અમેઝોન પ્રાઇમ વિડિયોની લોકપ્રિય વેબ સિરીઝ 'પંચાયત'ની ચોથી સીઝન, જે 24 જૂન, 2025ના રોજ રિલીઝ થઈ, ફરી એકવાર ફુલેરા ગામની સરળ અને હૃદયસ્પર્શી વાર્તાથી દર્શકોનું મનોરંજન કરી રહી છે. મંજુ દેવી અને ક્રાંતિ દેવી વચ્ચેની રાજકીય ટક્કર, સચિવજી અને રિન્કીની લવ સ્ટોરી તેમજ ગામની રોજિંદી ઘટનાઓએ ચાહકોને ખૂબ આકર્ષ્યા છે. પરંતુ, હવે સીઝન 5ને લઈને એક મોટો ખુલાસો સામે આવ્યો છે. 'મંજુ દેવી'નું પાત્ર ભજવનાર અભિનેત્રી નીના ગુપ્તાએ IANS સાથેની એક ખાસ મુલાકાતમાં દાવો કર્યો છે કે 'પંચાયત' સીઝન 5ની સ્ક્રિપ્ટ લીક થઈ ગઈ છે!
નીના ગુપ્તાએ હસતાં-હસતાં જણાવ્યું, "સ્ક્રિપ્ટ લીક થઈ ગઈ છે. આગલી સીઝન માટે તૈયાર થઈ જાઓ!" આ નિવેદન તેમણે ત્યારે કર્યું જ્યારે IANSએ ચોથી સીઝનના ત્રણ મુખ્ય સવાલો પૂછ્યા: "ચૂંટણી કોણ જીતશે?", "સચિવજી અને રિન્કીની લવ સ્ટોરી ક્યાં સુધી આગળ વધશે?" અને "શું સચિવજી આખરે પરીક્ષા પાસ કરશે?". આ ખુલાસાએ ચાહકોમાં ઉત્સુકતા અને આશ્ચર્યનો માહોલ સર્જ્યો છે. ખાસ કરીને, સચિવજી (જિતેન્દ્ર કુમાર) અને રિન્કી (સનવિકા)ના લગ્નની ચર્ચાએ સોશિયલ મીડિયા પર જોર પકડ્યું છે. કેટલાક અહેવાલો અનુસાર, ચાહકો અનુમાન લગાવી રહ્યા છે કે સીઝન 5માં સચિવજી અને રિન્કીના લગ્ન થઈ શકે છે, જે વાર્તાને નવું વળાંક આપશે.
સચિવજી અને રિન્કીની પ્રેમકથાએ ત્રીજી સીઝનથી જ દર્શકોનું ધ્યાન ખેંચ્યું છે. ચોથી સીઝનમાં તેમની લવ સ્ટોરી થોડી આગળ વધતા દેખાય છે, પરંતુ લગ્નનો પ્રશ્ન હજુ અટકી પડ્યો છે. નીના ગુપ્તાના સ્ક્રિપ્ટ લીકના નિવેદન પછી, કેટલાક ચાહકો માને છે કે સીઝન 5માં સચિવજી અને રિન્કીના લગ્ન થવાની સંભાવના છે, જ્યારે અન્ય લોકોને લાગે છે કે ગામની રાજનીતિ કે સચિવજીની કારકિર્દીના અવરોધોને કારણે વાર્તામાં નવા ટ્વિસ્ટ આવશે. સનવિકાએ OTT Playને આપેલી મુલાકાતમાં પુષ્ટિ કરી કે સીઝન 5નું કામ શરૂ થઈ ગયું છે અને તે 2026ના મધ્યમાં કે અંતમાં રિલીઝ થઈ શકે છે. આથી લગ્નની શક્યતાની ચર્ચા વધુ તીવ્ર બની છે. લેખક ચંદન કુમારે એક ચોથો સવાલ ઉમેર્યો, "પ્રધાનજીને ગોળી કોણે મારી?" જેનાથી ચાહકોની ઉત્સુકતા બમણી થઈ છે.
'પંચાયત'ની ચોથી સીઝનમાં ચૂંટણીનો રોમાંચ, મંજુ દેવી અને ક્રાંતિ દેવીની ટક્કર તેમજ સચિવજીના વ્યક્તિગત અને વ્યાવસાયિક જીવનની વાર્તાએ દર્શકોને બાંધી રાખ્યા છે. જોકે, કેટલાક ચાહકોનું માનવું છે કે ચોથી સીઝનનો અંત અગાઉની સીઝનની તુલનામાં થોડો નબળો રહ્યો. નીના ગુપ્તાના સ્ક્રિપ્ટ લીકના નિવેદન અને સચિવજી-રિન્કીના લગ્નની ચર્ચાએ સીઝન 5ની રાહને વધુ રોમાંચક બનાવી છે. શું સ્ક્રિપ્ટ ખરેખર લીક થઈ છે, કે આ નિર્માતાઓની પ્રમોશનલ યુક્તિ છે? આ સવાલનો જવાબ 2026માં ફુલેરાની નવી વાર્તા સાથે મળશે!
