Mini Cooper S Victory Edition : Mini India એ ભારતીય બજારમાં પોતાની નવી અને લિમિટેડ એડિશન કાર Mini Cooper S Victory Edition સત્તાવાર રીતે લોન્ચ કરી દીધી છે. આ કારની એક્સ-શોરૂમ કિંમત રૂ. 57.50 લાખ રાખવામાં આવી છે. આ સ્પેશિયલ એડિશન ખાસ કરીને 1965 ની આઇકોનિક મોન્ટે કાર્લો રેલી જીતનાર મિની કૂપર S ને શ્રદ્ધાંજલિ આપવા માટે તૈયાર કરવામાં આવી છે, જે જૂના જમાનાની મેમરીસ અને આજની મોડર્ન ટેકનોલોજીનું કોમ્બિનેશન છે.
આધુનિક ડિઝાઇન
Victory Edition નો લુક ખૂબ જ આકર્ષક છે. તે ખાસ 'Chili Red' કલરમાં ઉપલબ્ધ છે, જે 1960 ના દાયકાના મોટરસ્પોર્ટની યાદ અપાવે છે. કારના બોનેટ, રૂફ અને પાછળના ભાગમાં વ્હાઇટ કલરના પટ્ટાઓ આપવામાં આવ્યા છે, જે તેને સ્પોર્ટી લુક આપે છે. આ ઉપરાંત, કારની સાઈડમાં '52' નંબરનું ગ્રાફિક અને C-પિલર પર '1965' નો બેજ લગાવવામાં આવ્યો છે, જે તેનો ઈતિહાસને દર્શાવે છે.
પ્રીમિયમ ઇન્ટિરિયર અને ફીચર્સ
આ કારમાં માત્ર બહારથી જ નહીં પરંતુ અંદરથી પણ અનેક લક્ઝરી ફીચર્સ આપવામાં આવ્યા છે. તેમાં હર્મન કાર્ડન સાઉન્ડ સિસ્ટમ, એમ્બિયન્ટ લાઇટિંગ અને હેડ-અપ ડિસ્પ્લે જેવા ફીચર્સ આપવામાં આવ્યા છે. કારમાં પેનોરેમિક ગ્લાસ રૂફ અને વાયરલેસ ચાર્જિંગની સુવિધા પણ મળે છે. આ ઉપરાંત, વોઇસ કમાન્ડથી ચાલતું 'Mini Intelligent Personal Assistant' ડ્રાઇવિંગના એક્સપિરિયન્સને વધુ સરળ બનાવે છે.
દમદાર પર્ફોર્મન્સ
પાવરની વાત કરીએ તો, આ કારમાં 2.0-લિટરનું ટ્વીન પાવર ટર્બો પેટ્રોલ એન્જિન છે. આ એન્જિન 204hp નો પાવર અને 300Nm નો ટોર્ક જનરેટ કરે છે. 7-સ્પીડ ઓટોમેટિક ટ્રાન્સમિશન સાથે આ કાર માત્ર 6.6 સેકન્ડમાં 0 થી 100 કિમી પ્રતિ કલાકની સ્પીડ પકડી શકે છે. આ કારની ટોપ સ્પીડ 242 કિમી પ્રતિ કલાક છે.
સેફટી અને ટેકનોલોજી
સેફટી માટે આ સ્પેશિયલ એડિશનમાં અનેક એરબેગ્સ, એબીએસ (ABS), ડાયનેમિક સ્ટેબિલિટી કંટ્રોલ અને રીઅર-વ્યૂ કેમેરા જેવા ફીચર્સ આપવામાં આવ્યા છે. ડ્રાઇવિંગમાં મદદરૂપ થાય તે માટે ક્રુઝ કંટ્રોલ અને પાર્કિંગ આસિસ્ટન્ટ જેવી આધુનિક ટેકનોલોજીનો પણ સમાવેશ કરવામાં આવ્યો છે.
