Maharashtra TET Paper Leak: મહારાષ્ટ્રમાં શિક્ષક ભરતી માટે લેવાતી Teacher Eligibility Test (TET)ની પરીક્ષાના પેપર લીક કેસમાં ખાસ તપાસ ટીમ (SIT)ને મહત્વપૂર્ણ સફળતા મળી છે. લાંબા સમયથી ફરાર રહેલા આ સમગ્ર કૌભાંડના કથિત માસ્ટરમાઇન્ડ બિજેન્દ્ર કુમાર ગુપ્તાની બિહારથી ધરપકડ કરવામાં આવી છે. તપાસમાં સામે આવેલા ખુલાસાઓએ પરીક્ષા પ્રણાલીની સુરક્ષા વ્યવસ્થા અંગે ગંભીર સવાલો ઉભા કર્યા છે. પોલીસ તપાસ અનુસાર, આરોપીએ પ્રિન્ટિંગ હાઉસમાં કામ કરતા કેટલાક કર્મચારીઓને આર્થિક લાલચ આપીને પરીક્ષાનું ગોપનીય પ્રશ્નપત્ર બહાર કાઢવાનું કાવતરું ઘડ્યું હતું. સૌથી ચોંકાવનારી વાત એ છે કે પ્રશ્નપત્રને જૂતાની અંદર છુપાવીને પ્રિન્ટિંગ પ્રેસની બહાર લઈ જવામાં આવ્યું હતું. ત્યારબાદ આ પ્રશ્નપત્ર આશરે રૂ.1.5 કરોડમાં વેચવાની યોજના બનાવવામાં આવી હતી.
ગ્રાહક બનીને SITએ ગોઠવ્યું સ્ટિંગ ઓપરેશન
તપાસ દરમિયાન SITએ આરોપીઓને રંગેહાથ ઝડપવા માટે ખાસ વ્યૂહરચના અપનાવી હતી. પોલીસે સંભવિત ખરીદદાર તરીકે પોતાની ઓળખ આપી આરોપીઓ સાથે સંપર્ક સાધ્યો હતો. આ સ્ટિંગ ઓપરેશન દરમિયાન આરોપીઓની હિલચાલ અને સોદાની સમગ્ર માહિતી એકત્રિત કરવામાં આવી હતી. પૂરતા પુરાવા મળ્યા બાદ પોલીસે કાર્યવાહી કરીને મુખ્ય આરોપી સહિત અન્ય સંડોવાયેલા લોકો સુધી પહોંચવામાં સફળતા મેળવી. તપાસ અધિકારીઓના જણાવ્યા અનુસાર, બિજેન્દ્ર કુમાર ગુપ્તા સમગ્ર નેટવર્કનું સંકલન કરતો હતો. પેપર બહાર કાઢવાથી લઈને સંભવિત ખરીદદારો સુધી પહોંચાડવાની સમગ્ર યોજના તેના માર્ગદર્શન હેઠળ અમલમાં મુકાઈ હોવાનું પ્રાથમિક તપાસમાં સામે આવ્યું છે.
આ પણ વાંચો: '11 કિલો વજન ઘટ્યું, શરીર તૂટી ગયું...' : ટ્રોલર્સને સોનમ વાંગચુકનો કરારો જવાબ
પ્રિન્ટિંગ હાઉસમાંથી જ શરૂ થયું કૌભાંડ
તપાસમાં ખુલ્યું છે કે, પ્રશ્નપત્ર છપાતું હતું તે પ્રિન્ટિંગ હાઉસમાંથી જ પેપર લીક કરવાની યોજના ઘડવામાં આવી હતી. કેટલાક કર્મચારીઓને મોટી રકમ આપવાનું વચન આપીને તેઓને આ ગુનામાં સામેલ કરવામાં આવ્યા હતા. પ્રશ્નપત્રની નકલ સુરક્ષા વ્યવસ્થાને ચકમો આપી બહાર લાવવામાં આવી હતી, જેથી પરીક્ષા પહેલાં જ તે બજારમાં વેચી શકાય. આ સમગ્ર ઘટનાએ પરીક્ષાના પ્રશ્નપત્રોના પ્રિન્ટિંગ, સંગ્રહ અને પરિવહન દરમિયાન અમલમાં રહેલી સુરક્ષા વ્યવસ્થાની અસરકારકતા પર ગંભીર પ્રશ્નો ઊભા કર્યા છે. તપાસ એજન્સીઓ હવે આ નેટવર્ક સાથે જોડાયેલા અન્ય લોકોની ભૂમિકા પણ ચકાસી રહી છે.
