Bangladesh Violence: બાંગ્લાદેશ ફરી એકવાર હિંસાની ચપેટમાં છે. ઇન્કિલાબ મંચ પ્લેટફોર્મના પ્રવક્તા અને યુવા નેતા શરીફ ઓસ્માન હાદીના મૃત્યુના સમાચાર બાદ ઢાકા સહિત અનેક શહેરોમાં વ્યાપક હિંસા ફાટી નીકળી છે. આ હિંસામાં દેશના મુખ્ય અખબારો પ્રથમ આલો અને ડેઇલી સ્ટારની કચેરીઓને નિશાન બનાવવામાં આવી, જ્યાં ટોળાએ તોડફોડ કરી અને આગ લગાવી દીધી. આ ઘટનાઓથી ફેબ્રુઆરીમાં યોજાનારી રાષ્ટ્રીય ચૂંટણીઓ પહેલાં વધુ અશાંતિનો ભય વધી ગયો છે.
શરીફ ઓસ્માન હાદીની હત્યા
શરીફ ઓસ્માન હાદી (32 વર્ષ)ની હત્યા ગયા શુક્રવારે (12ડિસેમ્બર) ઢાકામાં ચૂંટણી પ્રચાર દરમિયાન માસ્ક પહેરેલા હુમલાખોરો દ્વારા કરવામાં આવી હતી. તેમને માથામાં ગોળી મારવામાં આવી હતી. અદ્યતન સારવાર માટે તેમને સિંગાપોર લઈ જવામાં આવ્યા હતા, જ્યાં લાઇફ સપોર્ટ પર છ દિવસ રહ્યા બાદ 18 ડિસેમ્બરે તેમનું મૃત્યુ થયું.
આગથી ધુમાડાના ગોટેગોટા ફેલાયા
હાદીના મૃત્યુના સમાચાર બાદ ગુસ્સે ભરાયેલા વિરોધકર્તાઓએ મધ્યરાત્રિએ ઢાકાના કરવાન બજાર વિસ્તારમાં હુમલા કર્યા. પહેલો હુમલો બંગાળી અખબાર પ્રથમ આલોની કચેરી પર થયો, જ્યાં ટોળાએ સૂત્રોચ્ચાર કરતાં ઘૂસીને તોડફોડ કરી અને આગ લગાવી દીધી. ત્યારબાદ ડેઇલી સ્ટારની કચેરી પર હુમલો કરવામાં આવ્યો, જ્યાં પણ તોડફોડ અને આગચંપી કરવામાં આવી. આ આગથી ધુમાડાના ગોટેગોટા ફેલાયા હતા અને અનેક પત્રકારો કલાકો સુધી કચેરીમાં ફસાયેલા રહ્યા. છેવટે ફાયર બ્રિગેડ અને સુરક્ષા દળોએ તેમને બચાવ્યા.
અન્ય શહેરોમાં પણ હિંસા
સોશિયલ મીડિયા પર વાયરલ થયેલા વીડિયોમાં વરિષ્ઠ પત્રકાર નુરુલ કબીરને વાળ પકડીને માર મારતા ટોળાના દૃશ્યો જોવા મળ્યા છે. ફાયર સર્વિસને પણ ટોળાએ અટકાવી હોવાના અહેવાલ છે. ચિત્તાગોંગ સહિત અન્ય શહેરોમાં પણ હિંસાના સમાચાર છે. વચગાળાના વડા મુહમ્મદ યુનુસે હાદીના મૃત્યુને રાષ્ટ્રીય નુકસાન ગણાવ્યું છે અને શનિવારે રાષ્ટ્રીય શોક જાહેર કર્યો છે.આ ઘટનાઓથી બાંગ્લાદેશમાં પત્રકારોની સુરક્ષા અને ચૂંટણી પ્રક્રિયા પર ગંભીર સવાલો ઊભા થયા છે.
