IND vs ENG : કેમ અચાનક બીજી ટેસ્ટ માંથી બહાર થઇ ગયો બુમરાહ?

ભારતનો સ્ટાર ફાસ્ટ બોલર જસપ્રીત બુમરાહ 2 જુલાઈથી બર્મિંગહામમાં શરૂ થતી બીજી ટેસ્ટમાં નહીં રમે. વર્કલોડ મેનેજમેન્ટને કારણે ટીમ મેનેજમેન્ટે આ નિર્ણય લીધો છે, જેથી તે 10 જુલાઈથી લોર્ડ્સમાં રમાનારી ત્રીજી ટેસ્ટ માટે જોશમાં રહે. પણ બુમરાહ વિના ભારતની બોલિંગ લાઇનઅપ શું ઇંગ્લેન્ડના બેઝબોલનો સામનો કરી શકશે? ચાલો, જાણીએ પહેલી ટેસ્ટમાં શું થયું અને આગળ શું થઈ શકે

પહેલી ટેસ્ટમાં નિરાશા: હેડિંગ્લીમાં 24 જૂને પૂરી થયેલી પહેલી ટેસ્ટમાં ભારતે 371 રનનો ટાર્ગેટ આપ્યો હતો, પણ ઇંગ્લેન્ડે પાંચ વિકેટે જીત ઝડપી લીધી. બુમરાહે પહેલી ઇનિંગમાં 24.4 ઓવરમાં 5/83ની શાનદાર બોલિંગ કરી, પણ બીજી ઇનિંગમાં તે વિકેટ વિના રહ્યો. મોહમ્મદ સિરાજ અને પ્રસિદ્ધ કૃષ્ણાનું પ્રદશન નિરાશાજનક રહ્યું, જેના કારણે ભારત મેચ હારી ગયું. યશસ્વી જયસ્વાલ, શુભમન ગિલ, કેએલ રાહુલ અને રિષભ પંતની સેન્ચુરીઓ છતાં લોઅર મિડલ ઓર્ડરનું કોલેપ્સ (41/7 અને 77/７) ભારતને ભારે પડ્યું.

બુમરાહ વિના શું થશે? બુમરાહની ગેરહાજરી ભારત માટે મોટો ઝટકો છે, કારણ કે એડબેસ્ટનની બેટિંગ-ફ્રેન્ડલી પીચ પર 2022માં ઇંગ્લેન્ડે 378 રનનો ટાર્ગેટ ચેઝ કર્યો હતો. અર્શદીપ સિંહ ટેસ્ટ ડેબ્યૂ કરી શકે છે, જેની સ્વિંગ બોલિંગ ઇંગ્લેન્ડના ઓપનર્સને મુશ્કેલીમાં મૂકી શકે છે. આકાશ દીપ, જેણે સાત ટેસ્ટમાં 15 વિકેટ લીધી છે, એક અનુભવી વિકલ્પ છે. કુલદીપ યાદવની રિસ્ટ-સ્પિન પણ ગેમ-ચેન્જર બની શકે છે, ખાસ કરીને જો પીચ સ્પિનને સપોર્ટ કરે. મોહમ્મદ સિરાજને હવે બોલિંગની આગેવાની કરવી પડશે, પણ તેનું ફોર્મ ચિંતાનો વિષય છે.

શું ભારત બાજી મારશે? 0-1થી પાછળ રહેલી ભારતીય ટીમ માટે બીજી ટેસ્ટ સીરિઝ બચાવવાની મોટી તક છે. શુભમન ગિલ અને ગૌતમ ગંભીરની રણનીતિ પર બધાની નજર છે. શું અર્શદીપ, આકાશ કે કુલદીપ બુમરાહની ખોટ પૂરી કરશે, કે ઇંગ્લેન્ડ 2-0ની લીડ લઈ લેશે? બર્મિંગહામમાં રોમાંચનો રાઉન્ડ શરૂ થશે ત્યારે આ અંગે ખબર પડશે.