કેનેડાના નવા વડાપ્રધાન માર્ક કાર્ની : શપથ લેતા જ ટ્રમ્પ પર શાબ્દિક વાર

કેનેડામાં તખ્તાપલટ થઈ ગઈ છે. માર્ક કાર્નીએ શુક્રવારે (14 માર્ચ) કેનેડાના વડા પ્રધાન તરીકે શપથ લેતા જ યુએસ પ્રમુખ ડોનાલ્ડ ટ્રમ્પના નિર્ણયો અને નિવેદનોની ટીકા કરી હતી, જેના કારણે બંને દેશો વચ્ચે મતભેદ હવે ઉભરીને આવ્યા છે. ટ્રમ્પે કેનેડાને અમેરિકાનું 51મું રાજ્ય બનાવવાનું વચન આપ્યું છે. જ્યારે કાર્નીનું કહેવું છે કે કેનેડા ક્યારેય અમેરિકાનો ભાગ નહીં બને.

માર્ક કાર્ની કેનેડાના 24મા વડાપ્રધાન છે. ટ્રમ્પના સત્તામાં પાછા ફર્યા બાદ અમેરિકા સાથેના બગડતા સંબંધો વચ્ચે તેમને કેનેડાની કમાન સોંપવામાં આવી છે. કાર્ની જસ્ટિન ટ્રુડોની જગ્યા લેશે, જેઓ 10 વર્ષથી વડાપ્રધાન છે.

કાર્નીએ અગાઉ બેન્ક ઓફ કેનેડા અને બેન્ક ઓફ ઈંગ્લેન્ડના ગવર્નર તરીકે સેવા આપી હતી. તેઓ કેનેડાની સંસદના સભ્ય નથી, ન તો તેમણે અગાઉ રાજકારણમાં પ્રવેશ કર્યો છે. આમ છતાં, એક અઠવાડિયા કરતાં પણ ઓછા સમયમાં, તેમણે વડા પ્રધાનની સ્પર્ધામાં કેનેડાના પીઢ નેતાઓને હરાવ્યા હતા.

તમે ટ્રમ્પને ક્યારે મળશો?
માર્ક કાર્નીનો શપથ ગ્રહણ સમારોહ રાજધાની ઓટ્ટાવાના રાઇડો હોલમાં યોજાયો હતો. આ પછી તેઓ હોલમાંથી બહાર આવ્યા અને લોકોને સંબોધન કર્યું હતું. ડોનાલ્ડ ટ્રમ્પ દ્વારા જોડાણની ધમકીઓને નકારી કાઢતાં તેમણે કહ્યું, "કેનેડા મૂળભૂત રીતે એક અલગ દેશ છે. તેમણે એમ પણ કહ્યું કે કેનેડા અમેરિકા પાસેથી આદરની અપેક્ષા રાખે છે. કોર્નિને કહ્યું કે તેઓ ડોનાલ્ડ ટ્રમ્પને ત્યારે જ મળશે જ્યારે તેઓ કેનેડાની સાર્વભૌમત્વનું સન્માન કરશે. તેમણે એવી આશા પણ વ્યક્ત કરી હતી કે તેમની સરકાર ટ્રમ્પ વહીવટીતંત્ર સાથે કામ કરવાના માર્ગો શોધી શકે છે.

કાર્નીએ યુએસ સેક્રેટરી ઓફ સ્ટેટ માર્કો રુબિયોની તાજેતરની ટિપ્પણીઓનો પણ જવાબ આપ્યો હતો. માર્કો રુબિયોએ શુક્રવારે સવારે કહ્યું હતું કે જો કેનેડા અમેરિકાનું 51મું રાજ્ય બનશે તો તે આર્થિક રીતે મજબૂત બનશે. કાર્નીએ કહ્યું, "આવા નિવેદનો ઉન્મત્ત છે. એટલું જ અમે કહી શકીએ છીએ '.