બ્રિટનની રાજધાની લંડનમાં ભારતીય મૂળના એક યુવકની કરપીણ હત્યાની ઘટનાએ ભારતીય સમુદાયમાં શોકની લાગણી ફેલાવી છે. લંડનના જાણીતા સાઉથોલ વિસ્તારમાં 26 વર્ષીય ગુરભેજ સિંહ પર જીવલેણ ચપ્પુ હુમલો કરવામાં આવ્યો હતો, જેમાં તેનું ઘટનાસ્થળે જ મોત નીપજ્યું હતું. આ ઘટના બાદ લંડનની મેટ્રોપોલિટન પોલીસે હત્યાનો ગુનો નોંધીને વ્યાપક તપાસ શરૂ કરી છે.
ગુરભેજ સિંહ મૂળ પંજાબના તરનતારન જિલ્લાના ખેમકરણ નજીકના ગામનો રહેવાસી હોવાનું સામે આવ્યું છે. પરિવારજનોના જણાવ્યા મુજબ તે આશરે ચાર વર્ષ પહેલાં વધુ સારા ભવિષ્ય અને રોજગારીની તકો માટે બ્રિટન ગયો હતો. તેના અચાનક અને હિંસક મોતના સમાચાર મળતા જ પરિવારજનો અને ગામમાં શોકનો માહોલ છવાઈ ગયો છે.
મધ્યરાત્રિએ દુકાનની બહાર થયો હુમલો
પ્રાપ્ત વિગતો અનુસાર આ ઘટના બુધવારે મધરાતે આશરે 12:30 વાગ્યાની આસપાસ બની હતી. સાઉથોલ વિસ્તારમાં આવેલા નોર્થ રોડ અને ડોર્મર્સ વેલ્સ લેનના જંક્શન નજીક એક દુકાનની બહાર ગુરભેજ સિંહ પર તીક્ષ્ણ હથિયાર વડે હુમલો કરવામાં આવ્યો હતો.
પ્રાથમિક માહિતી મુજબ હુમલો એટલો ગંભીર હતો કે ગુરભેજ સિંહને શરીરના વિવિધ ભાગોમાં ઊંડા ઘા વાગ્યા હતા. ઘટનામાં અન્ય એક 30 વર્ષીય વ્યક્તિ પણ ઘાયલ થયો હતો. તેને તાત્કાલિક હોસ્પિટલમાં દાખલ કરવામાં આવ્યો હતો, જ્યાં સારવાર બાદ તેને રજા આપી દેવામાં આવી હોવાનું જાણવા મળ્યું છે.
ઘટનાની જાણ થતાં જ લંડન એમ્બ્યુલન્સ સર્વિસ, પોલીસ અને પેરામેડિક્સની ટીમ તાત્કાલિક સ્થળ પર પહોંચી ગઈ હતી. તબીબોએ ગુરભેજ સિંહનો જીવ બચાવવા માટે તમામ શક્ય પ્રયાસો કર્યા હતા, પરંતુ ગંભીર ઇજાઓને કારણે તેને બચાવી શકાયો ન હતો. સ્થળ પર જ તેને મૃત જાહેર કરવામાં આવ્યો હતો.
આ પણ વાંચો: ગુજરાતભરની RTO કચેરીઓમાં અરજીઓનો ભરાવો : સારથી પોર્ટલમાં ટેક્નિકલ ખામીથી હજારો અરજદારો હેરાન
ભારતીય સમુદાયમાં શોકની લાગણી
સાઉથોલ વિસ્તાર બ્રિટનમાં ભારતીય અને ખાસ કરીને પંજાબી સમુદાયનું મહત્વપૂર્ણ કેન્દ્ર માનવામાં આવે છે. આ વિસ્તારમાં મોટી સંખ્યામાં ભારતીય મૂળના લોકો વસવાટ કરે છે. તેથી આ ઘટના સામે આવતા સ્થાનિક ભારતીય સમુદાયમાં ચિંતા અને દુઃખની લાગણી વ્યાપી ગઈ છે.
પરિવારના જણાવ્યા મુજબ ગુરભેજ સિંહ ત્રણ બહેનોનો એકમાત્ર ભાઈ હતો. પરિવાર માટે તે મુખ્ય આધારસ્તંભ સમાન હતો. તેના મોતના સમાચાર મળતા જ પંજાબ સ્થિત તેના ગામમાં પણ શોકનો માહોલ છવાઈ ગયો છે. સોશિયલ મીડિયા પર પણ અનેક લોકોએ શ્રદ્ધાંજલિ પાઠવી છે અને પરિવાર પ્રત્યે સંવેદના વ્યક્ત કરી છે.
