"જન્મ તો મેં આપ્યો છે, પણ આ ટ્વીન્સ બાળકીઓ મારી નથી..." : એક માતાની કાળજું કંપાવી દેતી કહાની, શું છે સંભવિત IVF સ્કેમનો મામલો?

માતૃત્વ એ માત્ર એક સંબંધ નથી, પરંતુ નવ મહિના સુધી પોતાના શરીરમાં એક જીવને ઉછેરવાની, દરેક ધબકાર સાથે તેને જીવવાની અને જન્મ પછી તેને પોતાની દુનિયા બનાવી દેવાની લાગણી છે. પરંતુ કલ્પના કરો કે એક દિવસ તમને ખબર પડે કે જેને તમે જન્મ આપ્યો, જેને તમે પોતાની સંતાન માનીને ગળે લગાવ્યું, તે બાળક જૈવિક રીતે તમારું જ નથી!

ગુરુગ્રામની મીનૂ રાઠોડ માટે આ કોઈ ફિલ્મી કથા નથી, પરંતુ એક એવી હકીકત છે જેણે તેમના જીવનને હચમચાવી નાખ્યું છે. IVF સારવાર બાદ જન્મેલી તેમની જોડિયા દીકરીઓ અંગે DNA ટેસ્ટમાં થયેલા ખુલાસાએ માત્ર એક પરિવારને નહીં, પરંતુ સમગ્ર IVF સિસ્ટમને લઈને ગંભીર પ્રશ્નો ઉભા કર્યા છે.

ખુશીઓથી શરૂ થયેલી સફર અચાનક દુઃસ્વપ્નમાં ફેરવાઈ

જાન્યુઆરી 2026માં મીનૂ રાઠોડે જોડિયા દીકરીઓને જન્મ આપ્યો હતો. લાંબા સમયથી સંતાનની રાહ જોઈ રહેલા પરિવાર માટે આ ક્ષણ જીવનની સૌથી મોટી ખુશી હતી. ઘરમાં ઉજવણીનો માહોલ હતો, પરંતુ સમય જતાં એક એવી શંકાએ જન્મ લીધો જે આખરે ભયાનક સત્ય સુધી પહોંચી ગઈ.

મીનૂ અને તેમના પતિ રાહુલ રાઠોડને લાગવા લાગ્યું કે બંને બાળકીઓના ચહેરાના લક્ષણો પરિવાર સાથે મેળ ખાતા નથી. શરૂઆતમાં તેમણે આ વિચારને સામાન્ય ગણ્યો, પરંતુ મનમાં ઊભી થયેલી શંકા દૂર કરવા માટે DNA ટેસ્ટ કરાવવાનો નિર્ણય લીધો.

લંડનમાં ભારતીય મૂળના યુવકની ચપ્પુના ઘા ઝીંકી પતાવી દેવાયો: 7 શંકાસ્પદની કરાઈ અટકાયત

DNA રિપોર્ટમાં સામે આવ્યું ચોંકાવનારું સત્ય

દંપતીના જણાવ્યા અનુસાર DNA ટેસ્ટના પરિણામોએ તેમને સંપૂર્ણપણે તોડી નાખ્યા. રિપોર્ટમાં દર્શાવવામાં આવ્યું કે જન્મેલી જોડિયા દીકરીઓ જૈવિક રીતે રાહુલ અને મીનૂ રાઠોડની સંતાન નથી.

આ ખુલાસા બાદ એવી આશંકા વ્યક્ત કરવામાં આવી રહી છે કે IVF પ્રક્રિયા દરમિયાન ભ્રૂણની અદલાબદલી થઈ હોઈ શકે છે. એટલે કે મીનૂએ નવ મહિના સુધી જે બાળકીઓને પોતાના ગર્ભમાં ઉછેરી, તે કદાચ અન્ય કોઈ દંપતીના ભ્રૂણમાંથી જન્મેલી હોઈ શકે છે.

"મને મારું બાળક જોઈએ... અને કદાચ બીજી કોઈ મા પણ રડી રહી હશે"

આ સમગ્ર ઘટનાનો સૌથી કરુણ પાસો મીનૂ રાઠોડની માનસિક સ્થિતિ છે. એક તરફ તેમણે બાળકીઓને જન્મ આપ્યો છે, બીજી તરફ DNA રિપોર્ટ તેમને કહી રહ્યો છે કે આ બાળકીઓ તેમની જૈવિક સંતાન નથી.

