સુરતના નવજીવન ઇન્ડસ્ટ્રીયલ વિસ્તારમાં એક ભીષણ આગની ઘટના સામે આવી છે. વિસ્તારમાં આવેલા પ્લાયવુડના ગોડાઉનમાં અચાનક આગ ભભૂકી ઉઠતાં આસપાસના વિસ્તારમાં ભારે અફરાતફરી મચી ગઈ હતી. ગોડાઉનમાં પ્લાયવુડનો મોટો જથ્થો સંગ્રહિત હોવાથી આગ ઝડપથી ફેલાઈ ગઈ અને થોડા જ સમયમાં ગોડાઉન અગ્નિની જ્વાળાઓમાં ઘેરાઈ ગયું.
10થી વધુ ગાડીઓ ઘટનાસ્થળે પહોંચી
આગ એટલી પ્રચંડ હતી કે ઊંચા ધુમાડાના ગોટેગોટા દૂર દૂર સુધી આકાશમાં દેખાતા હતા, જેના કારણે આસપાસના ઉદ્યોગકારો અને કામદારોમાં ભયનો માહોલ ફેલાયો હતો. આગની જાણ થતા જ સુરત ફાયર વિભાગ તાત્કાલિક હરકતમાં આવ્યો હતો. ફાયર વિભાગની 10થી વધુ ગાડીઓ ઘટનાસ્થળે પહોંચી હતી અને ચાર અલગ-અલગ ફાયર સ્ટેશનની ટીમોએ સંયુક્ત રીતે આગ બુઝાવવાની કામગીરી હાથ ધરી હતી.
ગોડાઉનમાં રાખેલો માલસામાન ખાખ
અગ્નિશામક દળે સતત બે કલાક સુધી ભારે જહેમત ઉઠાવી આગ પર કાબૂ મેળવ્યો હતો. આગ કાબૂમાં આવ્યા બાદ આસપાસના વિસ્તારમાં રાહતનો શ્વાસ લેવાયો હતો. સદનસીબે આ બનાવમાં કોઈ જાનહાનિ નોંધાઈ નથી, પરંતુ ગોડાઉનમાં રાખેલા માલસામાનને કારણે લાખો રૂપિયાનું નુકસાન થયાનું પ્રાથમિક અંદાજ છે. હાલ ફાયર વિભાગ દ્વારા આગ લાગવાનું ચોક્કસ કારણ જાણવા માટે તપાસ શરૂ કરવામાં આવી છે.
