જયપુર હત્યા કેસમાં એક નવો જ ખુલાસો : પૈસા માટે માતાની હત્યા કરનાર આયુષીએ પિતાનો પણ લીધો હતો જીવ! મામાનો સનસનાટીપૂર્ણ આરોપ

Jaipur Neeraj Sharma Case: જયપુરમાં માતા નીરજ શર્માની હત્યાના મામલામાં એક નવો વળાંક આવ્યો છે. આયુષીના મામા રાકેશ શર્માએ આરોપ લગાવ્યો છે કે એપ્રિલ 2025માં આયુષીએ પોતાના પિતરાઈ ભાઈ બલરામ સાથે મળીને બીમાર પિતા વિજય શર્માની પણ હત્યા કરી હતી. પોલીસનું કહેવું છે કે પરિવારજનોની ફરિયાદના આધારે આ આરોપોની તપાસ કરવામાં આવશે.

નીરજ શર્માની હત્યાના કેસમાં નવો વળાંક

જયપુરમાં માતા નીરજ શર્માની હત્યાના કેસમાં નવો વળાંક સામે આવ્યો છે. આ મામલામાં ધરપકડ કરાયેલી એલએલબી (LLB) અંતિમ વર્ષની વિદ્યાર્થીની આયુષી સામે હવે તેના મામા રાકેશ શર્માએ ગંભીર આરોપો લગાવ્યા છે. રાકેશ શર્માનો દાવો છે કે એપ્રિલ 2025માં આયુષીએ પિતરાઈ ભાઈ બલરામ સાથે મળીને તેના પિતા વિજય શર્માની પણ હત્યા કરી હતી. પોલીસનું કહેવું છે કે પરિવાર તરફથી આપવામાં આવેલી ફરિયાદના આધારે આ આરોપોની તપાસ કરવામાં આવશે.

સારવાર બાદ વિજય શર્માની તબિયતમાં સુધારો

રાકેશ શર્માએ જણાવ્યું કે વિજય શર્મા લાંબા સમયથી બીમાર હતા. તેમનો આરોપ છે કે આયુષી તેમની યોગ્ય રીતે સારવાર થવા દેતી ન હતી. તે દરમિયાન પિતરાઈ ભાઈ બલરામ પણ વિજય શર્માના ઘરે જ રહેતો હતો. પરિવારના જણાવ્યા અનુસાર, સારવાર બાદ વિજય શર્માની તબિયતમાં સુધારો થયો હતો અને તેઓ ઘરે પરત ફર્યા હતા. મામાનો આરોપ છે કે આ પછી આયુષીએ પરિવારને કહ્યું કે તે એક ડૉક્ટર સાથે વાત કરીને આવી છે અને પિતાને સંપૂર્ણ સ્વસ્થ કરવા માટે તેમને બીજી હોસ્પિટલમાં લઈ જવા જરૂરી છે. આ પછી આયુષી અને બલરામ વિજય શર્માને પોતાની સાથે લઈ ગયા. રાકેશ શર્માનો આરોપ છે કે આશરે ત્રણ મહિના સુધી પરિવારને એ ન જણાવવામાં આવ્યું કે વિજય શર્મા ક્યાં છે. જ્યારે નીરજ શર્મા સતત પૂછતા રહ્યા, ત્યારે તેમને જણાવવામાં આવ્યું કે વિજય શર્મા દિલ્હી રોડ પર આવેલી નિમ્સ (NIMS) હોસ્પિટલમાં દાખલ છે.

માતાની હત્યાના કેસમાં આવ્યો નવો વળાંક

રાકેશ શર્માએ એવું પણ કહ્યું કે નીરજ શર્મા પોતાના બીમાર પતિને જોવા જઈ શક્યા ન હતા. બાદમાં એક દિવસ આયુષીનો મેસેજ આવ્યો કે વિજય શર્મા નિવિક હોસ્પિટલના આઈસીયુ (ICU)માં દાખલ છે. જ્યારે પરિવાર હોસ્પિટલ પહોંચ્યો તો ડૉક્ટરોએ જણાવ્યું કે વિજય શર્માના શરીરના લગભગ 90 ટકા અંગો પ્રભાવિત (ફેલ) થઈ ચૂક્યા છે. આ પછી આયુષી તેમને ઘરે લઈ આવી, જ્યાં તેમનું અવસાન થયું. પરિવારનો આરોપ છે કે વિજય શર્માના મૃત્યુ પછી આયુષી અને બલરામ તેમના મૃતદેહને ગામ લઈ ગયા અને અંતિમ સંસ્કાર કરી દીધા. મામાનું કહેવું છે કે પિતાના મૃત્યુના તરત જ બાદ આયુષીએ તેમની જગ્યાએ અનુકંપાના આધારે નોકરી (રહેમરાહે નોકરી) મેળવવા માટે અરજી કરવાની વાત કહી હતી. આ સિવાય તેણે પરિવારની મિલકત પોતાના નામે કરવાની પણ વાત કરી હતી. રાકેશ શર્માનો આરોપ છે કે આ તમામ બાબતોમાં બલરામ તેને સલાહ આપતો હતો.

