પુણેના યુવા ઉદ્યોગપતિ કેતન અગ્રવાલની હત્યાના કેસમાં દરરોજ નવા અને ચોંકાવનારા ખુલાસા સામે આવી રહ્યા છે. પુણે ગ્રામ્ય પોલીસની તપાસમાં હવે એવો દાવો કરવામાં આવ્યો છે કે હત્યાનો સમગ્ર કાવતરું અગાઉથી ખૂબ જ આયોજનબદ્ધ રીતે ઘડવામાં આવ્યો હતો. પોલીસના જણાવ્યા અનુસાર મુખ્ય આરોપી સિયા ગોયલ અને તેના પ્રેમી ચેતન ચૌધરીએ માત્ર હત્યાની યોજના જ બનાવી નહોતી, પરંતુ તેને અંજામ આપતા પહેલાં તેની રિહર્સલ પણ કરી હતી. એટલું જ નહીં, સિયાએ ગૂગલ પર હત્યાને કેવી રીતે અંજામ આપવી અને તપાસ દરમિયાન કેવી રીતે બચી શકાય તે અંગે પણ માહિતી શોધી હોવાનું તપાસમાં સામે આવ્યું છે.
આ કેસમાં તપાસ આગળ વધતાં પોલીસે બંને આરોપીઓને લોહગઢ કિલ્લા પર લઈ જઈ સમગ્ર ઘટનાક્રમનું ક્રાઇમ સીન રિક્રિએશન કર્યું છે. આ પ્રક્રિયાનો હેતુ આરોપીઓના નિવેદનોની સ્થળ પરથી મળેલા પુરાવાઓ સાથે સરખામણી કરવાનો છે, જેથી ઘટનાનો સાચો ક્રમ સ્પષ્ટ થઈ શકે. સમગ્ર કાર્યવાહી દરમિયાન વિડિયો રેકોર્ડિંગ પણ કરવામાં આવ્યું છે.
હત્યા પહેલાં જ કરવામાં આવી હતી રિહર્સલ
પોલીસના પ્રાથમિક દાવા મુજબ સિયા અને ચેતને કેતનની હત્યા પહેલાં અનેક વખત યોજના બનાવી હતી. તપાસમાં એવી પણ માહિતી મળી છે કે 14 જૂનના રોજ પણ કેતનને મોતને ઘાટ ઉતારવાનો પ્રયાસ કરવામાં આવ્યો હતો, પરંતુ તે સફળ રહ્યો નહોતો. ત્યારબાદ બંનેએ ફરી યોજના ઘડી અને યોગ્ય તક મળતા ઘટનાને અંજામ આપ્યો હોવાનો પોલીસનો દાવો છે.
તપાસ અધિકારીઓના જણાવ્યા મુજબ આરોપીઓએ સ્થળની પસંદગી, સમય અને ઘટનાને અકસ્માત જેવું દેખાડવા માટે અગાઉથી વિચારણા કરી હતી. આ સમગ્ર યોજના ખૂબ જ વ્યવસ્થિત રીતે તૈયાર કરવામાં આવી હોવાનું પોલીસ માને છે.
ગૂગલ સર્ચથી લઈને પૂછપરછના જવાબો સુધીની તૈયારી
તપાસ દરમિયાન પોલીસને મળેલા ડિજિટલ પુરાવાઓમાં એવો દાવો કરવામાં આવ્યો છે કે સિયાએ ઇન્ટરનેટ પર હત્યા કરવાની રીતો અને તપાસ એજન્સીઓને કેવી રીતે ગેરમાર્ગે દોરી શકાય તે અંગે માહિતી શોધી હતી. પોલીસનું કહેવું છે કે હત્યા બાદ પૂછપરછ દરમિયાન શું જવાબ આપવા તે અંગે પણ બંને આરોપીઓએ અગાઉથી તૈયારી કરી હતી.
આ ઉપરાંત, આરોપીઓએ ઘટના બાદ મોબાઇલ ફોનમાંથી ચેટ્સ અને અન્ય ડિજિટલ પુરાવા કાઢી નાખવાનો પ્રયાસ કર્યો હોવાનું પણ સામે આવ્યું છે. તપાસ ટીમ હવે મોબાઇલ ફોન, કોલ ડિટેઇલ્સ, લોકેશન ડેટા અને અન્ય ડિજિટલ ફોરેન્સિક પુરાવાઓની મદદથી સમગ્ર ઘટનાક્રમને વધુ મજબૂત બનાવી રહી છે.
