"પાકિસ્તાન જવાનું કહેનારા લોકો કૈલાશ જાય!" : નસીરુદ્દીન શાહનું દિલજીત દોસાંઝના સમર્થનમાં ચોંકાવનારું નિવેદન, ગુસ્સે ભરાયા ચાહકો!

દિલજીતની અપકમિંગ ફિલ્મ'સરદારજી 3'ના વિવાદની શરૂઆત ત્યારે થઈ જ્યારે ફિલ્મનું ટ્રેલર રિલીઝ થયું. ટ્રેલરમાં પાકિસ્તાની એક્ટ્રેસ હાનિયા આમિરને જોઈને ફેંસનો ગુસ્સો સાતમા આસમાને પહોંચી ગયો. ખરેખર, લોકો માનતા હતા કે પહેલગામ આતંકવાદી હુમલા બાદ હાનિયા આમિરને ફિલ્મમાંથી હટાવી દેવામાં આવશે, પરંતુ એવું થયું નહીં. આ બાદથી જ દિલજીત અને ફિલ્મના નિર્માતાઓ લોકોના નિશાના પર છે. ઓલ ઈન્ડિયા સિને વર્કર્સ એસોસિએશન (AICWA)એ તો દિલજીત દોસાંઝને ભારતમાં કામ કરવા પર સંપૂર્ણ પ્રતિબંધ મૂકવાની અને તેમની નાગરિકતા રદ કરવાની માંગ પણ કરી છે. આવા સમયે બોલિવૂડના દિગ્ગજ અભિનેતા નસીરુદ્દીન શાહે દિલજીતનું ખુલ્લેઆમ સમર્થન કર્યું છે. આ પ્રતિક્રિયા એવા વિવાદના સંદર્ભમાં આવી છે, જેમાં દિલજીત પર પાકિસ્તાની અભિનેત્રી હાનિયા આમિર સાથે 'સરદારજી 3'માં કામ કરવા બદલ ટીકા થઈ રહી છે.



નસીરુદ્દીન શાહનું વાયરલ પોસ્ટ
સોશિયલ મીડિયા પર દિલજીતને ટ્રોલ કરવામાં આવી રહ્યા છે, અને કેટલાક લોકો આ સહયોગને ભારત વિરોધી ગણાવી રહ્યા છે. નસીરુદ્દીન શાહે આ આરોપોને નિરાધાર ગણાવીને ફેસબુક પોસ્ટ દ્વારા પોતાનો રોષ વ્યક્ત કર્યો છે. તેમણે સ્પષ્ટ શબ્દોમાં કહ્યું કે, દિલજીત દોસાંઝને ફક્ત એટલા માટે નિશાન બનાવવામાં આવી રહ્યા છે કારણ કે તેઓ એક જાણીતું નામ છે. તેમણે જણાવ્યું કે ફિલ્મની કાસ્ટિંગની જવાબદારી દિગ્દર્શકની હોય છે, અભિનેતાની નહીં, અને આ હકીકતને નજરઅંદાજ કરીને કેટલાક લોકો જાણીજોઈને દિલજીતને ખરીખોટી સંભળાવી રહ્યા છે.


નસીરુદ્દીન શાહે શું કહ્યું?
તેમણે પોતાની પોસ્ટમાં લખ્યું, "હું દિલજીતની સાથે નિશ્ચિતપણે ઊભો છું. જુમલા પાર્ટીનો ગંદો ચાલબાજ વિભાગ તેમના પર હુમલો કરવાની તક શોધી રહ્યો હતો અને તેમને લાગે છે કે હવે તેમને તક મળી ગઈ છે. એ ખૂબ જ દુર્ભાગ્યપૂર્ણ છે કે જે લોકો ખરેખર ફિલ્મની કાસ્ટિંગ માટે જવાબદાર છે, તેમને કોઈ ઓળખતું નથી, જ્યારે દિલજીત એક જાણીતું નામ છે. એટલે જ તેમને નિશાન બનાવવામાં આવી રહ્યા છે." નસીરુદ્દીન શાહે એમ પણ કહ્યું કે દિલજીતે ફિલ્મ માટે હા તો ફક્ત એટલા માટે કહી કારણ કે તેમના મનમાં કોઈપણ પ્રકારની નફરત નથી. તેમણે કહ્યું કે આપણે ભારત અને પાકિસ્તાનના સામાન્ય લોકો વચ્ચે વ્યક્તિગત સ્તરે સંવાદ જાળવી રાખવાની જરૂર છે, નહીં કે તેને ખતમ કરવાની.



લોકો નસીરુદ્દીન શાહ પર ગુસ્સે
તેમણે લખ્યું, "આ ગુંડાઓ જે ઇચ્છે છે તે એ છે કે ભારત અને પાકિસ્તાનના સામાન્ય લોકો એકબીજા સાથે વાતચીત બંધ કરી દે. મારા પોતાના કેટલાક નજીકના સંબંધીઓ અને પ્રિય મિત્રો પાકિસ્તાનમાં છે. કોઈ મને તેમની સાથે મળવાથી કે જ્યારે મન થાય ત્યારે તેમને મારો પ્રેમ મોકલવાથી રોકી શકે નહીં. અંતમાં, જે લોકો 'પાકિસ્તાન જાઓ' કહે છે, તેમને હું કહીશ કે 'કૈલાસા જાઓ'." નોંધનીય છે કે નસીરુદ્દીન શાહ આવા તીખા નિવેદનો આપવામાં ક્યારેય પાછળ રહેતા નથી. તેઓ હંમેશા ખુલ્લેઆમ પોતાનો અભિપ્રાય વ્યક્ત કરે છે, અને આ વખતે પણ તેમણે એવું જ કંઈક કર્યું. તેમની આ પોસ્ટ વાયરલ થતાં જ તેમને ટ્રોલ કરવામાં આવી રહ્યા છે. લોકોનું કહેવું છે કે તેઓ દેશની સાથે નથી અને દેશ સાથે ગદ્દારી કરનારા લોકોના સમર્થનમાં છે. એકવાર ફરીથી તેમને ઘણા લોકોએ રાષ્ટ્રવિરોધી ગણાવ્યા. જોકે, કેટલાક એવા લોકો પણ છે જેઓ અભિનેતાના વિચારો સાથે સહમત છે.

નસીરુદ્દીનનું પોસ્ટ ડિલીટ
જોકે, નસીરુદ્દીન શાહે બાદમાં તેમની આ પોસ્ટ ડિલીટ કરી દીધી હતી, પરંતુ તેમણે આનું કોઈ કારણ જણાવ્યું નથી. આ પોસ્ટ ડિલીટ થવા છતાં તેની ચર્ચા સોશિયલ મીડિયા પર ચાલુ રહી, અને લોકો તેમના આ નિવેદનને લઈને બે ભાગમાં વહેંચાઈ ગયા. કેટલાક લોકો નસીરુદ્દીનના વિચારોનું સમર્થન કરી રહ્યા છે, જ્યારે અન્ય લોકો તેમને દેશદ્રોહી ગણાવી રહ્યા છે.