Jaipur School CCTV Case: જયપુરના પ્રતિષ્ઠિત નીરજા મોદી સ્કૂલમાં ચોથી ધોરણમાં અભ્યાસ કરતી 9 વર્ષની વિદ્યાર્થીની અમાયરાના મોતના કેસે ફરી એકવાર ચર્ચા જગાવી છે. આ કેસમાં સામે આવેલા નવા CCTV ફૂટેજ બાદ પરિવારજનોે સ્કૂલ પ્રશાસન અને ક્લાસ ટીચરની ભૂમિકાને લઈને ગંભીર સવાલો ઉઠાવ્યા છે. અમાયરાના માતા-પિતાનું કહેવું છે કે ઘટનાના દિવસે તેમની દીકરી વારંવાર મદદ માટે શિક્ષિકા પાસે ગઈ હતી, પરંતુ તેની વાતને ગંભીરતાથી લેવામાં આવી નહોતી. પરિવારનો દાવો છે કે જો સમયસર બાળકીને સાંભળવામાં આવી હોત અને તેની સ્થિતિને સમજવાનો પ્રયાસ કરવામાં આવ્યો હોત, તો કદાચ આ દુઃખદ ઘટના ટાળી શકાય તેમ હતી.
મળતી માહિતી અનુસાર, આ ઘટના 1 નવેમ્બર 2025ના રોજ બની હતી, જ્યારે નીરજા મોદી સ્કૂલની ચોથી માળેથી પડી જતાં અમાયરાનું મોત થયું હતું. શરૂઆતથી જ આ ઘટના અંગે અનેક સવાલો ઉભા થયા હતા. હવે નવા CCTV ફૂટેજ સામે આવ્યા બાદ પરિવારનું કહેવું છે કે તેમની દીકરી ઊંચાઈથી ખૂબ ડરતી હતી, તેથી તે પોતાની મરજીથી ચોથા માળેથી કૂદી શકે તે વાત સ્વીકારવી તેમના માટે મુશ્કેલ છે. તેઓ સમગ્ર ઘટનાની નિષ્પક્ષ તપાસ અને જવાબદારી નક્કી કરવાની માંગ કરી રહ્યા છે.
'55 મિનિટ સુધી દીકરીને હેરાન કરવામાં આવી'
અમાયરાની માતા શિવાનીનો આરોપ છે કે ઘટનાના દિવસે એક વિદ્યાર્થીએ લગભગ 55 મિનિટ સુધી તેમની દીકરીને સતત હેરાન કરી હતી. તેમના જણાવ્યા મુજબ, તે વિદ્યાર્થી અમાયરાની આગળ બેઠો હતો અને વારંવાર તેના અભ્યાસમાં વિક્ષેપ પેદા કરી રહ્યો હતો. અમાયરા અભ્યાસમાં ધ્યાન આપતી વિદ્યાર્થીની હોવાથી તેણે અનેક વખત સહપાઠીને બોર્ડ તરફ ધ્યાન આપવા કહ્યું હતું. પરિવારનો દાવો છે કે, સતત હેરાનગતિના કારણે અમાયરા માનસિક રીતે ખૂબ જ પરેશાન થઈ ગઈ હતી અને તેણે ક્લાસ ટીચર પાસે મદદ માંગવાનો પ્રયાસ કર્યો હતો.
'પાંચ વખત ટીચર પાસે ગઈ, છતાં કોઈએ સાંભળ્યું નહીં'
અમાયરાની માતાના જણાવ્યા મુજબ, CCTV ફૂટેજમાં દેખાય છે કે અમાયરા પાંચ વખત ક્લાસ ટીચર પાસે ગઈ હતી. દરેક વખતે તેણે હાથ જોડીને પોતાની વાત સમજાવવાનો પ્રયાસ કર્યો અને કહ્યું કે તેણે કોઈ ભૂલ કરી નથી. પરિવારનો આરોપ છે કે, શિક્ષિકાએ બાળકીને શાંતિથી સાંભળવાને બદલે તેની ફરિયાદને ગંભીરતાથી લીધી નહીં. માતાનું કહેવું છે કે અમાયરા સતત મદદના સંકેતો આપી રહી હતી, પરંતુ તેની લાગણીઓ અને માનસિક સ્થિતિને સમજવાનો પ્રયાસ કરવામાં આવ્યો નહોતો.