બિહાર અને પંજાબ સુધી ફેલાયેલું હતું નેટવર્ક
મહારાષ્ટ્ર પોલીસની તપાસમાં જાણવા મળ્યું છે કે આ પેપર લીક રેકેટ માત્ર એક રાજ્ય પૂરતું મર્યાદિત નહોતું. તેની કડીઓ બિહાર અને પંજાબ સુધી ફેલાયેલી હતી. અત્યાર સુધીમાં આ કેસમાં કુલ 13 આરોપીઓની ધરપકડ કરવામાં આવી છે. પોલીસે માનવું છે કે હજુ કેટલાક લોકો તપાસના દાયરામાં છે અને આગામી દિવસોમાં વધુ ધરપકડ થઈ શકે છે. તપાસ દરમિયાન આરોપીઓના મોબાઇલ ફોન, ડિજિટલ ડેટા અને નાણાકીય વ્યવહારોની પણ તપાસ કરવામાં આવી રહી છે. તેના આધારે આ ગેરકાયદેસર નેટવર્કમાં અન્ય કોણ-કોણ સામેલ હતું અને કેટલા ઉમેદવારો સુધી પ્રશ્નપત્ર પહોંચાડવાનો પ્રયાસ થયો હતો તેની માહિતી મેળવવાનો પ્રયાસ થઈ રહ્યો છે.
આ પણ વાંચો: NTAને વધુ મજબૂત બનાવવા કેન્દ્ર સરકારનો મોટો નિર્ણય : GM સ્તરના 4 સિનિયર અધિકારીઓની થશે નિમણૂક
પરીક્ષા પ્રણાલીની વિશ્વસનીયતા પર ફરી સવાલ
છેલ્લાં કેટલાક વર્ષોમાં દેશના વિવિધ રાજ્યોમાં સ્પર્ધાત્મક પરીક્ષાઓના પેપર લીકની ઘટનાઓ વારંવાર સામે આવી રહી છે. આવી ઘટનાઓ લાખો મહેનતુ ઉમેદવારોના ભવિષ્ય સાથે સીધી રીતે જોડાયેલી હોવાથી તેની અસર માત્ર પરીક્ષા સુધી મર્યાદિત રહેતી નથી, પરંતુ સમગ્ર ભરતી પ્રક્રિયાની વિશ્વસનીયતા પર પણ અસર કરે છે. મહારાષ્ટ્ર TET પેપર લીક કેસમાં થયેલી આ કાર્યવાહી તપાસ એજન્સીઓ માટે મહત્વપૂર્ણ સફળતા માનવામાં આવી રહી છે. જોકે, તપાસ હજુ ચાલુ હોવાથી પોલીસ હવે આ સમગ્ર કૌભાંડના નાણાકીય વ્યવહારો, અન્ય સંભવિત માસ્ટરમાઇન્ડ અને લાભાર્થીઓ સુધી પહોંચવાનો પ્રયાસ કરી રહી છે. અધિકારીઓનું કહેવું છે કે કેસ સાથે જોડાયેલા દરેક વ્યક્તિ સામે કાયદેસરની કાર્યવાહી કરવામાં આવશે અને સમગ્ર નેટવર્કનો પર્દાફાશ કરવામાં આવશે.
