Kumar Sanu's son tests positive for COVID-19 : પ્રખ્યાત ગાયક કુમાર સાનુના પુત્ર, ગાયક અને 'બિગ બોસ 14'ના પૂર્વ સ્પર્ધક જાન કુમાર સાનુ કોરોના (COVID-19) સંક્રમિત થયા છે. તબિયત બગડતાં તેમને હોસ્પિટલમાં દાખલ કરવામાં આવ્યા છે. રવિવારે તેમણે પોતાના સોશિયલ મીડિયા એકાઉન્ટ પરથી હોસ્પિટલમાંથી એક વીડિયો શેર કરીને આ માહિતી આપી હતી. હાલ તેઓ ડૉક્ટરોની દેખરેખ હેઠળ સારવાર લઈ રહ્યા છે. જાન કુમાર સાનુએ પોતાની પોસ્ટમાં ગંભીર પરિસ્થિતિ વચ્ચે પણ હળવા અંદાજમાં લખ્યું, "ચીનથી આવ્યો મારો મિત્ર... કોવિડને સલામ કરો." તેમણે હોસ્પિટલમાં દાખલ થવા અંગે પણ રમૂજી ટિપ્પણી કરતાં લખ્યું કે આજે તેમણે પોતાના "ફેવરિટ ડિઝાઇનર કોકિલાબેન હોસ્પિટલ"નો ડ્રેસ પહેર્યો છે અને વુહાનથી શરૂ થયેલા કોવિડના કારણે હોસ્પિટલમાં દાખલ થવું પડ્યું છે.
સોશિયલ મીડિયા પર ચાહકોની પ્રાર્થનાઓ
જાન કુમાર સાનુની પોસ્ટ વાયરલ થતાં જ તેમના ચાહકો અને શુભેચ્છકોએ સોશિયલ મીડિયા પર ઝડપથી પ્રતિક્રિયા આપી હતી. અનેક લોકોએ તેમના જલ્દી સ્વસ્થ થવાની શુભેચ્છા પાઠવી, જ્યારે કેટલાક લોકોએ તેમની તબિયત વિશે પૂછપરછ પણ કરી. જાન કુમાર સાનુને સૌથી વધુ લોકપ્રિયતા 'બિગ બોસ 14'માં ભાગ લીધા બાદ મળી હતી. તેઓ પોતાના પિતા કુમાર સાનુની જેમ ગાયક તરીકે સંગીત જગતમાં સક્રિય છે.
આ પણ ખાસ વાંચો : સલમાન ખાને બાંદ્રાનો ફ્લેટ ₹3.50 કરોડમાં વેચ્યો : 2015 માં ખરીદેલો ફ્લેટ હવે વેચ્યો, બાંદ્રામાં ખાન પરિવારના નવા પ્રોજેક્ટની પણ ચર્ચા
દેશના કેટલાક ભાગોમાં ફરી નોંધાઈ રહ્યા છે કોરોનાના કેસ
જાન કુમાર સાનુ કોરોના સંક્રમિત થયા હોવાની માહિતી એવા સમયે સામે આવી છે જ્યારે દેશના કેટલાક રાજ્યોમાં ફરી કોરોનાના નવા કેસ નોંધાઈ રહ્યા છે. આંધ્ર પ્રદેશમાં તાજેતરમાં 8 સક્રિય કેસ નોંધાયા હોવાની માહિતી સામે આવી છે. ઉપરાંત બે દર્દીઓના મોતની પણ પુષ્ટિ કરવામાં આવી હોવાનું આરોગ્ય વિભાગે જણાવ્યું છે. જોકે હાલની સ્થિતિ અગાઉની મહામારી જેવી ગંભીર નથી, તેમ છતાં આરોગ્ય નિષ્ણાતો તાવ, ઉધરસ, ગળામાં દુખાવો અથવા શ્વાસ લેવામાં તકલીફ જેવા લક્ષણો દેખાય તો તરત જ ડૉક્ટરની સલાહ લેવા અપીલ કરી રહ્યા છે. ખાસ કરીને વૃદ્ધો, ગર્ભવતી મહિલાઓ અને ગંભીર બીમારીથી પીડિત લોકોને વધુ સાવચેતી રાખવાની સલાહ આપવામાં આવે છે.
પિતા કુમાર સાનુ સાથેના સંબંધો પણ રહ્યા છે ચર્ચામાં
જાન કુમાર સાનુ કુમાર સાનુ અને તેમની પ્રથમ પત્ની રીટા ભટ્ટાચાર્યના પુત્ર છે. તેઓ અગાઉ પોતાના પરિવારિક સંબંધોને લઈને પણ ચર્ચામાં રહ્યા હતા. 'બિગ બોસ 14' દરમિયાન તેમણે કહ્યું હતું કે તેમનો ઉછેર તેમની માતાએ એકલા હાથે કર્યો હતો અને તેમના કરિયરમાં પિતાનો ખાસ સહયોગ મળ્યો નહોતો. બીજી તરફ કુમાર સાનુએ પોતાના નિવેદનમાં જણાવ્યું હતું કે તેમણે પુત્રના કરિયરમાં મદદ કરવાનો પ્રયાસ કર્યો હતો. બંને વચ્ચેના સંબંધોને લઈને સમયાંતરે ચર્ચા થતી રહી છે, જોકે જાન કુમાર સાનુએ અનેક પ્રસંગે સ્વીકાર્યું છે કે મતભેદ હોવા છતાં કુમાર સાનુ તેમના જૈવિક પિતા છે. હાલ જાન કુમાર સાનુ હોસ્પિટલમાં સારવાર હેઠળ છે. સોશિયલ મીડિયા પર શેર કરેલા તેમના વીડિયોથી ચાહકોને તેમની તબિયત અંગે માહિતી મળી છે અને સૌ તેમના જલ્દી સ્વસ્થ થઈ ફરી સંગીતની દુનિયામાં સક્રિય બને તેવી શુભેચ્છા વ્યક્ત કરી રહ્યા છે.