રાકેશ શર્માએ જણાવ્યું કે વિજય શર્મા રાજસ્થાન હાઈકોર્ટમાં કોર્ટ માસ્ટર હતા. તેમણે આયુષી અને બલરામ બંનેને એલએલબીનો અભ્યાસ કરાવ્યો હતો જેથી બંને વકીલ બની શકે. રાકેશ શર્મા પોતે પણ રાજસ્થાન હાઈકોર્ટમાં એલડીસી (LDC) ના પદ પર કાર્યરત રહી ચૂક્યા છે. પોલીસ પૂછપરછમાં આયુષીએ જણાવ્યું કે તેની માતાનું પૂરું ધ્યાન તેના સ્પેશિયલ ચાઇલ્ડ (દિવ્યાંગ) ભાઈ પર જ રહેતું હતું. તે પોતે પરિવારમાં એકલતા અનુભવતી હતી. સાથે જ તેણે જણાવ્યું કે તેની દાદી, મોટા પપ્પા અને પિતરાઈ ભાઈ બલરામ તેની વધુ નજીક હતા. તેણે એવું પણ કહ્યું કે માતા સાથે અવારનવાર વિવાદ થતો હતો અને બાદમાં તે બલરામના કહેવા પર પિતાના બીજા ઘરે રહેવા ચાલી ગઈ હતી.

પૂછપરછ દરમિયાન આયુષીએ કથિત રીતે એવું પણ કહ્યું કે તેને માતાને જોઈને ગુસ્સો આવતો હતો કારણ કે માતા ભાઈને વધુ પ્રેમ કરતી હતી. તેણે આરોપ લગાવ્યો કે ઘરની બાબતોમાં મામા અને નાનાની દખલગીરી વધારે રહેતી હતી. જોકે તેણે એમ પણ કહ્યું કે તે તેના નાના ભાઈને ખૂબ પ્રેમ કરે છે. પોલીસના જણાવ્યા અનુસાર, પૂછપરછમાં આયુષીએ જણાવ્યું કે તેની અને બલરામ વચ્ચે માતાની હત્યાના પ્લાનિંગને લઈને વાતચીત થતી હતી.

આ કેસમાં ધરપકડ કરાયેલા હેમંત શર્માએ પોલીસને જણાવ્યું કે તે નીરજ શર્માની હત્યા કરવા નહોતો માંગતો. તેનો દાવો છે કે ઘટનાના બે દિવસ પહેલા આયુષી અને બલરામે તેના પર સતત દબાણ કર્યું હતું અને કહ્યું હતું કે સાત લાખ રૂપિયા આપવામાં આવી ચૂક્યા છે અને તમામ તૈયારીઓ પૂરી થઈ ગઈ છે. રાકેશ શર્માએ એવો પણ આરોપ લગાવ્યો કે માતા સાથેના વિવાદ દરમિયાન આયુષીએ એકવાર નીરજ શર્માને કહ્યું હતું કે, "જ્યારે પિતાની ખાવાની પાઇપ નિકાળીને તેમને મારી નાખ્યા તો તું શું છે, તને પણ બે દિવસમાં પૂરી કરી દઈશ." મામાનો દાવો છે કે આ કથિત ધમકી બાદ નીરજ શર્માએ પોતાના વોટ્સએપ સ્ટેટસ પર લખ્યું હતું કે તેમની જિંદગી માત્ર બે દિવસની જ બચી છે.

મનોવૈજ્ઞાનિકોની મદદથી પૂછપરછ કરવામાં આવશે

ડીસીપી (DCP) રંજીતા શર્માએ જણાવ્યું કે ફરાર બલરામની શોધખોળ કરવામાં આવી રહી છે. તેમણે કહ્યું કે નીરજ શર્માના પરિવારજનોએ જે ફરિયાદ આપી છે તેની તપાસ કરવામાં આવશે. અત્યાર સુધીની તપાસમાં માતાની હત્યા પાછળ મિલકત અને માતા પ્રત્યેની નફરતની વાત સામે આવી છે. પોલીસનું કહેવું છે કે એલએલબી અંતિમ વર્ષની વિદ્યાર્થીની આયુષી માનસિક રીતે ખૂબ મજબૂત સ્થિતિવાળી અને કાનૂની જાણકારી ધરાવતી યુવતી છે. તેની મનોવૈજ્ઞાનિકોની મદદથી પૂછપરછ કરવામાં આવશે. પોલીસના જણાવ્યા અનુસાર આયુષી પોતાના બાળપણને ખરાબ ગણાવે છે, પરંતુ જ્યારે તેને વિગતવાર પૂછવામાં આવે છે કે આવું કેમ હતું, તો તે આ બાબતે મૌન થઈ જાય છે.