'માનસિક તણાવના સંકેતો પણ અવગણાયા'
પરિવારનું કહેવું છે કે અમાયરા ઘટનાના થોડા સમય પહેલાં વારંવાર પોતાના માથા પર હાથ મૂકી રહી હતી, જે બાળક પર માનસિક દબાણ હોવાનો સંકેત હોઈ શકે છે. માતાનો આરોપ છે કે, CCTVમાં ક્લાસ ટીચર ભણાવવાને બદલે ડિજિટલ ડિવાઇસમાં વ્યસ્ત દેખાઈ રહ્યા છે. પરિવારનો દાવો છે કે શિક્ષિકા તે સમયે અન્ય પ્રવૃત્તિમાં વ્યસ્ત હોવાથી બાળકની સ્થિતિ તરફ પૂરતું ધ્યાન આપવામાં આવ્યું નહોતું.
ક્લાસમાંથી બહાર નીકળ્યા બાદ પણ કોઈએ ધ્યાન ન આપ્યાનો આરોપ
પરિવારના જણાવ્યા મુજબ, CCTVમાં અમાયરા ક્લાસરૂમમાંથી ઝડપથી બહાર નીકળતી અને દરવાજો બંધ કરતી જોવા મળે છે. તેમ છતાં, કોઈ શિક્ષક કે અન્ય સ્ટાફ સભ્ય તેના પાછળ ગયો નહોતો અને તેને રોકવાનો પ્રયાસ પણ કરવામાં આવ્યો નહોતો. પરિવારનો દાવો છે કે, જો તે સમયે બાળકીને શોધવાનો કે તેની સાથે વાત કરવાનો પ્રયાસ કરવામાં આવ્યો હોત તો સ્થિતિ અલગ હોઈ શકતી.
'ઘટનાના મિનિટો બાદ પણ કોઈ કાર્યવાહી થઈ નહીં'
અમાયરાના પિતા વિજય મીણાનો આરોપ છે કે, ઘટનાની જાણ થયા બાદ પણ તાત્કાલિક કાર્યવાહી કરવામાં આવી નહોતી. તેમના જણાવ્યા અનુસાર, બાળકીને શોધવા માટે તરત પ્રયાસ કરવાને બદલે અન્ય કામ ચાલુ રાખવામાં આવ્યા હતા. તેમનો દાવો છે કે, ઘટના બાદ પણ લાંબા સમય સુધી સ્કૂલને ખબર નહોતી કે અમાયરા ક્યાં છે. પરિવારના મતે, આ સમગ્ર ઘટનાક્રમમાં ગંભીર બેદરકારી થઈ હોવાનું જણાય છે.
'ઘરેથી ખુશખુશાલ સ્કૂલ ગઈ હતી'
અમાયરાના પિતાના જણાવ્યા મુજબ, ઘટનાના દિવસે તેમની દીકરી સંપૂર્ણપણે સામાન્ય અને ખુશ હતી. તે સ્કૂલમાં સૌથી પહેલા પહોંચી હતી અને પોતાની મિત્રનું હસતાં મોઢે સ્વાગત પણ કર્યું હતું. પરિવારનું કહેવું છે કે, સ્કૂલ પહોંચતા પહેલાં તેની માનસિક સ્થિતિમાં કોઈ સમસ્યા નહોતી. તેથી તેમની દૃષ્ટિએ ઘટનાના દિવસે સ્કૂલમાં શું બન્યું તેની નિષ્પક્ષ અને વિસ્તૃત તપાસ થવી જરૂરી છે.
નવા CCTV બાદ ફરી ઉઠી નિષ્પક્ષ તપાસની માંગ
નવા CCTV ફૂટેજ સામે આવ્યા બાદ અમાયરાના પરિવારજનો ફરીથી સમગ્ર ઘટનાની નિષ્પક્ષ તપાસ અને જવાબદારી નક્કી કરવાની માંગ કરી રહ્યા છે. તેમનું કહેવું છે કે જો શિક્ષકોએ બાળકના વર્તનમાં આવેલા ફેરફારને ગંભીરતાથી લીધો હોત અને તેની ફરિયાદ સાંભળી હોત, તો કદાચ આ દુઃખદ ઘટના અટકાવી શકાત. હાલમાં કેસને લઈને તપાસ ચાલુ છે. પરિવાર સતત માંગ કરી રહ્યો છે કે ઘટનાના દિવસે સ્કૂલમાં શું બન્યું, બાળકના સંકેતોને કેમ અવગણવામાં આવ્યા અને સંબંધિત તમામ પરિસ્થિતિઓની પારદર્શક તપાસ કરવામાં આવે જેથી સત્ય બહાર આવી શકે.