આ પણ વાંચો: કેતન-સિયા, રાજા-સોનમ બાદ હવે ગીતા-શક્તિ કેસ! : મધરાતે પત્ની અને પતિ વચ્ચે થયો ઝઘડો, સવારે ખેતરમાં મળી લાશ
ઓળખ છુપાવવા બદલ્યો હતો વેશ
પોલીસના જણાવ્યા અનુસાર ચેતન ચૌધરીએ પોતાની ઓળખ છુપાવવા માટે વેશ બદલવાની યોજના પણ બનાવી હતી. તપાસમાં એવો દાવો કરવામાં આવ્યો છે કે તે અલગ પ્રકારના કપડાં પહેરીને લોહગઢ કિલ્લા પર પહોંચ્યો હતો અને કેતન તથા સિયાની હિલચાલ પર સતત નજર રાખી રહ્યો હતો.
પોલીસ માને છે કે આ સમગ્ર ઘટનામાં દરેક પગલું અગાઉથી નક્કી કરવામાં આવ્યું હતું, જેથી કોઈને શંકા ન જાય અને ઘટના અકસ્માત હોવાનું લાગી શકે. જોકે તપાસ દરમિયાન મળેલા ટેક્નિકલ અને ડિજિટલ પુરાવાઓએ સમગ્ર કેસની દિશા બદલી દીધી છે.
લોહગઢ કિલ્લા પર ક્રાઇમ સીન રિક્રિએશન
પુણે ગ્રામ્ય પોલીસે બંને આરોપીઓને લોહગઢ કિલ્લા પર લઈ જઈ ઘટનાસ્થળે સંપૂર્ણ સીન રિક્રિએશન કર્યું. આ દરમિયાન પોલીસે સમજવાનો પ્રયાસ કર્યો કે ઘટનાના દિવસે બંને આરોપીઓ ક્યાંથી આવ્યા, કેવી રીતે કેતન સુધી પહોંચ્યા અને આખી ઘટના કયા ક્રમમાં બની.
પોલીસના દાવા મુજબ સિયાએ પૂર્વનિયોજિત સંકેત આપ્યો હતો કે જ્યારે તે ચોક્કસ જગ્યાએ બેસી જશે ત્યારે ચેતને કેતનને ખીણમાં ધક્કો મારવાનો હતો. આ દાવાની સત્યતા તપાસવા માટે બંને આરોપીઓની હાજરીમાં સમગ્ર ઘટનાક્રમ ફરી સર્જવામાં આવ્યો હતો.
સીન રિક્રિએશન દરમિયાન પોલીસે બંને આરોપીઓ પાસેથી ઘટના સ્થળે તેમની હિલચાલ, સમય અને ઘટનાની દરેક ક્ષણ અંગે માહિતી મેળવી હતી. આ સમગ્ર પ્રક્રિયાનું વિડિયો રેકોર્ડિંગ કરવામાં આવ્યું છે, જે તપાસનો મહત્વપૂર્ણ ભાગ બની શકે છે.
ફોરેન્સિક તપાસ પર પણ ભાર
જ્યાંથી કેતન અગ્રવાલને ખીણમાં ધક્કો મારવામાં આવ્યો હોવાની શંકા છે તે સ્થળે ફોરેન્સિક નિષ્ણાતોની ટીમે પણ વિગતવાર તપાસ હાથ ધરી છે. સ્થળ પરથી વૈજ્ઞાનિક પુરાવા એકત્ર કરીને આરોપીઓના નિવેદનો સાથે તેની સરખામણી કરવામાં આવી રહી છે.
પુણે ગ્રામ્ય પોલીસના અધિકારીઓના જણાવ્યા મુજબ સીન રિક્રિએશન દરમિયાન આરોપીઓએ ઘટનાનો સમગ્ર માર્ગ, સ્થળ અને પોતાની ભૂમિકાની વિગતો જણાવી હતી. આ તમામ વિગતોનું પંચનામું તૈયાર કરવામાં આવ્યું છે અને હવે તેની તપાસ અન્ય પુરાવાઓ સાથે કરવામાં આવશે.
તપાસ હજુ ચાલુ, આરોપો અંગે અંતિમ નિર્ણય અદાલત કરશે
પોલીસ હાલમાં ડિજિટલ પુરાવા, ફોરેન્સિક રિપોર્ટ, સાક્ષીઓના નિવેદનો અને સીન રિક્રિએશનના આધારે તપાસ આગળ વધારી રહી છે. નોંધનીય છે કે પોલીસ દ્વારા કરવામાં આવેલા તમામ દાવા તપાસનો ભાગ છે અને કેસ અંગેનો અંતિમ નિર્ણય સંબંધિત અદાલત દ્વારા ઉપલબ્ધ પુરાવાઓના આધારે લેવામાં આવશે.
આ કેસમાં સામે આવી રહેલા ખુલાસાઓએ સમગ્ર મહારાષ્ટ્રમાં ભારે ચર્ચા જગાવી છે. તપાસ પૂર્ણ થયા બાદ ચાર્જશીટમાં વધુ વિગતો સામે આવે તેવી શક્યતા છે, જ્યારે પોલીસ માટે ડિજિટલ અને વૈજ્ઞાનિક પુરાવાઓ આ કેસમાં સૌથી મહત્વની કડી સાબિત થઈ શકે છે.
