Ketan Agarwal Murder Case: કેતન અગ્રવાલ હત્યા કેસમાં ચાલી રહેલી કાનૂની કાર્યવાહી વચ્ચે હવે એક નવો વિવાદ સામે આવ્યો છે. આરોપી સિયા ગોયલનું પ્રતિનિધિત્વ કરવાનો દાવો કરતા એડવોકેટ આશુતોષ શ્રીવાસ્તવે સિયાના ભાઈ સાહિલ ગોયલને કાનૂની નોટિસ પાઠવી છે. આ નોટિસમાં જાહેર માફી માંગવા, મીડિયા સમક્ષ કરાયેલા નિવેદનો પાછા ખેંચવા અને ભવિષ્યમાં આવા આક્ષેપો ન કરવાની લેખિત ખાતરી આપવાની માંગ કરવામાં આવી છે. સાથે જ એવું પણ જણાવાયું છે કે, જો નક્કી કરાયેલા સમયગાળામાં સંતોષકારક જવાબ નહીં મળે તો 10 કરોડ રૂપિયાના નાગરિક માનહાનિ દાવા સહિતની કાનૂની કાર્યવાહી હાથ ધરવામાં આવશે. આ સમગ્ર વિવાદ કેતન અગ્રવાલ હત્યા કેસની સુનાવણી પહેલાં જાહેરમાં આવ્યો છે, જેના કારણે કેસ સાથે જોડાયેલા કાનૂની પાસાઓ વધુ ચર્ચામાં આવ્યા છે. સિયા ગોયલના કાનૂની પ્રતિનિધિત્વને લઈને બંને પક્ષો વચ્ચે મતભેદ ઊભા થતાં હવે આ મામલો અલગ કાનૂની વિવાદનું સ્વરૂપ ધારણ કરતો જોવા મળી રહ્યો છે.
વકીલનો દાવો: વકાલતનામું કોર્ટમાં નોંધાયેલ છે
એડવોકેટ આશુતોષ શ્રીવાસ્તવે મોકલેલી કાનૂની નોટિસમાં જણાવ્યું છે કે સિયા ગોયલે તેમના પક્ષમાં કાયદેસર રીતે હસ્તાક્ષરિત વકાલતનામું (Vakalatnama) આપ્યું છે, જેના આધારે તેઓ તેમના બચાવ માટે કોર્ટમાં હાજર રહેવા અધિકૃત છે. નોટિસમાં જણાવાયું છે કે, આ નિમણૂક માત્ર મૌખિક દાવો અથવા મીડિયા સમક્ષ રજૂ કરાયેલ માહિતી નથી, પરંતુ એક પુખ્ત વયની આરોપી દ્વારા સ્વૈચ્છિક રીતે આપવામાં આવેલી કાનૂની સત્તા છે. નોટિસ મુજબ, મૂળ સહી કરાયેલ વકાલતનામું સંબંધિત અદાલતમાં પહેલેથી જ દાખલ કરવામાં આવ્યું છે અને જરૂરી પડે ત્યારે અન્ય સંબંધિત દસ્તાવેજોની મૂળ નકલો પણ કોર્ટ સમક્ષ રજૂ કરવામાં આવશે.
વકીલના જણાવ્યા અનુસાર આ વકાલતનામું પહેલેથી જ વડગાંવ માવળ કોર્ટના રેકોર્ડમાં લેવામાં આવ્યું છે અને તેને કાનૂની માન્યતા આપવામાં આવી છે.
