ઉદ્ધવ અને રાજ ઠાકરે કરશે મહારાષ્ટ્રની રાજનીતિના નવા અધ્યાયની શરૂઆત : ફરી ધુણ્યું ભાષાવાદનું ભૂત! બે દાયકા બાદ એક સાથે એક મંચ પર જોવા મળશે બન્ને ભાઈઓ

Uddhav Thackeray Raj Thackeray Rally: મહારાષ્ટ્રમાં ફરી ધુણ્યું છે ભાષાવાદનું ભૂત. મરાઠી નહીં બોલનાર વેપારીઓ, દુકાનદારોને મહારાષ્ટ્રમાં હેરાન કરવામાં આવે છે. આ સ્થિતિની વચ્ચે ભાષાવાદ પર મહારાષ્ટ્રમાં રાજકારણ પણ ગરમાયું છે. ત્યારે મહારાષ્ટ્રના પૂર્વ મુખ્યમંત્રી ઉદ્ધવ ઠાકરે અને મહારાષ્ટ્ર નવનિર્માણ સેના એટલેકે, મનસે પ્રમુખ રાજ ઠાકરે લાંબા સમય બાદ એક મંચ પર સાથે જોવા મળશે. 5 જુલાઈના રોજ યોજાનારી રેલીમાં મોટી સંખ્યામાં બન્નેના સમર્થકો પણ હાજર રહેશે. ત્યારે આ પહેલાં બન્ને ભાઈઓએ આજે સંયુક્ત સંદેશો જાહેર કરીને 5 જુલાઈની વિજય રેલીનું આહવાન કરવાનું આહ્વાન કર્યું. લગભગ 20 વર્ષના લાંબા અંતરાલ બાદ બન્ને ભાઈઓ એક સાથે એક જ મંચ પર જોવા મળશે.

ઠાકરે ભાઈઓની વિજય રેલી:
મહારાષ્ટ્રના રાજકારણમાં એક અનોખો દાખલો સ્થાપિત થયો છે, જ્યાં શિવસેના (યુબીટી)ના નેતા ઉદ્ધવ ઠાકરે અને મહારાષ્ટ્ર નવનિર્માણ સેના (એમએનએસ)ના અધ્યક્ષ રાજ ઠાકરે લગભગ 20 વર્ષ બાદ એક મંચ પર એકસાથે જોવા મળશે. આ બંને ભાઈઓએ 5 જુલાઈએ મુંબઈમાં એક વિજય રેલીનું આયોજન કર્યું છે, જે મહારાષ્ટ્ર સરકાર દ્વારા શાળાઓમાં હિન્દી ભાષાને ફરજિયાત કરવાના નિર્ણયને પાછો ખેંચવાની ઉજવણી તરીકે યોજાશે. ઉદ્ધવ ઠાકરે અને રાજ ઠાકરેએ સંયુક્ત રીતે મહારાષ્ટ્રની શાળાઓમાં હિંદી ભાષાને લઈને થતાં વિવાદ અંગે કહ્યું હતુંકે, "મરાઠી માતાઓ, બહેનો અને ભાઈઓ, શું સરકારને જુકાવી છે? તો હાં આપણે સરકારને ઝુકાવી છે. અને સરકારને કોણે જુકાવી છે તો તમે બધાએ સાથે મળીને સરકારને જુકાવી છે. મરાઠી જનતાએ સરકારને જુકાવી છે. અમે તો માત્ર તમારા વતીથી સરકાર સામે સંઘર્ષ કરીએ છીએ."

महाराष्ट्राच्या शत्रूंना आणि मराठीच्या मारेकऱ्यांना आव्हान आणि आवाज देणारी घडामोड!
यावे
जागराला यावे…
⁦@Dev_Fadnavis⁩
⁦@AmitShah⁩
⁦@narendramodi⁩
⁦@mieknathshinde⁩ pic.twitter.com/zWPWPOUB9U

— Sanjay Raut (@rautsanjay61) July 1, 2025

હિન્દી ભાષા વિવાદનો પ્રારંભઃ
17 જૂન, 2025ના રોજ મહારાષ્ટ્રની દેવેન્દ્ર ફડણવીસ સરકારે એક આદેશ જાહેર કર્યો હતો, જેમાં જણાવાયું હતું કે મરાઠી અને અંગ્રેજી માધ્યમની શાળાઓમાં ધોરણ 1 થી 5 સુધીના વિદ્યાર્થીઓ માટે હિન્દી ભાષા સામાન્ય રીતે ત્રીજી ભાષા તરીકે શીખવવામાં આવશે. આ નિર્ણયનો વિપક્ષી પક્ષોએ તીવ્ર વિરોધ કર્યો હતો. ઉદ્ધવ ઠાકરે અને રાજ ઠાકરેએ આ નિર્ણયને મરાઠી ભાષા અને સંસ્કૃતિ પરના હુમલા તરીકે જોઈને 5 જુલાઈએ વિરોધ રેલીનું આયોજન કર્યું હતું.

