Bhavnagar News: એક તરફ સમગ્ર ગુજરાતમાં ચૂંટણીનો માહોલ જામ્યો છે અને પોલીસ તંત્ર ચુસ્ત બંદોબસ્તમાં વ્યસ્ત છે, ત્યારે ભાવનગર જિલ્લાના મહુવા શહેરમાંથી હત્યાની એક સનસનાટીભરી ઘટના સામે આવી છે. શહેરના ભરચક ગણાતા એસ.ટી. સ્ટેન્ડ પાસે એક ૨૬ વર્ષીય યુવાનની અંગત અદાવતમાં હત્યા કરી દેવામાં આવતા સમગ્ર પંથકમાં ચકચાર મચી ગઈ છે.
જાહેરમાં છરીના ઘા ઝીંકી ખેલાયો ખૂની ખેલ
મળતી માહિતી મુજબ, મહુવા ટાઉન પોલીસ સ્ટેશન વિસ્તારમાં આવેલા એસ.ટી. સ્ટેન્ડ પાસે આ લોહિયાળ ઘટના બની હતી. એક જ સમાજના શખ્સો વચ્ચે લાંબા સમયથી ચાલી આવતી અંગત અદાવતે ઉગ્ર સ્વરૂપ ધારણ કર્યું હતું. હુમલાખોરોએ તિક્ષ્ણ હથિયાર (છરી) વડે યુવાન પર આડેધડ ઘા ઝીંકી તેને લોહીલુહાણ કરી દીધો હતો. ગંભીર ઈજાઓના કારણે યુવાનનું ઘટનાસ્થળે જ કરુણ મોત નીપજ્યું હતું.
મૃતકની ઓળખ
પોલીસ તપાસમાં જાણવા મળ્યું છે કે મૃતક યુવાનનું નામ સમીરભાઈ સાલેભાઈ યફાઈ (ઉંમર ૨૬ વર્ષ) છે. તે મહુવા શહેરનો જ રહેવાસી હતો. આશાસ્પદ યુવાનની હત્યાથી તેના પરિવારમાં શોકનું મોજું ફરી વળ્યું છે.
ચૂંટણી બંદોબસ્ત વચ્ચે પોલીસ સામે પડકાર
હાલમાં ચૂંટણીના કારણે ચારેબાજુ પોલીસનો પહેરો છે અને સુરક્ષા વ્યવસ્થા સઘન બનાવવામાં આવી છે. આવા સમયે જાહેરમાં હત્યાનો બનાવ સામે આવતા કાયદો અને વ્યવસ્થાની સ્થિતિ સામે સવાલો ઉભા થયા છે. ઘટનાની જાણ થતા જ મહુવા ટાઉન પોલીસ કાફલો ઘટનાસ્થળે દોડી ગયો હતો અને મૃતદેહને પીએમ અર્થે ખસેડી આગળની કાયદેસરની કાર્યવાહી હાથ ધરી છે.
આ પણ વાંચો:“ચૂંટણીને ધાર્મિક રંગ આપવાનો પ્રયાસ” : ઇમરાન ખેડાવાલાના આક્ષેપો પર હર્ષ સંઘવીનો પ્રહાર
દિવસદહાડે શહેરના મુખ્ય વિસ્તારમાં થયેલી આ હત્યાને કારણે મહુવા શહેર અને આસપાસના ગ્રામ્ય વિસ્તારોના સામાન્ય નાગરિકોમાં ભારે ફફડાટ અને ભયનો માહોલ જોવા મળી રહ્યો છે. હાલ પોલીસે ગુનો નોંધીને ફરાર આરોપીઓને ઝડપી પાડવા માટે અલગ-અલગ ટીમો બનાવી તપાસના ચક્રો ગતિમાન કર્યા છે.
