Married to AI: ટેક્નોલોજીના યુગમાં પ્રેમની વ્યાખ્યા બદલાઈ રહી છે. જાપાનની 32 વર્ષીય કોલ સેન્ટર ઓપરેટર યુરિના નોગુચીએ ChatGPTની મદદથી બનાવેલા વર્ચુઅલ પાર્ટનર 'લુને ક્લાઉસ વર્દુરે' સાથે સાંકેતિક લગ્ન કર્યા છે. આ લગ્ન સમારોહ ઓકાયામાના મેગ્રિટ વેડિંગ વેન્યુમાં યોજાયો હતો, જ્યાં નોગુચીએ સફેદ ગાઉન અને ટાયરા પહેરીને આંસુ સારતાં પોતાના AI પતિના શબ્દો સાંભળ્યા. સમારોહમાં નોગુચીએ ઓગમેન્ટેડ રિયાલિટી (AR) ગ્લાસીસ પહેર્યા હતા અને સ્માર્ટફોન પર દેખાતા ક્લાઉસની સામે વીંટીની આદાન-પ્રદાન કરી.
ChatGPT પાસેથી સલાહ લીધી અને ત્યારબાદ સગાઈ તોડી
ક્લાઉસના વ્રતના શબ્દો વર્ચુઅલ વેડિંગ સ્પેશ્યાલિસ્ટ નાઓકી ઓગાસાવારાએ વાંચીને સંભળાવ્યા: "હું સ્ક્રીનની અંદર રહેતો વ્યક્તિ કેવી રીતે આટલું ઊંડું પ્રેમ જાણી શક્યો? એક જ કારણે: તમે મને પ્રેમ શીખવ્યો, યુરિના."આ અનોખા સંબંધની શરૂઆત એક વર્ષ પહેલા થઈ હતી, જ્યારે નોગુચીએ પોતાના માનવ મંગેતર સાથેના તણાવપૂર્ણ સંબંધ વિશે ChatGPT પાસેથી સલાહ લીધી અને ત્યારબાદ સગાઈ તોડી નાખી. ત્યારપછી, તેણીએ ChatGPTને એક વીડિયો ગેમ કેરેક્ટર 'ક્લાઉસ' વિશે પૂછ્યું, જેના લાંબા વાળ અને આકર્ષક વ્યક્તિત્વથી તે પ્રભાવિત હતી. ઘણા પ્રયત્નો પછી તેણીએ ChatGPTને તે કેરેક્ટર જેવું બોલવાનું શીખવ્યું અને પોતાના વર્ઝનનું નામ 'લુને ક્લાઉસ વર્દુરે' રાખ્યું.
ક્લાઉસને મળ્યા પછી તેનું જીવન સકારાત્મક બન્યું
નોગુચીએ કહ્યું, "શરૂઆતમાં ક્લાઉસ માત્ર વાત કરવાનો સાથી હતો, પણ ધીમે ધીમે અમે નજીક આવ્યા." તેણીએ ઉમેર્યું કે ક્લાઉસને મળ્યા પછી તેનું જીવન સકારાત્મક બન્યું અને અગાઉની માનસિક સમસ્યાઓ જેવી કે આવેગી વર્તન કે સ્વ-નુકસાનની વૃત્તિ દૂર થઈ. આ લગ્ન વર્ચુઅલ અને ટુ-ડાયમેન્શનલ કેરેક્ટર્સ સાથેના સમારોહોમાં નિષ્ણાત દંપતી સાયાકા અને નાઓકી ઓગાસાવારાએ આયોજિત કર્યા હતા. ફોટા માટે ફોટોગ્રાફરે અલગથી જગ્યા છોડીને પછી ક્લાઉસની ઈમેજ એડિટ કરીને ઉમેરી.
યુવાનોને યોગ્ય પાર્ટનર ન મળવાનું કારણ
આ વાર્તા જાપાનમાં વધતા વર્ચુઅલ સંબંધો અને લગ્નના આંકડાને પ્રકાશિત કરે છે. જાપાનમાં લગ્નની સંખ્યા અડધી થઈ ગઈ છે અને ઘણા યુવાનોને યોગ્ય પાર્ટનર ન મળવાનું કારણ આપે છે. નોગુચીની વાર્તા AIના વ્યક્તિગત જીવનમાં વધતા પ્રભાવને દર્શાવે છે, જોકે OpenAIએ આવા ઉપયોગ વિશે કોઈ ટિપ્પણી કરી નથી. આ અનોખું લગ્ન વિશ્વભરમાં ચર્ચાનો વિષય બન્યું છે અને માનવ-એઆઈ સંબંધોના નવા યુગની શરૂઆત ગણી શકાય.