7 લોકોની અટકાયત, પરંતુ તપાસ યથાવત
હત્યાની ઘટના બાદ મેટ્રોપોલિટન પોલીસે ઝડપી કાર્યવાહી હાથ ધરી હતી. પોલીસે 20થી 30 વર્ષની વયજૂથના સાત શંકાસ્પદ લોકોની હત્યાની શંકાના આધારે અટકાયત કરી હતી. જોકે, ડિટેક્ટિવ્સ દ્વારા કરાયેલી પ્રાથમિક પૂછપરછ અને તપાસ બાદ છ લોકોને કોઈપણ કાર્યવાહી વિના મુક્ત કરવામાં આવ્યા છે. જ્યારે સાતમા વ્યક્તિને જામીન પર મુક્ત કરવામાં આવ્યો છે અને તેને આગામી દિવસોમાં વધુ પૂછપરછ માટે ફરી બોલાવવામાં આવશે. પોલીસે સ્પષ્ટ કર્યું છે કે તપાસ હજુ પ્રારંભિક તબક્કામાં છે અને તમામ સંભવિત પાસાઓની ઝીણવટભરી તપાસ કરવામાં આવી રહી છે. હાલ હુમલાનું ચોક્કસ કારણ જાહેર કરવામાં આવ્યું નથી.
CCTV અને સાક્ષીઓની મદદ માગી
મેટ્રોપોલિટન પોલીસના સ્પેશિયાલિસ્ટ ક્રાઇમ કમાન્ડના ડિટેક્ટિવ ચીફ ઇન્સ્પેક્ટર એલિસન ફોક્સવેલે જણાવ્યું કે આ અત્યંત ગંભીર ઘટના છે અને તેની દરેક દિશામાં તપાસ કરવામાં આવી રહી છે. તેમણે સ્થાનિક નાગરિકોને તપાસમાં સહયોગ આપવા અપીલ કરી છે. પોલીસનું કહેવું છે કે ઘટના સમયે જે કોઈ વ્યક્તિ આસપાસ હાજર હોય અથવા જેમની પાસે નજીકના વિસ્તારના CCTV, મોબાઇલ વીડિયો કે ડૅશકેમ ફૂટેજ હોય તેઓએ તાત્કાલિક પોલીસનો સંપર્ક કરવો જોઈએ. પોલીસ અધિકારીઓનું માનવું છે કે આવા પુરાવા હુમલાખોરોની ઓળખ અને ઘટનાક્રમને સમજવામાં મહત્વની ભૂમિકા ભજવી શકે છે.
આ પણ વાંચો: રાજકોટના વિમલનગરમાં પરિવારિક ઝઘડાએ લીધો ભયાનક વળાંક! : જમાઈએ જ નાનાજી સસરાને છરીના ઘા ઝીંકી પતાવી દીધા
બ્રિટનમાં ચપ્પુ હુમલાની વધતી ઘટનાઓ ચિંતાજનક
છેલ્લા કેટલાક વર્ષોમાં બ્રિટનમાં ચપ્પુ હુમલાની ઘટનાઓને લઈને ગંભીર ચિંતા વ્યક્ત કરવામાં આવી રહી છે. ખાસ કરીને લંડનમાં યુવાનો વચ્ચેના હિંસક ગુનાઓ અને તીક્ષ્ણ હથિયારોના ઉપયોગમાં વધારો નોંધાયો છે. સરકાર અને કાયદા અમલીકરણ એજન્સીઓ આવા ગુનાઓને નિયંત્રણમાં લેવા માટે વિવિધ પગલાં લઈ રહી છે, છતાં સમયાંતરે આવી દુઃખદ ઘટનાઓ સામે આવતી રહે છે. ગુરભેજ સિંહની હત્યાએ ફરી એકવાર બ્રિટનમાં વધતી હિંસક ગુનાખોરી અને જાહેર સુરક્ષાના મુદ્દાને ચર્ચાના કેન્દ્રમાં લાવી દીધો છે.
હાલ પોલીસ દ્વારા તપાસ ચાલુ છે અને પરિવારને વિશેષ અધિકારીઓ દ્વારા કાનૂની તેમજ માનસિક સહાય પૂરી પાડવામાં આવી રહી છે. સમગ્ર ભારતીય સમુદાયની નજર હવે તપાસના પરિણામો અને આરોપીઓ સામે થનારી કાર્યવાહિ પર ટકેલી છે.
