Deepika Adhana pilot: ફરીદાબાદની 23 વર્ષીય પાયલટ દીપિકા અધાનાએ અમેરિકા-ઈઝરાયેલ અને ઈરાન વચ્ચે ચાલી રહેલા તણાવ દરમિયાન UAE થી 169 ભારતીયોને સુરક્ષિત ભારત પહોંચાડ્યા છે. એર ઈન્ડિયા એક્સપ્રેસની આ રેસ્ક્યૂ ફ્લાઈટની સૌથી ખાસ વાત એ હતી કે તેમાં તમામ 6 ક્રૂ મેમ્બર મહિલાઓ હતી. અચાનક મળેલા આદેશ બાદ દીપિકા પોતાની ટીમ સાથે રાસ અલ ખૈમાહ પહોંચી અને મુસાફરોને સુરક્ષિત દિલ્હી લઈને આવી.
સાહસ અને જવાબદારીનું ઉદાહરણ
હરિયાણાના ફરીદાબાદની રહેવાસી દીપિકા અધાનાએ યુદ્ધ જેવી સ્થિતિ વચ્ચે અદભૂત સાહસનો પરિચય આપ્યો છે. મિશન પર જતા પહેલા દીપિકાએ તેના પરિવાર સાથે વાત કરી હતી. તેણે ઘરના સભ્યોને કહ્યું હતું કે, "મમ્મી અને ચાચુ, મને છેલ્લી વાર જોઈ લો, કદાચ ફરી ન દેખાઉં." જોકે, પરિવારે તેને રોકવાને બદલે હિંમત આપી અને જવાબદારી પૂર્વક કામ કરવા પ્રેરિત કરી.
અચાનક મળ્યો રેસ્ક્યૂ મિશનનો આદેશ
દીપિકાના જણાવ્યા અનુસાર, 6 માર્ચની સવારે તેને અચાનક UAE જવાનો આદેશ મળ્યો હતો. વાસ્તવમાં આ ફ્લાઈટમાં તેની એક અન્ય પાયલટ મિત્ર જવાની હતી, પરંતુ ઉડાનના બે કલાક પહેલા જ દીપિકાને આ મિશનનો હિસ્સો બનવા સૂચના મળી. તે તરત જ પોતાની ટીમ સાથે તૈયાર થઈ ગઈ. આ ટીમમાં કેપ્ટન જસવિંદર કૌર, પાયલટ દીપિકા અધાના અને ચાર મહિલા ક્રૂ મેમ્બર્સ સામેલ હતા. યુદ્ધ જેવી સ્થિતિને કારણે મનમાં ચિંતા હતી, પરંતુ સુરક્ષાની ખાતરી મળતા ટીમે મક્કમ મનોબળ સાથે ઉડાન ભરી.
દાદાનું સપનું કર્યું પૂરું
દીપિકાના પિતા યોગેશ અધાના આર્કિટેક્ટ છે અને માતા બબલી અધાના ગૃહિણી છે. દીપિકાએ જણાવ્યું કે તેના સ્વર્ગસ્થ દાદા અમૃત સિંહ અધાનાની ઈચ્છા હતી કે તે પાયલટ બને. 2021માં કોમર્શિયલ પાયલટ લાયસન્સ મેળવ્યા બાદ તેણે ગ્રીસ અને ઈસ્તંબુલમાં એરબસ A320 ચલાવવાની ટ્રેનિંગ લીધી હતી. સપ્ટેમ્બર 2023માં તે એર ઈન્ડિયા એક્સપ્રેસમાં પસંદગી પામી અને એપ્રિલ 2024માં સત્તાવાર રીતે જોડાઈ.
જ્યારે વિમાન દિલ્હીના ઈન્દિરા ગાંધી ઈન્ટરનેશનલ એરપોર્ટ પર ઉતર્યું, ત્યારે મુસાફરોના ચહેરા પર રાહત અને ગર્વની લાગણી હતી. નાની ઉંમરે દીપિકાએ સાબિત કરી દીધું છે કે દ્રઢ નિશ્ચય હોય તો ગમે તેવી મુશ્કેલ પરિસ્થિતિમાં પણ દેશની સેવા કરી શકાય છે.
