રાષ્ટ્રીય અધ્યક્ષ નડ્ડા અને ગુજરાતમાં પાટીલ રહેશે યથાવત્ : પહેલગામ હુમલાના કારણે ભાજપની સંગઠન પ્રક્રિયા મોકુફ

ભારતીય જનતા પાર્ટી (BJP)ના રાષ્ટ્રીય અધ્યક્ષની ચૂંટણી ફરી એકવાર મોકૂફ રાખવામાં આવી છે. એટલે કે જેપી નડ્ડા આગામી ચૂંટણી સુધી ભાજપના અધ્યક્ષ રહેશે. કહેવામાં આવી રહ્યું છે કે પહેલગામમાં થયેલા આતંકી હુમલાને જોતા ચૂંટણી થોડા સમય માટે સ્થગિત કરવામાં આવી છે. રાષ્ટ્રીય અધ્યક્ષની ચૂંટણીમાં થોડો વિલંબ થશે. પાર્ટી અધ્યક્ષની ચૂંટણી ક્યારે થશે તે અત્યારે સ્પષ્ટ નથી.

આપને જણાવી દઈએ કે ભાજપ અગાઉ આગામી મહિને એટલે કે મે મહિનામાં રાષ્ટ્રીય અધ્યક્ષની ચૂંટણી કરવા જઈ રહી હતી. પરંતુ પહેલગામ હુમલા બાદ હવે આ ચૂંટણી સ્થગિત કરવાનો નિર્ણય લેવામાં આવ્યો છે. એવું કહેવામાં આવી રહ્યું છે કે કેન્દ્રમાં સત્તામાં હોવાથી ભાજપ હાલમાં તેનું સંપૂર્ણ ધ્યાન પહેલગામ હુમલા પર કેન્દ્રિત કરવા માંગે છે. તેથી થોડા દિવસો પછી પક્ષ પ્રમુખની ચૂંટણી યોજવા પર સર્વસંમતિ સધાઈ છે.

જેપી નડ્ડા પહેલા ભાજપ અધ્યક્ષનું પદ વર્તમાન કેન્દ્રીય ગૃહમંત્રી અમિત શાહ પાસે હતું. જો કે, કેન્દ્રીય મંત્રી બન્યા પછી, શાહે વર્ષ 2019માં જગત પ્રકાશ નડ્ડાને અધ્યક્ષ પદ સોંપ્યું. 2024ની લોકસભા ચૂંટણીથી, એવી અટકળો ચાલી રહી હતી કે જેપી નડ્ડા ભાજપ અધ્યક્ષ પદ પરથી હટી શકે છે, પરંતુ ત્યારથી નડ્ડાએ ભાજપ અધ્યક્ષની ચૂંટણી ન થવાને કારણે ખુરશી સંભાળી છે.

મહત્વનું એ પણ છે રાષ્ટ્રીય અધ્યક્ષની ચૂંટણી મોકુફ થતાં હવે રાજ્યના માળખામાં પણ હાલ કોઈ ફેરફાર નહીં થાય. ગુજરાત ભાજપ પ્રદેશ અધ્યક્ષ હાલ કેન્દ્રીય જળ શક્તિ મંત્રી સીઆર પાટીલ છે. અને હાલ સીઆર પાટીલ જ અધ્યક્ષ સ્થાને યથાવત રહેશે.