મધ્ય પૂર્વમાં ફરી એકવાર યુદ્ધની આગ વધુ ભડકી છે. ઈઝરાયલ અને હિઝબુલ્લાહ વચ્ચે થોડા સમય પહેલાં થયેલા યુદ્ધવિરામ બાદ હવે પરિસ્થિતિ ફરી ગંભીર બની ગઈ છે. ઈઝરાયલી સેનાએ દક્ષિણ લેબેનોનના વિશાળ વિસ્તારને “કોમ્બેટ ઝોન” જાહેર કરીને ત્યાં રહેતા નાગરિકોને તાત્કાલિક સ્થળ ખાલી કરવાનો આદેશ આપ્યો છે. આ નિર્ણય બાદ હજારો પરિવારો ફરીથી વિસ્થાપિત થવા મજબૂર બન્યા છે.
ઈઝરાયલી ડિફેન્સ ફોર્સ (IDF) દ્વારા જાહેર કરાયેલા આદેશ મુજબ, સરહદથી આશરે 40 કિલોમીટર સુધીના વિસ્તારોમાંથી લોકોને ઝહરાની નદીની ઉત્તરે ખસેડવામાં આવી રહ્યા છે. 17 એપ્રિલે યુદ્ધવિરામ લાગુ પડ્યા બાદ આ અત્યાર સુધીનું સૌથી મોટું ઇવેક્યુએશન ઓપરેશન ગણાઈ રહ્યું છે. અહેવાલો મુજબ, આ પગલાથી લેબેનોનના લગભગ 14 ટકા વિસ્તાર પર સીધી અસર પડી રહી છે.
સ્થાનિક અહેવાલો મુજબ, ઇઝરાયલી હુમલાઓ બાદ અનેક રહેણાંક મકાનો કાટમાળમાં ફેરવાઈ ગયા છે. અનેક વિસ્તારોમાં સતત એરસ્ટ્રાઇકના કારણે લોકો પોતાના ઘર, વાહનો અને રોજિંદા જીવનનો સામાન છોડીને સલામત વિસ્તારો તરફ ભાગી રહ્યા છે.
આ પણ વાંચો: 21મી સદીનું સૌથી લાંબું સૂર્યગ્રહણ : 6 મિનિટ સુધી છવાશે અંધકાર, જાણો ક્યાં અને ક્યારે થશે આ અદ્ભુત ઘટના
હિઝબુલ્લાહ સામે આક્રમક કાર્યવાહીનો ઈઝરાયલનો સંકેત
ઈઝરાયલે હિઝબુલ્લાહ પર વારંવાર યુદ્ધવિરામના ભંગનો આરોપ મૂકતા હવે વધુ આક્રમક સૈન્ય કાર્યવાહી કરવાની ચેતવણી આપી છે. ઇઝરાયલી સેનાના નિવેદન અનુસાર, દક્ષિણ લેબેનોનના કેટલાક વિસ્તારોમાં હિઝબુલ્લાહની સૈન્ય ગતિવિધિઓ વધતા ઓપરેશન વધુ તેજ કરવામાં આવ્યું છે.
ચેતવણી બાદ ઇઝરાયલે દક્ષિણ લેબેનોનના મહત્વના શહેર Tyre પર ભારે એરસ્ટ્રાઇક કરી હતી. હુમલાઓ બાદ સમગ્ર વિસ્તારમાં ભયનો માહોલ ફેલાઈ ગયો હતો. સ્થાનિક મીડિયા અહેવાલો મુજબ, માત્ર છેલ્લા 24 કલાકમાં જ ઇઝરાયલે વિસ્તાર ખાલી કરવા માટે નવ અલગ-અલગ ચેતવણીઓ જાહેર કરી છે.
હિઝબુલ્લાહે પણ દાવો કર્યો છે કે સરહદ નજીક આવેલા વિસ્તારોમાં તેમના લડવૈયાઓ ઇઝરાયલી સૈનિકો સામે સીધી અથડામણ કરી રહ્યા છે. સંગઠનના જણાવ્યા અનુસાર, ઝાવતાર અલ-શર્કિયા વિસ્તારમાં ભારે લડાઈ ચાલી રહી છે.
