NEET Protest Parliament: NEET પરીક્ષા ગેરરીતિ, દેશભરમાં સામે આવેલા પેપર લીકના બનાવો અને વિરોધ કરી રહેલા વિદ્યાર્થીઓ પર થયેલી પોલીસ કાર્યવાહીના મુદ્દે સંસદમાં રાજકીય તાપમાન વધુ વધી ગયું છે. કોંગ્રેસ સહિતના અનેક વિરોધ પક્ષોએ કેન્દ્ર સરકાર સામે સંયુક્ત મોરચો ખોલતાં સંસદમાં અનોખો વિરોધ નોંધાવ્યો. વિરોધ પક્ષના તમામ સાંસદો કાળા કપડાં પહેરીને સંસદ ભવન પહોંચ્યા અને સરકાર તેમજ કેન્દ્રીય શિક્ષણ મંત્રી સામે સૂત્રોચ્ચાર કરીને પોતાનો વિરોધ વ્યક્ત કર્યો. આ વિરોધ માત્ર સંસદ પૂરતો મર્યાદિત રહ્યો નથી, પરંતુ છેલ્લા કેટલાક દિવસોથી દેશભરમાં ચાલી રહેલા વિદ્યાર્થી આંદોલનને રાજકીય સમર્થન આપવાનો પણ પ્રયાસ માનવામાં આવી રહ્યો છે. કોંગ્રેસનું કહેવું છે કે લાખો વિદ્યાર્થીઓના ભવિષ્ય સાથે જોડાયેલા ગંભીર પ્રશ્નોને સરકાર સતત અવગણી રહી છે, જેના કારણે હવે સંસદની અંદર અને બહાર બંને જગ્યાએ દબાણ વધારવાની વ્યૂહરચના અપનાવવામાં આવી છે.
કાળા કપડાંમાં સંસદ પહોંચ્યો સમગ્ર વિપક્ષ
કોંગ્રેસ, સમાજવાદી પાર્ટી સહિતના અનેક વિરોધ પક્ષોના સાંસદો બુધવારે કાળા કપડાં પહેરીને સંસદ ભવન પહોંચ્યા હતા. આ પ્રતીકાત્મક વિરોધ દ્વારા તેમણે નીટ પેપર લીક, વિવિધ ભરતી પરીક્ષાઓમાં થયેલી ગેરરીતિઓ અને વિરોધ પ્રદર્શન દરમિયાન વિદ્યાર્થીઓ તથા સાંસદો સામે થયેલી પોલીસ કાર્યવાહીને લઈને કેન્દ્ર સરકાર સામે અસંતોષ વ્યક્ત કર્યો. સંસદ પરિસરમાં વિરોધ દરમિયાન રાહુલ ગાંધી, પ્રિયંકા ગાંધી વાડ્રા અને સમાજવાદી પાર્ટીના અધ્યક્ષ અખિલેશ યાદવે આગેવાની સંભાળી હતી. વિરોધ પક્ષના નેતાઓએ સરકાર પર વિદ્યાર્થીઓના પ્રશ્નોને ગંભીરતાથી ન લેવાનો આરોપ લગાવ્યો.
કોંગ્રેસે સરકારને આપ્યો કડક સંદેશ
કોંગ્રેસના નેતાઓનું કહેવું છે કે, આ વિરોધનો મુખ્ય હેતુ યુવાનો અને વિદ્યાર્થીઓના ભવિષ્ય સાથે જોડાયેલા મુદ્દાઓ તરફ સરકારનું ધ્યાન દોરવાનો છે. પાર્ટીના સાંસદોએ એકજૂટ થઈને સંદેશ આપવાનો પ્રયાસ કર્યો કે પરીક્ષા પ્રણાલીમાં પારદર્શિતા અને વિશ્વાસ જાળવવો સરકારની જવાબદારી છે. કોંગ્રેસનું માનવું છે કે, પેપર લીક જેવી ઘટનાઓ માત્ર પરીક્ષાઓને જ નહીં પરંતુ લાખો વિદ્યાર્થીઓના ભવિષ્યને પણ અસર કરે છે. તેથી આ મુદ્દે સરકાર દ્વારા તાત્કાલિક અને અસરકારક પગલાં લેવામાં આવવા જોઈએ.
આ પણ વાંચો: ધર્મેન્દ્ર પ્રધાનના રાજીનામાની માંગ પર અડગ CJP : જંતર-મંતર પર વિરોધ પ્રદર્શન યથાવત
પ્રિયંકા ગાંધીનું નિવેદન
સંસદમાં પહોંચેલી કોંગ્રેસ મહાસચિવ પ્રિયંકા ગાંધી વાડ્રાએ મીડિયા સાથે વાતચીત દરમિયાન કહ્યું કે તેમની પાર્ટી હિંસાનો વિરોધ કરે છે અને લોકશાહી મૂલ્યોમાં વિશ્વાસ રાખે છે. તેમણે જણાવ્યું કે, વિરોધ કરવાનો લોકશાહી અધિકાર દરેક નાગરિકને છે અને વિદ્યાર્થીઓની માંગણીઓને બળપ્રયોગથી દબાવવાના બદલે સરકારને તેમની સાથે સંવાદ કરવો જોઈએ.
