારોની જાહેરાત કરી છે. એજન્સીનું કહેવું છે કે આ નિર્ણય વિદ્યાર્થીઓને વધુ અનુકૂળ પરીક્ષા અનુભવ આપવા તેમજ પરીક્ષાની પારદર્શિતા અને સુરક્ષા જાળવવા માટે લેવામાં આવ્યો છે. છેલ્લા કેટલાક વર્ષોમાં વિદ્યાર્થીઓ તરફથી મળેલા પ્રતિસાદ અને સૂચનોને ધ્યાનમાં રાખીને NTAએ પરીક્ષાના સમય, રફ વર્ક પેજ અને પ્રશ્નપત્રના લેઆઉટમાં મહત્વપૂર્ણ ફેરફારો કર્યા છે. ખાસ કરીને ડાબોડી (Left-Handed) વિદ્યાર્થીઓ અને ગણતરી આધારિત પ્રશ્નો ઉકેલતા ઉમેદવારોને વધુ સુવિધા મળે તે માટે નવા નિયમો અમલમાં મૂકવામાં આવ્યા છે.
પરીક્ષાનો સમય વધારાયો
NTA દ્વારા જાહેર કરવામાં આવેલી નવી વ્યવસ્થા મુજબ હવે NEET UG 2026 રી-એગ્ઝામ માટે કુલ 195 મિનિટનો સમય ફાળવવામાં આવ્યો છે. પરીક્ષા બપોરે 2 વાગ્યાથી શરૂ થઈને સાંજે 5:15 વાગ્યા સુધી ચાલશે. અગાઉ પરીક્ષા દરમિયાન હાજરી ચકાસણી અને અન્ય વહીવટી પ્રક્રિયાઓને કારણે વિદ્યાર્થીઓનો કિંમતી સમય વપરાઈ જતો હોવાની ફરિયાદો મળતી હતી. હવે વધારાના સમયમાં આવી તમામ પ્રક્રિયાઓનો સમાવેશ કરવામાં આવ્યો છે જેથી ઉમેદવારોને પ્રશ્નપત્ર ઉકેલવા માટે પૂરતો સમય મળી રહે.
હવે મળશે 4 રફ વર્ક પેજ
વિદ્યાર્થીઓ માટે વધુ એક મહત્વપૂર્ણ રાહતરૂપ નિર્ણય તરીકે NTAએ રફ વર્ક માટે ઉપલબ્ધ પેજની સંખ્યા વધારી છે. અગાઉ પ્રશ્નપત્રમાં માત્ર 2 રફ વર્ક પેજ આપવામાં આવતા હતા, જ્યારે હવે ઉમેદવારોને કુલ 4 રફ વર્ક પેજ મળશે. આ વધારાના પેજના કારણે વિદ્યાર્થીઓ સરળતાથી ગણતરી, ડાયાગ્રામ અને અન્ય જરૂરી નોંધો બનાવી શકશે. વિશેષ કરીને ફિઝિક્સ અને કેમિસ્ટ્રી જેવા વિષયોમાં વધુ ગણતરી કરવાની જરૂર પડતી હોવાથી આ નિર્ણય વિદ્યાર્થીઓ માટે લાભદાયી માનવામાં આવી રહ્યો છે.
પ્રશ્નપત્રના લેઆઉટમાં પણ ફેરફાર
NTAએ પ્રશ્નપત્રમાં રફ વર્ક પેજની ગોઠવણીમાં પણ ફેરફાર કર્યો છે. અગાઉ તમામ રફ વર્ક પેજ પ્રશ્નપત્રના અંતમાં આપવામાં આવતા હતા. ઘણા વિદ્યાર્થીઓએ આ વ્યવસ્થાને અસુવિધાજનક ગણાવી હતી. ખાસ કરીને ડાબોડી વિદ્યાર્થીઓ માટે વારંવાર પાછળના પેજ પર જવું મુશ્કેલ બનતું હતું. નવી વ્યવસ્થા મુજબ હવે બે રફ વર્ક પેજ સૂચનાઓ (Instructions) બાદ શરૂઆતમાં આપવામાં આવશે, જ્યારે બાકીના બે પેજ પ્રશ્નપત્રના અંતમાં રહેશે. આ નવી ગોઠવણી અંગ્રેજી તેમજ તમામ પ્રાદેશિક ભાષાના પ્રશ્નપત્રોમાં લાગુ કરવામાં આવશે.
વિદ્યાર્થીઓના પ્રતિસાદ બાદ લેવાયો નિર્ણય
NTAએ જણાવ્યું છે કે આ ફેરફારો વર્ષોથી વિદ્યાર્થીઓ પાસેથી મળેલા પ્રતિસાદના આધારે અમલમાં મૂકવામાં આવ્યા છે. એજન્સીનું માનવું છે કે, પરીક્ષા દરમિયાન ઉમેદવારોને વધુ આરામદાયક અને અનુકૂળ વાતાવરણ મળે તો તેઓ પોતાની ક્ષમતા મુજબ શ્રેષ્ઠ પ્રદર્શન કરી શકે છે. આ કારણસર પરીક્ષા પ્રક્રિયાને વધુ વિદ્યાર્થી-કેન્દ્રિત બનાવવાના પ્રયાસો કરવામાં આવ્યા છે.
આ પણ વાંચો: NEET વર્ષમાં 2-3 વખત યોજાશે?: પેપર લીક વિવાદ બાદ સંસદમાં ઉઠ્યો મોટો સવાલ, વિદ્યાર્થીઓને મળી શકે છે મોટી રાહત
ઉમેદવારોને NTAની ખાસ સૂચના
NTAએ તમામ ઉમેદવારોને એડમિટ કાર્ડ અને માહિતી પુસ્તિકામાં આપવામાં આવેલી સૂચનાઓ ધ્યાનપૂર્વક વાંચવાની સલાહ આપી છે. સાથે જ પરીક્ષા કેન્દ્ર પર સમયસર પહોંચવા, નિયમોનું પાલન કરવા અને પરીક્ષા સ્ટાફ સાથે સંપૂર્ણ સહકાર આપવા અપીલ કરવામાં આવી છે જેથી પરીક્ષાનું આયોજન સુચારુ રીતે પૂર્ણ થઈ શકે.
વિદ્યાર્થીઓ માટે કેમ મહત્વનો છે આ નિર્ણય?
દર વર્ષે લાખો વિદ્યાર્થીઓ NEET UG પરીક્ષામાં ભાગ લે છે. આવી સ્થિતિમાં પરીક્ષાનો સમય વધારવો અને રફ વર્ક માટે વધુ જગ્યા ઉપલબ્ધ કરાવવી જેવા નિર્ણયો ઉમેદવારોને સીધો લાભ પહોંચાડી શકે છે. શિક્ષણ નિષ્ણાતોના મતે આ ફેરફારો પરીક્ષાનો તણાવ ઘટાડવામાં અને વિદ્યાર્થીઓને વધુ અસરકારક રીતે પ્રશ્નો ઉકેલવામાં મદદરૂપ સાબિત થઈ શકે છે.
