ગિર ગઢડા જિલ્લાના કોડીનાર તાલુકાના હરમડીયા ગામે હૃદયદ્રાવક ઘટના સામે આવી છે. જેમાં 12 વર્ષના બાળકનું મગરના હુમલામાં દુખદ મોત થયું છે. ગામની સાંગાવાડી નદી કિનારે બનેલી આ ઘટનાએ સમગ્ર વિસ્તારમાં ભય અને શોકનો માહોલ ઊભો કર્યો છે. સૌથી કરુણ બાબત એ રહી કે બાળકને મગર પિતાની નજર સામે જ પાણીમાં ખેંચી ગયો હતો અને પરિવાર કંઈ કરી શકે તે પહેલાં જ બાળક નદીના ઊંડા પાણીમાં ગાયબ થઈ ગયો હતો.
પ્રાપ્ત માહિતી મુજબ બાળક પોતાના પિતા સાથે નદી પાસે ગયો હતો. તે દરમિયાન બાળક નદીના કિનારે હાથ પગ ધોઈ રહ્યો હતો ત્યારે અચાનક પાણીમાંથી બહાર આવેલા મગરે તેના પર હુમલો કર્યો હતો. હુમલો એટલો ઝડપી હતો કે બાળકને બચાવવાનો કોઈ મોકો જ મળ્યો નહોતો. પિતાએ ચીસો પાડી મદદ માટે બુમો પાડી હતી, પરંતુ મગર બાળકને ખેંચીને પાણીની અંદર લઈ ગયો હતો.
ઘટનાની જાણ થતાં ગામલોકો મોટી સંખ્યામાં નદીકાંઠે એકત્ર થયા હતા. ઘટનાને પગલે સમગ્ર હરમડીયા ગામમાં ચિંતા અને ગભરાટનો માહોલ ફેલાઈ ગયો હતો. તરત જ ફાયર વિભાગ અને વન વિભાગને જાણ કરવામાં આવી હતી, જેના પગલે ટીમો તાત્કાલિક સ્થળ પર પહોંચી શોધખોળ કામગીરી શરૂ કરી હતી.
આ પણ વાંચો: ‘વન નેશન, વન ઈલેક્શન’ મુદ્દે ગુજરાતમાં બેઠકનો ધમધમાટ : આજે અંતિમ દિવસ
5 કલાક સુધી ચાલ્યું રેસ્ક્યૂ
ફાયર વિભાગ, સ્થાનિક તરવૈયાઓ અને વન વિભાગની સંયુક્ત ટીમોએ નદીમાં બાળકની શોધખોળ માટે ભારે જહેમત ઉઠાવી હતી. નદીના કેટલાક વિસ્તારોમાં મગરોની હાજરી અગાઉ પણ નોંધાઈ ચૂકી હોવાથી કામગીરી અત્યંત સાવચેતીપૂર્વક હાથ ધરવામાં આવી હતી. અંદાજે 5 કલાક સુધી ચાલેલી કામગીરી બાદ મગરે બાળકના મૃતદેહને જડબામાંથી મુક્ત કર્યો હતો. ત્યારબાદ રેસ્ક્યૂ ટીમે મૃતદેહને બહાર કાઢ્યો હતો. ઘટનાસ્થળે હાજર લોકો માટે આ દ્રશ્યો અત્યંત કરુણ અને આઘાતજનક રહ્યા હતા. બાદમાં મૃતદેહને પોસ્ટમોર્ટમ માટે ખસેડવામાં આવ્યો હતો. પોલીસ દ્વારા પણ ઘટનાની નોંધ લઈ જરૂરી કાર્યવાહી શરૂ કરવામાં આવી છે. પરિવારજનોનો આક્રંદ સાંભળીને ગામલોકોની આંખો પણ ભીની થઈ ગઈ હતી.
વિસ્તારમાં મગરોના વધતા ખતરા
આ ઘટનાએ ફરી એકવાર નદીકાંઠા વિસ્તારોમાં મગરોના વધતા ખતરા અંગે પ્રશ્નો ઊભા કર્યા છે. ગિર સોમનાથ અને આસપાસના કેટલાક વિસ્તારોમાં નદીઓ, તળાવો અને જળાશયોમાં મગરોની સંખ્યા વધી રહી હોવાની ચર્ચા છેલ્લા કેટલાક વર્ષોથી ચાલી રહી છે. સ્થાનિક લોકો અનેક વખત વન વિભાગને સુરક્ષા માટે પગલાં ભરવાની માંગ પણ કરી ચૂક્યા છે.
ગ્રામજનોનું કહેવું છે કે સાંગાવાડી નદી નજીક લોકો રોજિંદા કામો માટે જતા હોય છે. ખાસ કરીને બાળકો અને પશુપાલકો માટે આ વિસ્તાર જોખમી બની રહ્યો છે. આવા વિસ્તારોમાં ચેતવણીના બોર્ડ, સુરક્ષા વાડ અને સતત મોનીટરીંગ જેવી વ્યવસ્થાઓ વધુ મજબૂત બનાવવાની માંગ ઉઠી રહી છે.
વન વિભાગના અધિકારીઓએ લોકોને નદી અને જળાશયોની આસપાસ ખાસ સાવચેતી રાખવા અપીલ કરી છે. ખાસ કરીને સાંજના સમય અને વહેલી સવારે પાણી નજીક ન જવા સૂચના આપવામાં આવી રહી છે, કારણ કે આ સમયગાળા દરમિયાન મગરો વધુ સક્રિય રહેતા હોવાનું માનવામાં આવે છે.
આ પણ વાંચો: વાવ-થરાદમાં SOG ની મોટી કાર્યવાહી : ભાજપના કોર્પોરેટરના ભાઈ સહિત 3 ઝડપાયા
ગામમાં શોકનો માહોલ
12 વર્ષના બાળકના અચાનક મોતથી હરમડીયા ગામમાં શોકનો માહોલ છવાઈ ગયો છે. ગામલોકો પરિવારને સાંત્વના આપવા માટે ઘરે પહોંચી રહ્યા છે. પિતાની નજર સામે બનેલી આ ઘટના સમગ્ર ગામ માટે આઘાતજનક બની છે. સ્થાનિક લોકો હવે વન વિભાગ અને પ્રશાસન પાસેથી લાંબા ગાળાના સુરક્ષા પગલાંની અપેક્ષા રાખી રહ્યા છે, જેથી ભવિષ્યમાં આવી દુર્ઘટનાઓ અટકાવી શકાય. મગરોના સંવેદનશીલ વિસ્તારોમાં વધુ સઘન દેખરેખ અને જનજાગૃતિ અભિયાનની પણ માંગ ઉઠી રહી છે.