વિદ્યાર્થીઓ સાથે સંવાદ કરવાની માંગ
કોંગ્રેસના રાજ્યસભા સાંસદ સૈયદ નસીર હુસૈને જણાવ્યું કે વિરોધ પક્ષના તમામ સાંસદો કાળા કપડાં પહેરીને વિદ્યાર્થીઓ અને સાંસદો સામે થયેલી પોલીસ કાર્યવાહીના વિરોધમાં સંસદમાં આવ્યા છે. તેમણે સરકારને અપીલ કરી કે, તે પોતાની જિદ્દ છોડીને વિદ્યાર્થીઓ સાથે સીધી વાતચીત કરે અને સમગ્ર શિક્ષણ વ્યવસ્થામાં જરૂરી સુધારા માટે ગંભીર પ્રયાસો કરે.
પોલીસ કાર્યવાહી પર ઉઠ્યા સવાલ
કોંગ્રેસના વરિષ્ઠ સાંસદ પ્રમોદ તિવારીએ 20 જુલાઈના વિરોધ પ્રદર્શન દરમિયાન વિદ્યાર્થીઓ પર થયેલા લાઠીચાર્જ અંગે કડક વાંધો ઉઠાવ્યો. તેમણે આરોપ લગાવ્યો કે, વિરોધ દરમિયાન કેટલાક એવા લોકો પણ હાજર હતા જેમની ઓળખ સ્પષ્ટ નહોતી અને તેમણે હુમલો કર્યો હતો. તેમણે પ્રશ્ન ઉઠાવ્યો કે, આવી ઘટનાઓ સામે વિરોધ પક્ષ અને લોકસભાના વિરોધ પક્ષના નેતા મૌન કેવી રીતે રહી શકે.
આ પણ વાંચો: દિલ્હીના વિરોધ વચ્ચે સરકારની મોટી પહેલ : સોનમ વાંગચુકને મળ્યા કેન્દ્રીય મંત્રી જેપી નડ્ડા
સંસદ પહેલાં વિરોધ માર્ચ, અનેક નેતાઓની અટકાયત
સંસદમાં વિરોધ પહેલાં કોંગ્રેસના નેતાઓએ રાજાજી માર્ગથી લોક કલ્યાણ માર્ગ સુધી વિરોધ માર્ચ યોજ્યો હતો. આ દરમિયાન તેમણે પરીક્ષા પેપર લીકના મુદ્દે કાર્યવાહી, વિદ્યાર્થીઓ પર થયેલી પોલીસ કાર્યવાહીનો વિરોધ અને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી હતી. માર્ચ દરમિયાન રાહુલ ગાંધી, પ્રિયંકા ગાંધી, અખિલેશ યાદવ સહિત અનેક નેતાઓને પોલીસે અટકાયતમાં લીધા હતા. બાદમાં તમામ નેતાઓને છત્રસાલ સ્ટેડિયમમાંથી મુક્ત કરવામાં આવ્યા હતા.
અટકાયત બાદ સરકાર પર પ્રહાર
અટકાયત બાદ પ્રિયંકા ગાંધી વાડ્રાએ કેન્દ્ર સરકાર પર કટાક્ષ કરતાં કહ્યું કે, સરકાર વિરોધથી ડરી રહી છે અને લોકશાહી અવાજને દબાવવાનો પ્રયાસ કરી રહી છે. પોલીસે તેમને મંદિર માર્ગ પોલીસ સ્ટેશન લઈ ગઈ હતી, જ્યાં કોંગ્રેસ સંસદીય દળની અધ્યક્ષ સોનિયા ગાંધી પણ તેમની મુલાકાતે પહોંચી હતી. વિરોધ પ્રદર્શનમાં કોંગ્રેસ અધ્યક્ષ મલ્લિકાર્જુન ખડગે, કે.સી. વેણુગોપાલ અને વી.ડી. સતીશન સહિતના અનેક વરિષ્ઠ નેતાઓ પણ જોડાયા હતા.
સમગ્ર વિવાદનું કારણ શું?
તાજેતરમાં યોજાયેલા 'સંસદ ચલો' કાર્યક્રમ દરમિયાન વિદ્યાર્થીઓ અને વિરોધ પ્રદર્શનકારીઓ પર પોલીસ દ્વારા લાઠીચાર્જ અને આંસુ ગેસનો ઉપયોગ કરવામાં આવ્યો હતો. આ ઘટનાના વિરોધમાં હવે સંસદની અંદર પણ વિરોધ પક્ષે સરકાર સામે આક્રમક વલણ અપનાવ્યું છે. વિપક્ષનું કહેવું છે કે, પેપર લીક અને પરીક્ષા પ્રણાલીમાં ગેરરીતિના મુદ્દે માત્ર રાજકીય નિવેદનો પૂરતા નથી, પરંતુ જવાબદારી નક્કી કરીને દોષિતો સામે કડક કાર્યવાહી અને શિક્ષણ વ્યવસ્થામાં પારદર્શિતા લાવવા માટે કેન્દ્ર સરકારે સ્પષ્ટ રોડમેપ જાહેર કરવો જોઈએ. બીજી તરફ સરકાર તરફથી આ મુદ્દે પોતાનો પક્ષ રજૂ કરવામાં આવી રહ્યો છે અને સંસદમાં આ મુદ્દે વધુ ગરમાગરમ ચર્ચા થવાની શક્યતા છે.