આ પણ વાંચો: મંગેતરના હત્યા કેસમાં મહિલા આરોપીને હાથકડી કેમ ન પહેરાવાઈ? : જાણો ભારતમાં હાથકડી લગાવવાના શું છે નિયમો
સાહિલ ગોયલ પર માનહાનિના આક્ષેપ
નોટિસમાં સાહિલ ગોયલ પર ગંભીર આક્ષેપો કરવામાં આવ્યા છે. આશુતોષ શ્રીવાસ્તવનો આરોપ છે કે સાહિલ ગોયલે કોર્ટના રેકોર્ડ અથવા કાનૂની દસ્તાવેજોની ચકાસણી કર્યા વિના મીડિયા સમક્ષ ખોટા અને માનહાનિકારક નિવેદનો આપ્યા હતા. વકીલનું કહેવું છે કે, આ નિવેદનોને કારણે તેમની વ્યાવસાયિક પ્રતિષ્ઠાને નુકસાન પહોંચ્યું છે અને તેમને સોશિયલ મીડિયા પર ટ્રોલિંગ, ધમકીઓ, અપ્રિય ફોન કૉલ્સ તથા વ્યવસાયિક સ્તરે મુશ્કેલીઓનો સામનો કરવો પડ્યો છે. નોટિસમાં સાહિલ ગોયલને મીડિયા સમક્ષ કરેલા નિવેદનો પરત ખેંચવા, જાહેરમાં માફી માંગવા અને ભવિષ્યમાં આવા આરોપો ન કરવાની લેખિત ખાતરી આપવા માટે કહેવામાં આવ્યું છે. જો તેઓ આવું નહીં કરે તો 10 કરોડ રૂપિયાના નુકસાનની માંગ સાથે માનહાનિનો દાવો દાખલ કરવામાં આવશે તેવી ચેતવણી આપવામાં આવી છે.
કોર્ટ સુનાવણી પહેલાં જાહેરમાં આવ્યો વિવાદ
આ વિવાદ કેતન અગ્રવાલ હત્યા કેસની સુનાવણી પહેલાં વધુ ચર્ચામાં આવ્યો હતો. મીડિયા સાથે વાતચીત દરમિયાન સાહિલ ગોયલે આશુતોષ શ્રીવાસ્તવની સિયા ગોયલના વકીલ તરીકેની નિમણૂક અંગે સવાલો ઉઠાવ્યા હતા. સાહિલ ગોયલે દાવો કર્યો હતો કે,તેમના પરિવાર દ્વારા આશુતોષ શ્રીવાસ્તવને ક્યારેય નિયુક્ત કરવામાં આવ્યા નથી અને પરિવાર તરફથી એડવોકેટ વિપુલ દુશિંગને પ્રતિનિધિત્વ માટે પસંદ કરવામાં આવ્યા છે. તેમણે એવો પણ આરોપ લગાવ્યો હતો કે સિયા ગોયલના હસ્તાક્ષર ભ્રામક રીતે મેળવવામાં આવ્યા હોઈ શકે છે. સાહિલ ગોયલે વધુમાં જણાવ્યું હતું કે આ મુદ્દે પરિવાર દ્વારા કોર્ટમાં એફિડેવિટ પણ દાખલ કરવામાં આવ્યું છે. સાથે જ તેમણે આશુતોષ શ્રીવાસ્તવ પર પરિવારના સભ્યોને ધમકી આપવાનો પણ આક્ષેપ કર્યો હતો.
હત્યા કેસની કાર્યવાહી વચ્ચે વધ્યો કાનૂની વિવાદ
કેતન અગ્રવાલ હત્યા કેસ પહેલેથી જ ચર્ચામાં રહેલો છે, ત્યારે હવે સિયા ગોયલના કાનૂની પ્રતિનિધિત્વને લઈને ઊભો થયેલો આ વિવાદ કેસને વધુ જટિલ બનાવી શકે છે. આગામી દિવસોમાં કોર્ટમાં આ મુદ્દે શું સ્થિતિ સ્પષ્ટ થાય છે અને બંને પક્ષો તરફથી શું કાનૂની પગલાં લેવામાં આવે છે તેના પર સૌની નજર રહેશે. હાલમાં બંને પક્ષો વચ્ચેના આક્ષેપો અને પ્રત્યાઆક્ષેપો વચ્ચે કેસની મુખ્ય સુનાવણી આગળ વધી રહી છે, ત્યારે આ માનહાનિ વિવાદ પણ કાનૂની રીતે મહત્વપૂર્ણ બની શકે છે.
