Kaushambi : ઉત્તર પ્રદેશના કૌશાંબી જિલ્લામાંથી એક પરિવાર સાથે જોડાયેલો ચર્ચાસ્પદ મામલો સામે આવ્યો છે. જિલ્લાના કોખરાજ કોતવાલી વિસ્તારના સંગેતી ગામમાં રહેતા એક વ્યક્તિએ પોતાની પત્ની ઘર છોડીને દીકરીના સસરા સાથે જતી રહી હોવાનો આરોપ લગાવી પોલીસમાં ફરિયાદ નોંધાવી છે. ફરિયાદમાં એવો પણ દાવો કરવામાં આવ્યો છે કે સંબંધિત વ્યક્તિ તરફથી ફોન પર ગાળો આપવામાં આવે છે અને જાનથી મારી નાખવાની ધમકી પણ આપવામાં આવી રહી છે. હાલ પોલીસ સમગ્ર મામલાની તપાસ કરી રહી છે. ફરિયાદી ઇંદ્રજીતના જણાવ્યા મુજબ, તેમની પત્ની લક્ષ્મી દેવી સાત બાળકોની માતા છે. થોડા દિવસ પહેલાં તે અચાનક ઘરેથી નીકળી ગઈ હતી અને ત્યારથી પરત ફરી નથી. પરિવારના સભ્યો દ્વારા શોધખોળ કર્યા બાદ તેમને શંકા ગઈ કે તેમની પત્ની દીકરીના સસરા રાકેશ સાથે ગઈ છે. આ મામલે તેમણે કોખરાજ પોલીસ સ્ટેશનમાં લેખિત આવેદન આપી કાયદેસરની કાર્યવાહી કરવાની માંગ કરી છે.
દીકરીના લગ્ન બાદ વધ્યું આવનજાવન
ઇંદ્રજીતના જણાવ્યા અનુસાર, લગભગ ચાર મહિના પહેલાં તેમની દીકરીના લગ્ન થયા હતા. લગ્ન પછી દીકરીના સસરા રાકેશનું તેમના ઘરે આવનજાવન વધ્યું હતું. ફરિયાદીનો આરોપ છે કે આ દરમિયાન બંને વચ્ચે નજીકનો સંબંધ વિકસ્યો અને ચાર દિવસ પહેલાં તેમની પત્ની રાકેશ સાથે ઘર છોડીને જતી રહી. ફરિયાદમાં વધુમાં જણાવાયું છે કે પત્ની જતી રહેતાં પરિવાર મુશ્કેલીમાં મુકાઈ ગયો છે. ઇંદ્રજીતના જણાવ્યા પ્રમાણે તેમના સાત બાળકો છે, જેમાં સૌથી નાનું બાળક માત્ર પાંચ વર્ષનું છે. માતા ઘરે ન હોવાને કારણે બાળકોની સંભાળ અને પરિવારની જવાબદારી હવે સંપૂર્ણપણે તેમના પર આવી પડી છે.
આ પણ ખાસ વાંચો : લિવ-ઇન સંબંધ તૂટ્યા બાદ ભયાનક અંજામ : લગ્ન કરવાની ના પાડતા યુવકે પાર્કમાં જઈને 'ચકુડી'ના રમાડી દીધા 'રામ'!
ધમકી આપવાનો આરોપ, ઓડિયો રેકોર્ડિંગ હોવાનો દાવો
પીડિત પતિએ પોલીસને જણાવ્યું છે કે પત્ની ઘર છોડીને ગયા બાદ પણ મુશ્કેલીઓ ઓછી થઈ નથી. તેમનો આરોપ છે કે રાકેશ સતત ફોન કરીને ગાળો આપે છે અને જાનથી મારી નાખવાની ધમકી આપે છે. ઇંદ્રજીતનું કહેવું છે કે તેમની પાસે આ વાતચીતના ઓડિયો રેકોર્ડિંગ પણ ઉપલબ્ધ છે, જે તેઓ તપાસ દરમિયાન પોલીસને પુરાવા તરીકે આપશે. પરિવારનું કહેવું છે કે આ ઘટનાના કારણે ગામમાં તેમની સામાજિક પ્રતિષ્ઠાને પણ અસર થઈ છે. સ્થાનિક લોકોમાં આ ઘટનાને લઈને વિવિધ ચર્ચાઓ ચાલી રહી છે, જેના કારણે પરિવાર માનસિક તણાવમાંથી પસાર થઈ રહ્યો હોવાનું ફરિયાદીમાં ઉલ્લેખ કરવામાં આવ્યો છે.
પોલીસે શું કહ્યું?
કોખરાજ પોલીસ સ્ટેશનના ઇન્ચાર્જ સંતોષ શર્માએ જણાવ્યું છે કે ફરિયાદના આધારે પ્રાથમિક તપાસ શરૂ કરવામાં આવી છે. ફરિયાદમાં કરવામાં આવેલા આરોપોની સત્યતા ચકાસવામાં આવી રહી છે. જો તપાસ દરમિયાન પૂરતા પુરાવા મળશે તો કાયદા મુજબ આગળની કાર્યવાહી કરવામાં આવશે. પોલીસે હજુ સુધી કોઈપણ આરોપીની ધરપકડ અથવા અન્ય કાયદેસરની કાર્યવાહી અંગે સત્તાવાર માહિતી જાહેર કરી નથી. તેમજ પત્ની પોતાની મરજીથી ગઈ છે કે અન્ય કોઈ સંજોગોમાં ઘર છોડ્યું છે, તે મુદ્દે પણ તપાસ ચાલી રહી છે.
આ પણ ખાસ વાંચો : યુવકની પાછળ-પાછળ એકસાથે ચાલ્યા બે કોબ્રા અને નોળિયો! : વાયરલ વીડિયો જોઈ લોકોના ઉડી ગયા હોશ, ઉઠ્યા અનેક સવાલ
તપાસ પૂર્ણ થયા બાદ જ સ્પષ્ટ થશે હકીકત
આ સમગ્ર મામલે હાલમાં માત્ર ફરિયાદી પક્ષના આરોપો સામે આવ્યા છે. પોલીસ તપાસ પૂર્ણ થયા બાદ જ ઘટનાની સંપૂર્ણ હકીકત અને જવાબદારી અંગે સ્પષ્ટતા થશે. તેથી આરોપોને હાલ અંતિમ સત્ય તરીકે જોવાને બદલે તપાસના પરિણામની રાહ જોવી જરૂરી છે.