આ પણ વાંચો: કટ્ટરપંથીઓ સામે ઝૂકી પાકિસ્તાનની મરિયમ સરકાર : લાહોરના વિસ્તારોના જૂના નામ બદલવાનો નિર્ણય મોકૂફ
300થી વધુ ગામો પ્રભાવિત, માનવીય સંકટ વધુ ઊંડું
ઈઝરાયલના આદેશથી દક્ષિણ લેબેનોનના લગભગ 300થી વધુ નગરો અને ગામડાઓ સીધા પ્રભાવિત થયા છે. હજારો લોકો પોતાના ઘર છોડીને સલામત સ્થળોની શોધમાં છે. પરંતુ લેબેનોનની હાલની આર્થિક અને માનવીય સ્થિતિને કારણે વિસ્થાપિતો માટે પૂરતી વ્યવસ્થા ઉભી કરવી મુશ્કેલ બની રહી છે.
International Committee of the Red Crossના લેબેનોન પ્રમુખ એગ્નેસ ધુરે જણાવ્યું છે કે દક્ષિણ લેબેનોનની સ્થિતિ અત્યંત ગંભીર બની રહી છે. ખાસ કરીને કિનારાના શહેર Sidonમાં હવે વિસ્થાપિત પરિવારોને આશરો આપવા માટે પૂરતી જગ્યા ઉપલબ્ધ નથી. સ્થાનિક પ્રશાસન અને રાહત એજન્સીઓ લોકોને બેકા વેલી અને માઉન્ટ લેબેનોન તરફ ખસેડવાની અપીલ કરી રહી છે. પરંતુ સતત હુમલાઓ અને ભયના કારણે લોકો ભારે માનસિક દબાણ હેઠળ જીવી રહ્યા છે.
આ પણ વાંચો: શું AI નું જ ભવિષ્ય જોખમમાં? : અબજો ડોલરનું રોકાણ છતાં વિશ્વની દિગ્ગજ કંપનીઓ કેમ ઉઠાવી રહી છે સવાલ?
નેતન્યાહુએ ગ્રાઉન્ડ ઓપરેશન વધુ વિસ્તૃત કરવાની આપી ચેતવણી
ઈઝરાયલના વડાપ્રધાન Benjamin Netanyahuએ કેબિનેટ બેઠક દરમિયાન જણાવ્યું કે ઈઝરાયલી સેના હવે દક્ષિણ લેબેનોનમાં પહેલેથી કબજે કરેલા વિસ્તારોની બહાર પણ પોતાના ગ્રાઉન્ડ ઓપરેશનને વધુ વિસ્તૃત કરી રહી છે.
નેતન્યાહુએ કહ્યું કે ઈઝરાયલના ઉત્તરીય સમુદાયોની સુરક્ષા માટે સુરક્ષા ઝોનને વધુ મજબૂત અને વ્યાપક બનાવવામાં આવશે. તેમના નિવેદનથી સ્પષ્ટ થાય છે કે આગામી દિવસોમાં આ વિસ્તારમાં વધુ મોટું સૈન્ય અભિયાન શરૂ થઈ શકે છે.
રાજકીય નિષ્ણાતોના મત મુજબ, ઈઝરાયલ અને હિઝબુલ્લાહ વચ્ચે વધતી અથડામણો માત્ર લેબેનોન પૂરતી મર્યાદિત નહીં રહે, પરંતુ સમગ્ર મધ્ય પૂર્વમાં વધુ અસ્થિરતા ઊભી કરી શકે છે. અમેરિકા, ઈઝરાયલ અને ઈરાન વચ્ચે ચાલી રહેલી રાજદ્વારી ચર્ચાઓ પર પણ આ સંઘર્ષની સીધી અસર પડી રહી છે.
યુદ્ધના ભયાનક આંકડા
લેબેનોનના સ્વાસ્થ્ય મંત્રાલય અનુસાર, 2 માર્ચથી શરૂ થયેલા સંઘર્ષમાં અત્યાર સુધીમાં આશરે 3213 લોકોનાં મોત થયા છે. જેમાં નાગરિકો, મહિલાઓ અને બાળકોનો પણ સમાવેશ થાય છે. બીજી તરફ ઇઝરાયલના 23 સૈનિકો અને ચાર નાગરિકોના મોત નોંધાયા છે.
વિશ્વભરના માનવાધિકાર સંગઠનો અને સંયુક્ત રાષ્ટ્ર દ્વારા બંને પક્ષોને તાત્કાલિક યુદ્ધવિરામ અને નાગરિકોની સુરક્ષા સુનિશ્ચિત કરવાની અપીલ કરવામાં આવી રહી છે. જોકે હાલની સ્થિતિ જોતા યુદ્ધ વધુ ગંભીર દિશામાં આગળ વધી શકે તેવી આશંકા વ્યક્ત થઈ રહી છે.
