નવા વર્ષમાં રજાઓની થશે રમઝટ! : વર્ષ 2026નું આખું 'લોન્ગ વીકેન્ડ કેલેન્ડર'

જે લોકો ફરવાના શોખીન છે અને એડવાન્સમાં ટ્રિપ પ્લાન કરવાનું પસંદ કરે છે, તેમના માટે વર્ષ 2026 એક મોટી ભેટ લઈને આવી રહ્યું છે. નવા વર્ષમાં અનેક મોટા તહેવારો અને સરકારી રજાઓ વીકેન્ડની આસપાસ આવી રહી છે. આનો અર્થ એ છે કે સ્માર્ટ પ્લાનિંગ દ્વારા તમે ઓફિસમાંથી ઓછી રજા લઈને લાંબા વેકેશનનો આનંદ માણી શકશો. જાન્યુઆરીના પ્રથમ સપ્તાહથી લઈને ડિસેમ્બરના અંત સુધી, વર્ષ 2026માં અનેકવાર લોન્ગ વીકેન્ડની તક મળશે.

જાન્યુઆરી 2026: વર્ષની ધમાકેદાર શરૂઆત

વર્ષની શરૂઆત જ પ્રવાસીઓ માટે ખુશખબરી લઈને આવશે. 1 જાન્યુઆરી ગુરુવારે છે, તેથી જો તમે 2 જાન્યુઆરી શુક્રવારની એક રજા લો, તો 1 થી 4 જાન્યુઆરી સુધી સતત 4 દિવસનું વેકેશન માણી શકાય છે. આ ઉપરાંત, મહિનાના અંતમાં વસંત પંચમી અને પ્રજાસત્તાક દિવસ (Republic Day) એકસાથે આવી રહ્યા છે. 23 અને 24 જાન્યુઆરીની રજાનું આયોજન કરીને તમે 23 થી 26 જાન્યુઆરી સુધી વધુ એક 4 દિવસનો લોન્ગ વીકેન્ડ મેળવી શકો છો.

માર્ચ થી જૂન: તહેવારો અને રજાઓનો સંગમ

• માર્ચ-એપ્રિલ: માર્ચમાં હોળીના તહેવારને વીકેન્ડ સાથે જોડી શકાય છે. જ્યારે 3 એપ્રિલે 'ગુડ ફ્રાઈડે' હોવાથી કોઈપણ વધારાની રજા વગર 3 દિવસનું આરામદાયક વીકેન્ડ મળશે.

• મે 2026: મે મહિનાની શરૂઆતમાં જ બુદ્ધ પૂર્ણિમા શુક્રવારે છે, જે સતત 3 દિવસની રજાની તક આપશે. જે લોકો ઉનાળામાં ઠંડા સ્થળોએ જવા માંગતા હોય તેમના માટે આ શ્રેષ્ઠ સમય છે.

• જૂન 2026: જૂનના અંતમાં મોહરમની રજા હોવાથી વધુ એક લોન્ગ વીકેન્ડ મળવાની આશા છે, જે ચોમાસાની શરૂઆત પહેલાં નાનકડી ટ્રિપ માટે યોગ્ય રહેશે.

ઓગસ્ટ થી ઓક્ટોબર: તહેવારોની મોસમ

ઓગસ્ટના અંતથી જ તહેવારોનો માહોલ જામશે. 28 ઓગસ્ટે રક્ષાબંધન અને 4 સપ્ટેમ્બરે જન્માષ્ટમી વીકેન્ડની નજીક હોવાથી 3 દિવસનું પ્લાનિંગ સરળ બનશે. સપ્ટેમ્બરમાં 14 તારીખે ગણેશ ચતુર્થી પણ વીકેન્ડ સાથે મળીને રજાની શાનદાર તક આપશે.

ઓક્ટોબર મહિનો રજાઓથી ભરપૂર રહેશે. 2 ઓક્ટોબર ગાંધી જયંતી શુક્રવારે હોવાથી મહિનાની શરૂઆત જ 3 દિવસના લોન્ગ વીકેન્ડથી થશે. ત્યારબાદ દશેરા અને વાલ્મીકિ જયંતી જેવા તહેવારો પણ લાંબી રજાઓની તક પૂરી પાડશે.

નવેમ્બર-ડિસેમ્બર: વર્ષનો શાનદાર અંત

વર્ષના અંતિમ મહિનાઓમાં દિવાળી અને ગોવર્ધન પૂજા વીકેન્ડની આસપાસ હોવાથી તહેવારોની મજા બમણી થઈ જશે. વર્ષનો અંત પણ રજાઓ સાથે થશે, કારણ કે 25 ડિસેમ્બર નાતાલ (Christmas) શુક્રવારે છે. આમ, ડિસેમ્બરના અંતમાં ફરીથી 3 દિવસનો લોન્ગ વીકેન્ડ મળશે, જે વર્ષ 2026ને યાદગાર વિદાય આપવા માટે પૂરતો છે.