પાકિસ્તાનને અમેરિકાની લપડાક : હસ્તક્ષેપનો કર્યો સાફ ઈનકાર

પાકિસ્તાન ભારતના ઓપરેશન સિંદૂરથી રીતસર બોખલાયું છે. તે સતત ભારત પર હુમલો કરવાનો પ્રયાસ કરી રહ્યો છે. પરંતુ તેને માત્રને માત્ર અપમાનનો જ સામનો કરવો પડી રહ્યો છે. આ દરમિયાન, તે અમેરિકા પાસેથી સતત મદદની અપીલ પણ કરી રહ્યું છે. પરંતુ હવે અમેરિકા તરફથી એક એવી પ્રતિક્રિયા આવી છે જેણે પાકિસ્તાનની ચિંતામાં વધારો કરી દિધો છે.

અમેરિકાના ઉપપ્રમુખ જેડી વાન્સે કહ્યું કે ભારત અને પાકિસ્તાન વચ્ચેની વર્તમાન પરિસ્થિતિમાં અમેરિકા હસ્તક્ષેપ કરશે નહીં. આ અમેરિકાનું કામ નથી.
વાન્સે ફોરેન મીડિયા સાથે વાત કરતા કહ્યું કે અમે બંને પક્ષોને તણાવ ઘટાડવા માટે પ્રોત્સાહિત કરી શકીએ છીએ. પરંતુ આપણે યુદ્ધની વચ્ચે નહીં આવીએ કારણ કે તે આપણું કામ નથી અને આપણે તેને નિયંત્રિત કરી શકતા નથી.

તેમણે કહ્યું કે અમેરિકા ભારતીયોને તેમના શસ્ત્રો સોંપવાનું કહી શકે નહીં. આપણે પાકિસ્તાનીઓને હથિયારો મૂકવાનું કહી શકીએ નહીં. આપણે આ સમસ્યાનો ઉકેલ રાજદ્વારી માધ્યમથી લાવી શકીએ છીએ. અમને આશા છે કે વર્તમાન પરિસ્થિતિ કોઈપણ પ્રકારના સંપૂર્ણ પ્રાદેશિક યુદ્ધ કે પરમાણુ યુદ્ધમાં ફેરવાય નહીં. જોકે, હાલમાં અમને નથી લાગતું કે આવું થશે.

અગાઉ, અમેરિકી રાષ્ટ્રપતિ ટ્રમ્પે કહ્યું હતું કે જો હું વર્તમાન પરિસ્થિતિ અંગે કોઈપણ રીતે મદદ કરી શકું તો હું તે કરીશ. આ એક ભયંકર પરિસ્થિતિ છે. મારા ભારત અને પાકિસ્તાન બંને સાથે સારા સંબંધો છે અને હું ઈચ્છું છું કે બંને આ મુદ્દાનો ઉકેલ લાવે.

આ પહેલા પાકિસ્તાનને સંયુક્ત રાષ્ટ્ર તરફથી પણ મોટો ઝટકો લાગ્યો હતો. પહેલગામ આતંકવાદી હુમલા બાદ ભારત અને પાકિસ્તાન વચ્ચેના તણાવ વચ્ચે સંયુક્ત રાષ્ટ્ર સુરક્ષા પરિષદ (UNSC) એ બંધ બારણે બેઠક યોજી હતી. પાકિસ્તાનની વિનંતી પછી યોજાયેલી આ બેઠકનું કોઈ નક્કર પરિણામ આવ્યું નહીં.

સોમવારે બપોરે UNSC ખાતે દોઢ કલાકની બંધ બારણે બેઠક બાદ પાકિસ્તાન શરમજનક સ્થિતિમાં મુકાયું. આ બેઠક પછી, સંયુક્ત રાષ્ટ્રએ ન તો કોઈ સત્તાવાર નિવેદન બહાર પાડ્યું કે ન તો કોઈ ઠરાવ પસાર થયો.

આ બેઠક દરમિયાન પાકિસ્તાને સતત ખોટા નિવેદનો આપ્યા. તેમણે કહ્યું હતું કે ભારતે સિંધુ નદી સંધિને સ્થગિત કરવાના પગલાને ગેરકાયદેસર ગણાવ્યું હતું. આનાથી પ્રદેશમાં શાંતિ અને સુરક્ષા જોખમાય છે.