કચ્છ જિલ્લાના જખૌ નજીકથી એક શંકાસ્પદ સેટેલાઇટ-બેઝ્ડ ટ્રાન્સપોન્ડર મળી આવતા સુરક્ષા એજન્સીઓમાં ચિંતા અને સતર્કતા વધતી જોવા મળી રહી છે. સુલેમાનપીર ટાપુ વિસ્તારમાં ફૂટ પેટ્રોલિંગ દરમિયાન આ ઉપકરણ મળી આવ્યું હોવાનું જાણવા મળ્યું છે. પ્રાથમિક અનુમાન મુજબ આ ટ્રાન્સપોન્ડર દરિયાઈ પ્રવાહ સાથે તણાઈને કિનારે પહોંચ્યું હોઈ શકે છે.
આ ઘટના સામે આવતા સ્થાનિક પોલીસ સહિત વિવિધ સુરક્ષા એજન્સીઓ તાત્કાલિક સક્રિય બની ગઈ છે. ખાસ કરીને કચ્છનો દરિયાકાંઠો અને સરહદી વિસ્તાર રાષ્ટ્રીય સુરક્ષાના દૃષ્ટિકોણથી અત્યંત સંવેદનશીલ માનવામાં આવે છે, ત્યારે આવા ઉપકરણની મળતાવળે અનેક સવાલો ઉભા કર્યા છે.
આ પણ વાંચો: સુરતના કલ્પેશ પટેલે પ્રાકૃતિક ખેતીમાં રચ્યો ઇતિહાસ! : 50થી વધુ જાતની કેળથી લાખોની આવક, જાણો કેવી રીતે બન્યા દેશના 'રોલ મોડેલ'
સંયુક્ત તપાસ શરૂ
માહિતી મળતા જ સ્થાનિક પોલીસ, સ્ટેટ ઇન્ટેલિજન્સ બ્યુરો (IB), સ્પેશિયલ ઓપરેશન ગ્રુપ (SOG) અને અન્ય સુરક્ષા એજન્સીઓએ સંયુક્ત તપાસ શરૂ કરી છે. ઉપકરણ કયા દેશ અથવા નેટવર્ક સાથે જોડાયેલું હોઈ શકે છે અને તેનો ઉપયોગ કયા હેતુ માટે થતો હતો તે જાણવા માટે ટેક્નિકલ તપાસ હાથ ધરવામાં આવી રહી છે.
સુરક્ષા એજન્સીઓ દ્વારા ટ્રાન્સપોન્ડરની ટેક્નિકલ વિગતો, સિગ્નલ સિસ્ટમ અને તેમાં રહેલા ડેટાનું વિશ્લેષણ કરવામાં આવી રહ્યું છે. દરિયાઈ માર્ગે કોઈ ગેરકાયદેસર પ્રવૃત્તિ અથવા જાસૂસી સંબંધિત એંગલ છે કે નહીં તે દિશામાં પણ તપાસ ચાલી રહી હોવાનું સૂત્રો જણાવી રહ્યા છે.
આ પણ વાંચો: અમેરિકામાં વધુ એક ગુજરાતીની કરપીણ હત્યા : મહેસાણાની મહિલાને ગોળી મારી મોતને ઘાટ ઉતારાઈ
અગાઉ પણ મળી ચૂક્યા છે શંકાસ્પદ ઉપકરણો
જખૌ અને આસપાસનો દરિયાકાંઠો અગાઉ પણ સુરક્ષા એજન્સીઓ માટે ચિંતાનો વિષય બની ચૂક્યો છે. છેલ્લા કેટલાક વર્ષોમાં આ વિસ્તારમાંથી મિસાઈલ સેલ, શંકાસ્પદ ઉપકરણો અને ચાઈનીઝ બનાવટના ડ્રોન મળી આવવાના બનાવો સામે આવ્યા હતા.
કચ્છનો દરિયાકાંઠો પાકિસ્તાનની સરહદ નજીક હોવાને કારણે સુરક્ષા દૃષ્ટિએ અત્યંત મહત્વપૂર્ણ ગણાય છે. દરિયાઈ માર્ગે થતી ઘૂસણખોરી, જાસૂસી અથવા સ્મગલિંગ જેવી પ્રવૃત્તિઓ રોકવા માટે અહીં સતત પેટ્રોલિંગ અને સર્વેલન્સ કરવામાં આવે છે.
ટ્રાન્સપોન્ડર શું હોય છે?
ટ્રાન્સપોન્ડર એક પ્રકારનું ઇલેક્ટ્રોનિક ઉપકરણ છે, જે સેટેલાઇટ અથવા રેડિયો સિગ્નલ પ્રાપ્ત કરીને તેનો પ્રતિસાદ આપે છે. તેનો ઉપયોગ સામાન્ય રીતે દરિયાઈ જહાજો, એરક્રાફ્ટ, નેવિગેશન સિસ્ટમ અને ટ્રેકિંગ માટે થાય છે.
તેમ છતાં, સુરક્ષા એજન્સીઓ માટે અજાણ્યા અથવા શંકાસ્પદ ટ્રાન્સપોન્ડરનું મળવું ગંભીર બાબત માનવામાં આવે છે, કારણ કે તેનો ઉપયોગ ગેરકાયદેસર પ્રવૃત્તિઓ, જાસૂસી અથવા માર્ગદર્શન માટે પણ થઈ શકે છે.
આ પણ વાંચો: અંબાલાલ પટેલની આગાહી : ગુજરાતમાં પ્રિમોન્સૂન એક્ટિવિટી સક્રિય બનશે, અનેક વિસ્તારોમાં વરસાદની શક્યતા
દરિયાઈ સુરક્ષા પર ફરી સવાલ
આ ઘટનાએ ફરી એકવાર ગુજરાતના દરિયાકાંઠાની સુરક્ષા વ્યવસ્થા અંગે ચર્ચા શરૂ કરી છે. કચ્છનો વિસ્તાર દેશના સૌથી લાંબા દરિયાકાંઠામાંનો એક હોવાથી અહીં સતત મોનીટરીંગ અને સર્વેલન્સ જાળવવું પડકારરૂપ બની રહે છે.
નિષ્ણાતોના મતે, દરિયાઈ માર્ગે મળતા આવા શંકાસ્પદ ઉપકરણોનું સમયસર શોધાઈ જવું સુરક્ષા એજન્સીઓની સતર્કતા દર્શાવે છે, પરંતુ સાથે સાથે આ પ્રકારની પ્રવૃત્તિઓના સંભવિત જોખમ તરફ પણ ઈશારો કરે છે.
હાલ સમગ્ર મામલે સુરક્ષા એજન્સીઓ કોઈ પણ શક્યતા નકારી રહી નથી અને ટેક્નિકલ તપાસ પૂર્ણ થયા બાદ વધુ વિગતો બહાર આવી શકે છે.
