અયોધ્યા સ્થિત શ્રી રામ જન્મભૂમિ મંદિરમાં VIP દર્શન પાસની વ્યવસ્થા ફરી એક વખત ચર્ચાનો વિષય બની છે. તાજેતરમાં મંદિર ટ્રસ્ટમાં કેટલાક પદાધિકારીઓના VIP દર્શન પાસ જારી કરવાના અધિકારોમાં ફેરફાર કરવામાં આવ્યા બાદ શ્રદ્ધાળુઓમાં અનેક પ્રશ્નો ઊભા થયા છે. ખાસ કરીને VIP પાસ કેવી રીતે મળે છે, કોણ તેની ભલામણ કરી શકે છે અને શું સામાન્ય શ્રદ્ધાળુ પૈસા ચૂકવીને VIP દર્શનનો લાભ લઈ શકે છે કે નહીં તે અંગે લોકોમાં ઉત્સુકતા જોવા મળી રહી છે.
શ્રી રામ જન્મભૂમિ તીર્થ ક્ષેત્ર ટ્રસ્ટના સંચાલન હેઠળ મંદિરમાં દર્શન માટે અલગ-અલગ વ્યવસ્થાઓ અમલમાં છે. સામાન્ય શ્રદ્ધાળુઓ માટે નિયમિત દર્શનની વ્યવસ્થા છે, જ્યારે વિશેષ મહેમાનો અને નિર્ધારિત કેટેગરીના લોકો માટે 'સુગમ દર્શન' અથવા VIP પાસની વ્યવસ્થા કરવામાં આવે છે. જોકે ટ્રસ્ટે સ્પષ્ટ કર્યું છે કે આ માટે કોઈ પ્રકારની ફી લઈને VIP પાસ આપવામાં આવતા નથી.
VIP પાસ જારી કરવાનો અધિકાર કોની પાસે?
અગાઉ ટ્રસ્ટના પૂર્વ મહાસચિવ ચંપત રાય, ટ્રસ્ટી અનિલ મિશ્રા અને વિશેષ આમંત્રિત સભ્ય ગોપાલ રાવને VIP દર્શન પાસ માટે ભલામણ કરવાનો અધિકાર આપવામાં આવ્યો હતો. જોકે તાજેતરના ફેરફાર બાદ આ જવાબદારી ટ્રસ્ટના સભ્ય મહંત દિનેન્દ્ર દાસને સોંપવામાં આવી હોવાનું જાણવા મળ્યું છે. આ ફેરફાર બાદ પણ સુગમ દર્શન પાસની વ્યવસ્થા યથાવત રહેશે, પરંતુ પાસ મંજૂર કરનાર અધિકૃત સભ્યમાં ફેરફાર થયો છે. ટ્રસ્ટનું કહેવું છે કે સમગ્ર પ્રક્રિયા નિયત નિયમો અને આંતરિક માર્ગદર્શિકા મુજબ જ કરવામાં આવે છે.
શું રૂપિયા આપીને VIP પાસ મેળવી શકાય?
રામ મંદિર ટ્રસ્ટના નિયમો મુજબ VIP દર્શન પાસ ખરીદી શકાતો નથી. કોઈપણ વ્યક્તિ માત્ર રૂપિયા ચૂકવીને VIP પાસ મેળવી શકતી નથી. પાસ માત્ર અધિકૃત વ્યક્તિઓની ભલામણ અને નિર્ધારિત પ્રક્રિયા બાદ જ આપવામાં આવે છે. ટ્રસ્ટ ઉપરાંત અયોધ્યાના જિલ્લા કલેક્ટર (DM), વરિષ્ઠ પોલીસ અધિક્ષક (SSP), ડીઆઈજી અને કમિશનર જેવા વહીવટી અધિકારીઓને પણ નિશ્ચિત સંખ્યામાં સુગમ દર્શન પાસ માટે ભલામણ કરવાનો અધિકાર આપવામાં આવ્યો છે. મળતી માહિતી મુજબ આ અધિકારીઓ દરરોજ મર્યાદિત સંખ્યામાં શ્રદ્ધાળુઓ માટે પાસ મંજૂર કરાવી શકે છે.
એક ફોર્મમાં કેટલા લોકોનો પાસ બને?
