આ જિમમાં મહિલાઓ અને પુરુષો માટે અલગ વર્કઆઉટ સમય, અલગ ટ્રેનર અને અલગ જગ્યાની વ્યવસ્થા કરવામાં આવી છે. સાથે જ જિમની અંદર ઊંચા અવાજે સંગીત વગાડવા પર પ્રતિબંધ મૂકવામાં આવ્યો છે.જિમના આ અનોખા મોડલને લઈને સોશિયલ મીડિયા પર વિવિધ પ્રકારની પ્રતિક્રિયાઓ સામે આવી રહી છે. કેટલાક લોકો તેને ધાર્મિક માન્યતાઓને અનુરૂપ ફિટનેસ સુવિધા ગણાવી રહ્યા છે, જ્યારે કેટલાક લોકો તેને અલગાવવાદી અભિગમ તરીકે જોઈ રહ્યા છે. કેરલમના પલક્કડ જિલ્લામાં સ્થિત એક ફિટનેસ સેન્ટર પોતાને 'ઈસ્લામિક-ફ્રેન્ડલી જિમ' તરીકે રજૂ કર્યા બાદ ચર્ચા અને વિવાદના કેન્દ્રમાં આવ્યું છે.
પ્રમોશનલ વીડિયો બાદ શરૂ થયો વિવાદ
જિમના માલિક નવાઝ મુથુ ટી દ્વારા તાજેતરમાં એક પ્રમોશનલ વિડિયો જાહેર કરવામાં આવ્યો હતો, જેમાં જિમની વિશેષતાઓ વિશે માહિતી આપવામાં આવી હતી. વિડિયો વાયરલ થયા બાદ સોશિયલ મીડિયા પર સવાલો ઉઠવા લાગ્યા કે શું આ જિમ માત્ર મુસ્લિમ સમુદાય માટે જ શરૂ કરવામાં આવ્યું છે.
વિવાદ વધતા નવાઝે મૂળ વિડિયો હટાવી દીધો અને ત્યારબાદ નવો સ્પષ્ટીકરણ વિડિયો જાહેર કર્યો. તેમણે જણાવ્યું કે “ઇસ્લામિક-ફ્રેન્ડલી” શબ્દનો અર્થ કોઈ ખાસ ધર્મના લોકો સુધી મર્યાદિત નથી. તેમના અનુસાર જિમ તમામ ધર્મ અને સમુદાયના લોકો માટે ખુલ્લું છે અને આ શબ્દ માત્ર સંચાલન પદ્ધતિ તથા જિમના નિયમોને દર્શાવે છે.
આ પણ વાંચો: યુવતીને લિફ્ટ આપવી યુવકને પડી ભારે! : લિફ્ટ આપ્યા પછી યુવક સાથે જે થયું તે ચોંકાવનારું
મહિલા અને પુરુષ માટે અલગ વ્યવસ્થા
જિમના સંચાલકના જણાવ્યા અનુસાર મહિલાઓ અને પુરુષોને એકસાથે વર્કઆઉટ કરવાની જરૂર ન પડે તે માટે અલગ સમયપત્રક અને અલગ જગ્યા રાખવામાં આવી છે. ઉપરાંત મહિલા અને પુરુષ સભ્યો માટે અલગ ટ્રેનરોની વ્યવસ્થા પણ કરવામાં આવી છે. જિમમાં સામાન્ય રીતે સાંભળવામાં આવતું ઊંચા અવાજનું સંગીત પણ રાખવામાં આવતું નથી. જોકે, સભ્યો ઇચ્છે તો વ્યક્તિગત રીતે હેડફોન દ્વારા સંગીત અથવા અન્ય ઓડિયો સાંભળી શકે છે.
આ પણ વાંચો: 850 સૈનિકો, 5 બુલડોઝર... થઈ ગઈ મોટી કાર્યવાહી : નંદ કિશોર ગુર્જરે કહ્યું, 'બકરા હલાલ હમ કરેંગે...'
આ મોડલ પાછળનું કારણ શું?
નવાઝ મુથુ ટીનું કહેવું છે કે ઘણા મુસ્લિમ પરિવારો ધાર્મિક સિદ્ધાંતોનું કડક પાલન કરે છે. આવા પરિવારોમાં કેટલાક લોકો સંગીત સાંભળવાનું ટાળે છે અથવા પુરુષ-મહિલાના મિશ્ર વાતાવરણમાં વ્યાયામ કરવામાં અનુકૂળતા અનુભવતા નથી.
તેમણે જણાવ્યું કે તેમના પોતાના પરિવારના કેટલાક સભ્યો પણ આ કારણોસર પરંપરાગત જિમમાં જતા નહોતા. આ જરૂરિયાતને ધ્યાનમાં રાખીને આવા લોકો માટે અનુકૂળ વાતાવરણ ઉપલબ્ધ કરાવવાના હેતુથી આ જિમ શરૂ કરવામાં આવ્યું છે.
સોશિયલ મીડિયા પર મિશ્ર પ્રતિસાદ
આ જિમ અંગે સોશિયલ મીડિયા પર મિશ્ર પ્રતિસાદ જોવા મળી રહ્યો છે. કેટલાક લોકોનું માનવું છે કે વ્યક્તિઓને પોતાની ધાર્મિક અને સાંસ્કૃતિક માન્યતાઓ અનુસાર ફિટનેસ સુવિધા પસંદ કરવાનો અધિકાર છે. બીજી તરફ કેટલાક વપરાશકર્તાઓએ પ્રશ્ન ઉઠાવ્યો છે કે આવા મોડલથી સામાજિક વિભાજન વધવાની શક્યતા છે કે નહીં.
હાલ સુધી કોઈ સરકારી પ્રતિબંધ અથવા કાનૂની કાર્યવાહી અંગે માહિતી સામે આવી નથી. જિમના સંચાલકોનો દાવો છે કે તેઓ તમામ ગ્રાહકો માટે ખુલ્લા છે અને માત્ર વિશેષ જરૂરિયાત ધરાવતા લોકો માટે અનુકૂળ વાતાવરણ ઉપલબ્ધ કરાવી રહ્યા છે.