મીનૂએ ભાવુક શબ્દોમાં કહ્યું હોવાનું જણાવાય છે કે તેઓ પોતાના અસલી બાળકને શોધવા માંગે છે. સાથે જ તેમને સતત એક વિચાર સતાવે છે કે જો તેમની સાથે આવું બન્યું છે, તો કદાચ બીજી કોઈ મા પણ પોતાના બાળક માટે તડપી રહી હશે.

આ શબ્દો માત્ર એક માતાની પીડા નથી, પરંતુ એવી સ્થિતિનું પ્રતિબિંબ છે જ્યાં મમતા અને સત્ય આમને-સામને ઊભાં છે.

નોઈડા ઈન્ટરનેશનલ એરપોર્ટનો ભવ્ય પ્રારંભ: પ્રથમ ફ્લાઇટ લખનઉ માટે થશે રવાના, જાણો કઈ તારીખ કરાઈ જાહેર

આખરે IVF સારવાર દરમિયાન શું થયું?

રાહુલ રાઠોડના જણાવ્યા અનુસાર તેઓ અને તેમની પત્ની સંતાનપ્રાપ્તિ માટે IVF સારવાર લઈ રહ્યા હતા. દંપતીનો દાવો છે કે તેમને ખાતરી આપવામાં આવી હતી કે સારવાર દરમિયાન તેમના જ સ્પર્મ અને એગનો ઉપયોગ કરીને ભ્રૂણ તૈયાર કરવામાં આવશે.

બાદમાં ભ્રૂણ ટ્રાન્સફર કરવામાં આવ્યું અને મીનૂ ગર્ભવતી બન્યા. બધું સામાન્ય રીતે આગળ વધતું રહ્યું અને અંતે જોડિયા દીકરીઓનો જન્મ થયો.

પરંતુ હવે DNA ટેસ્ટ બાદ દંપતીનો આરોપ છે કે સારવાર દરમિયાન કોઈ ગંભીર ભૂલ અથવા ગેરરીતિ થઈ હોઈ શકે છે. જોકે આ મામલે સંબંધિત ક્લિનિક અથવા હોસ્પિટલ તરફથી સત્તાવાર નિવેદન સામે આવ્યું નથી.

શું આ માત્ર ભૂલ છે કે કોઈ મોટું IVF સ્કેમ?

આ કેસ સામે આવ્યા બાદ અનેક સવાલો ઊભા થયા છે. શું આ માત્ર માનવીય ભૂલ છે? શું લેબોરેટરી સ્તરે કોઈ ગડબડ થઈ? કે પછી IVF પ્રક્રિયામાં કોઈ ગંભીર બેદરકારી થઈ છે?

મીનૂ રાઠોડે એવો પણ દાવો કર્યો છે કે તેમનો કેસ જાહેર થયા બાદ વિદેશમાં રહેતા કેટલાક દંપતીઓએ પણ તેમની સાથે સંપર્ક કર્યો છે અને સમાન પ્રકારના અનુભવો શેર કર્યા છે. જોકે આ દાવાઓની સ્વતંત્ર પુષ્ટિ થઈ નથી.

તેથી હાલમાં "IVF સ્કેમ" જેવી ચર્ચાઓ માત્ર આક્ષેપો અને આશંકાઓના આધારે જ ચાલી રહી છે. સત્ય શું છે તે તપાસ પૂર્ણ થયા બાદ જ સ્પષ્ટ થઈ શકશે.

'ઓપરેશન ટાઇગર'ની ચર્ચા વચ્ચે ઉદ્ધવ ઠાકરે એક્શનમાં: માતોશ્રી ખાતે તમામ સાંસદોની તાત્કાલિક બેઠક, મહારાષ્ટ્રની રાજનીતિમાં ફરી ગરમાવો

અદાલતની એન્ટ્રી, પોલીસ તપાસ શરૂ

મામલાની ગંભીરતાને ધ્યાનમાં રાખીને અદાલતે પોલીસને ફરિયાદ નોંધવા અને સમગ્ર ઘટનાની તપાસ કરવા સૂચના આપી હોવાનું જાણવા મળે છે.

દંપતીએ IVF સંબંધિત તમામ દસ્તાવેજો, લેબ રેકોર્ડ, ઇલેક્ટ્રોનિક ડેટા અને CCTV ફૂટેજ સુરક્ષિત રાખવાની માંગ કરી છે. તેમનું કહેવું છે કે માત્ર પારદર્શક તપાસથી જ સત્ય બહાર આવી શકે છે.