સુગમ અથવા વિશિષ્ટ દર્શન માટે નિર્ધારિત અરજી ફોર્મ ભરવું ફરજિયાત હોય છે. તેમાં દર્શનાર્થીનું નામ, ઉંમર, લિંગ અને માન્ય ઓળખપત્રની વિગતો આપવાની રહે છે. એક જ ફોર્મ દ્વારા વધુમાં વધુ આઠ વ્યક્તિઓ માટે પાસ જારી થઈ શકે છે. પાસ માટે ભલામણ કરનાર અધિકારી અથવા ટ્રસ્ટ સભ્યનું નામ પણ રેકોર્ડમાં નોંધવામાં આવે છે. આથી સમગ્ર પ્રક્રિયામાં પારદર્શિતા જળવાઈ રહે તેવો પ્રયાસ કરવામાં આવે છે.
રામ મંદિરમાં પ્રવેશ માટે અલગ-અલગ માર્ગ
રામ મંદિર પરિસરમાં પ્રવેશ માટે અલગ પ્રકારની વ્યવસ્થા કરવામાં આવી છે. સામાન્ય શ્રદ્ધાળુઓ મુખ્ય પ્રવેશદ્વારથી કતારમાં ઉભા રહી ભગવાન રામલલાના દર્શન કરે છે. VIP અથવા સુગમ દર્શન માટે અલગ પ્રવેશ માર્ગ નક્કી કરવામાં આવ્યો છે, જ્યાંથી શ્રદ્ધાળુઓને પ્રમાણમાં ઓછા સમયમાં દર્શનની સુવિધા મળે છે. આ વ્યવસ્થા ખાસ કરીને અધિકૃત પાસ ધરાવતા લોકો માટે હોય છે. તે ઉપરાંત દેશના રાષ્ટ્રપતિ, વડાપ્રધાન, રાજ્યના મુખ્યમંત્રી તેમજ અન્ય ઉચ્ચ હોદ્દેદારો માટે વિશેષ VVIP પ્રવેશદ્વારની વ્યવસ્થા પણ છે. આવા મહાનુભાવો માટે સુરક્ષા અને પ્રોટોકોલને ધ્યાનમાં રાખીને અલગ વ્યવસ્થા અમલમાં મુકવામાં આવે છે. જોકે તમામ પ્રવેશદ્વારો પર સુરક્ષા તપાસ ફરજિયાત કરવામાં આવે છે.
આ પણ વાંચો: શું માત્ર સંપત્તિ જ હતું કારણ? : માતા અને પિતાની હત્યારી આયુષી કેસમાં સામે આવ્યા નવા દાવા
ટ્રસ્ટે શું સ્પષ્ટતા કરી?
ટ્રસ્ટના સૂત્રો અનુસાર, VIP દર્શન પાસની વ્યવસ્થા માત્ર ભીડનું સંચાલન, સુરક્ષા અને વિશેષ આમંત્રિત મહેમાનોની સુવિધા માટે છે. તેનો કોઈ વ્યાપારી હેતુ નથી. તાજેતરના વહીવટી ફેરફારોને પણ ટ્રસ્ટની આંતરિક પ્રક્રિયાનો ભાગ માનવામાં આવી રહ્યા છે. આ દરમિયાન ટ્રસ્ટે શ્રદ્ધાળુઓને અપીલ કરી છે કે VIP પાસના નામે કોઈ વ્યક્તિ અથવા એજન્ટ દ્વારા પૈસાની માંગ કરવામાં આવે તો તેની ફરિયાદ સંબંધિત અધિકારીઓને કરવી જોઈએ. સત્તાવાર પ્રક્રિયા સિવાય કોઈપણ પ્રકારની ઓફર પર વિશ્વાસ ન કરવાની પણ સલાહ આપવામાં આવી છે.
રામ મંદિર દેશના સૌથી મહત્વપૂર્ણ ધાર્મિક સ્થળોમાંનું એક હોવાથી દરરોજ હજારો શ્રદ્ધાળુઓ દર્શન માટે પહોંચે છે. આવી સ્થિતિમાં દર્શન વ્યવસ્થા સરળ, સુરક્ષિત અને પારદર્શક રહે તે માટે ટ્રસ્ટ સમયાંતરે જરૂરી વહીવટી ફેરફારો કરતું રહે છે.