સરકારનો યૂ-ટર્ન અને વિજયની ઉજવણીઃ
વિપક્ષના તીવ્ર વિરોધ અને મરાઠી જનતાના દબાણને કારણે, 29 જૂન, 2025ના રોજ મહારાષ્ટ્ર સરકારે આ વિવાદાસ્પદ નિર્ણયને પાછો ખેંચવાની જાહેરાત કરી. મુખ્યમંત્રી દેવેન્દ્ર ફડણવીસ, નાયબ મુખ્યમંત્રી એકનાથ શિંદે અને અજિત પવારે એક પ્રેસ કોન્ફરન્સમાં આ નિર્ણય રદ કરવાની જાહેરાત કરી હતી. આ નિર્ણયને ઉદ્ધવ અને રાજ ઠાકરેએ મરાઠી જનતાની એકતાની જીત તરીકે આવકાર્યો.

આ જીતની ઉજવણી માટે, બંને નેતાઓએ 5 જુલાઈની રેલીને વિરોધ રેલીથી વિજય રેલીમાં ફેરવવાનો નિર્ણય કર્યો. શિવસેના (યુબીટી)ના સાંસદ સંજય રાઉતે એક્સ પર શેર કરેલા સંદેશમાં ઉદ્ધવ અને રાજ ઠાકરેએ મરાઠી માતાઓ, બહેનો અને ભાઈઓને આ જીતની ઉજવણી માટે ગુલાલ ઉડાડીને અને બાજે-ગાજે સાથે રેલીમાં જોડાવા આહ્વાન કર્યું.

રેલીનું આયોજન અને મરાઠી એકતાઃ
આ વિજય રેલીમાં કોઈ પણ પક્ષનો ઝંડો નહીં હોય, એમ બંને પક્ષોએ જણાવ્યું છે. આ રેલીનો એકમાત્ર હેતુ મરાઠી ભાષા અને ઓળખની રક્ષા અને ઉજવણી કરવાનો છે. રાજ ઠાકરેએ આ રેલીને 1960ના સંયુક્ત મહારાષ્ટ્ર આંદોલન સાથે સરખાવી, જણાવ્યું કે આ રેલી મરાઠી જનતાની શક્તિનું પ્રતીક બનશે.

ઉદ્ધવ ઠાકરેએ ભાજપ પર આરોપ લગાવ્યો કે તેઓ આ નિર્ણય દ્વારા મરાઠી લોકોને વિભાજિત કરવાનો પ્રયાસ કરી રહ્યા હતા, પરંતુ મરાઠી જનતાની એકતાએ તેમની આ યોજનાને નિષ્ફળ કરી. તેમણે એમ પણ જણાવ્યું કે આ રેલી ફક્ત એક ઉજવણી નથી, પરંતુ મરાઠી ઓળખને મજબૂત કરવાનો એક પ્રયાસ છે.

રાજકીય પરિણામો અને ભવિષ્યઃ
આ રેલી ન માત્ર મરાઠી એકતાનું પ્રતીક છે, પરંતુ તેનાથી મહારાષ્ટ્રના રાજકારણમાં પણ મોટો ફેરફાર આવી શકે છે. બૃહન્મુંબઈ મહાનગરપાલિકા (બીએમસી)ની ચૂંટણીઓ નજીક આવી રહી છે, અને આ રેલી ઉદ્ધવ અને રાજ ઠાકરેની રાજકીય શક્તિને ફરીથી સ્થાપિત કરવાનો એક મંચ બની શકે છે. ઘણા નિષ્ણાતો માને છે કે ઠાકરે પરિવારનું આ એકતા પ્રદર્શન શિવસેનાના પરંપરાગત મતદારોને ફરીથી એકજૂટ કરી શકે છે. આ ઉપરાંત, એનસીપી (શરદ પવાર જૂથ)ના નેતા શરદ પવારે પણ આ નિર્ણયનો વિરોધ કર્યો હતો અને ઠાકરે ભાઈઓના વિરોધને સમર્થન આપ્યું હતું. આ રેલીમાં અન્ય રાજકીય પક્ષોની સહભાગિતા પણ મરાઠી એકતાને વધુ મજબૂત કરશે.

ઉદ્ધવ અને રાજ ઠાકરેની આ વિજય રેલી મહારાષ્ટ્રના રાજકારણમાં એક નવો અધ્યાય શરૂ કરી શકે છે. આ રેલી ફક્ત હિન્દી ભાષાના ફરજિયાત નિર્ણયને રદ કરવાની ઉજવણી નથી, પરંતુ મરાઠી ભાષા અને સંસ્કૃતિની શક્તિ અને એકતાનું પ્રતીક છે. 5 જુલાઈએ મુંબઈની શેરીઓમાં ગુલાલ ઉડશે અને મરાઠી માણસની એકતા દેશભરમાં એક સંદેશ આપશે.