14 દિવસમાં મ્યાનમારમાં 112 આફ્ટરશોક્સ : મૃત્યુઆંક 3600ને પાર

28 માર્ચ 2025ના રોજ મ્યાનમારમાં ભયંકર ભૂકંપ આવ્યો હતો. આ ભૂકંપ મ્યાનમારના ઇતિહાસનો સૌથી વિનાશક ભૂકંપ કહેવાય છે. 7.7ની તીવ્રતાનો ભૂકંપ આવ્યો ત્યારથી અત્યાર સુધીમાં 112 આફ્ટરશોક્સ અનુભવાયા છે, જેની તીવ્રતા 2.8થી 7.5ની છે. મ્યાનમારના હવામાન અને જળવિજ્ઞાન વિભાગના જણાવ્યા અનુસાર, ભૂકંપમાં મૃતકોની સંખ્યા વધીને 3,649 થઈ ગઈ છે, જ્યારે 5,018 લોકો ઘાયલ છે અને 145 લોકો ગુમ છે.

મીડિયા રિપોર્ટ્સ અનુસાર ભૂકંપના કારણે દેશની મોબાઈલ કોમ્યુનિકેશન સિસ્ટમને પણ નુકસાન થયું છે. ભૂકંપના કારણે કુલ 6,730 કોમ્યુનિકેશન સ્ટેશનોને નુકસાન થયું હતું, જેમાંથી 5,999નું સમારકામ કરવામાં આવ્યું છે. ભારત, સંયુક્ત રાષ્ટ્ર, યુનાઇટેડ સ્ટેટ્સ અને યુરોપિયન યુનિયન જેવી આંતરરાષ્ટ્રીય સંસ્થાઓએ મ્યાનમારને મદદ કરવા માટે રાહત અને બચાવ ટીમો, તબીબી ટીમો અને આવશ્યક સંસાધનો મોકલ્યા છે. યુનેસ્કોએ પણ મદદનો સંકેત આપ્યો છે.

મ્યાનમારનો અતા થિંગયાન ફેસ્ટિવલ
ભૂકંપની દુર્ઘટનાએ મ્યાનમારના સૌથી પ્રખ્યાત પરંપરાગત તહેવાર 'અતા થિંગયાન ફેસ્ટિવલ'ને પણ અસર કરી છે. આ તહેવાર દર વર્ષે 13થી 16 એપ્રિલ સુધી મોટા પાયે ઉજવવામાં આવે છે. જો કે, આ વખતે તહેવારને લગતા સંગીત, નૃત્ય અને અન્ય કાર્યક્રમો રદ કરવામાં આવ્યા છે. યાંગોન શહેર વિકાસ સમિતિએ શહેરના તમામ જાહેર મંડપ અને કાર્યક્રમોને સ્થગિત કરવાનો આદેશ આપ્યો છે. મ્યાનમારનું પરંપરાગત નવું વર્ષ, જે 17 એપ્રિલે આવે છે, તેને શાંતિપૂર્ણ રીતે ઉજવવાનું કહેવામાં આવ્યું છે.

સંદેશાવ્યવહાર, આરોગ્ય અને સેવાઓ ખોરવાઈ
ભૂકંપને કારણે, મ્યાનમારમાં 15 પોસ્ટ ઓફિસને અસ્થાયી રૂપે બંધ કરવી પડી હતી, જોકે તે 31 માર્ચથી ધીમે ધીમે ખોલવામાં આવી રહી છે. આરોગ્ય સેવાઓ, પાણી પુરવઠો અને વીજળી સિસ્ટમને ખરાબ અસર થઈ છે. ગ્રામીણ વિસ્તારોમાં ખોરાક અને પીવાના પાણીની કટોકટી વધુ ઘેરી બની રહી છે.