જુમલા સાબિત થયા વાયદા! : 'મોદીજી, હોળી આવી ગઈ...મહિલાઓને ક્યારે મળશે સિલિન્ડર'? આતિશીએ BJP ને માર્યો ટોણો

Delhi News: પૂર્વ સીએમ આતિશી દિલ્હીમાં 20 દિવસ જૂની ભાજપ સરકાર પર નિશાન સાધવામાં કોઈ કસર છોડી રહ્યા નથી. મંગળવારે તેમણે ભાજપ પર નિશાન સાધતા કહ્યું કે હોળી આવી ગઈ છે... દિલ્હીની મહિલાઓને ફ્રી સિલિન્ડર ક્યારે મળશે? મંગળવારે પાર્ટી કાર્યાલયમાં પત્રકાર પરિષદને સંબોધતા આતિશીએ કહ્યું કે ભાજપે ચૂંટણી પહેલા મોટા વચનો આપ્યા હતા. જે હવે માત્ર નિવેદનો સાબિત થઈ રહ્યા છે.

આતિશીએ વધુમાં કહ્યું કે ભાજપે વાયદો કર્યો હતો કે 8 માર્ચે દિલ્હીની દરેક મહિલાના ખાતામાં 2500 રૂપિયાનો હપ્તો જમા કરવામાં આવશે, પરંતુ હજુ સુધી આ યોજના રજીસ્ટર થઈ નથી. આતિશીએ કહ્યું કે જ્યારે વચન પૂરું થયું નથી તો ભવિષ્યમાં મોદી સરકારની કોઈ ગેરંટી પર જનતા કેવી રીતે વિશ્વાસ કરશે?

જુમલા સાબિત થયા વાયદા
વિપક્ષના નેતાએ કહ્યું કે મોદીજીએ દિલ્હીની જનતાને વધુ એક વચન આપ્યું હતું કે દિલ્હીની દરેક મહિલાઓને હોળી અને દિવાળી પર મફત સિલિન્ડર આપવામાં આવશે, દિલ્હીની મહિલાઓ રાહ જોઈ રહી છે, હોળીનો તહેવાર આવી ગયો છે પરંતુ હજુ સુધી સિલિન્ડર નથી આવ્યા. દિલ્હીની મહિલાઓ વડાપ્રધાન નરેન્દ્ર મોદી અને દિલ્હી સરકારને પૂછી રહી છે કે ત્રણ દિવસ બાકી છે, તેમનો સિલિન્ડર ક્યારે આવશે? શું આ પણ રૂ.2,500 જેવો જુમલો સાબિત થશે?

મોદીજીની ગેરેન્ટીમાં કેટલો દમ?
દિલ્હીની જનતા તેમજ સમગ્ર દેશની જનતા આજે જાણવા માંગે છે કે શું મોદીજીની ગેરંટી ખરેખર ગેરંટી છે કે માત્ર જૂઠ અને છેતરપિંડી છે. દેશના અનેક રાજ્યોમાં વધુ ચૂંટણીઓ યોજાવા જઈ રહી છે. ત્યાંના લોકોએ પણ સમજવું પડશે કે મોદીજીની ગેરંટી કેટલી દમદાર છે. દિલ્હી વિધાનસભાના છેલ્લા સત્રમાં દિલ્હી સરકારે પોતાનો બધો સમય અરવિંદ કેજરીવાલને ગાળો બોલવામાં કાઢ્યો હતો, હવે દિલ્હીની જનતાને કહો કે 2500 રૂપિયા, ફ્રી સિલિન્ડર અને યમુનાની સફાઈ અંગે તેમની શું નક્કર યોજના છે?