Donald Trump News: અમેરિકા અને ઈરાન વચ્ચે છેલ્લા કેટલાક સમયથી વધતા તણાવ વચ્ચે હવે વધુ એક ચોંકાવનારો દાવો સામે આવ્યો છે. અમેરિકન મીડિયા રિપોર્ટ્સ અનુસાર, ઇઝરાયલે અમેરિકાને એવી ગુપ્તચર માહિતી આપી છે જેમાં દાવો કરવામાં આવ્યો છે કે ઈરાન અમેરિકાના રાષ્ટ્રપતિ ડોનાલ્ડ ટ્રમ્પને નિશાન બનાવવાની નવી યોજના પર કામ કરી રહ્યું છે. આ માહિતી સામે આવ્યા બાદ આંતરરાષ્ટ્રીય સ્તરે સુરક્ષા અને રાજકીય વર્તુળોમાં ચર્ચા તેજ બની છે. જોકે, મહત્વની વાત એ છે કે, અમેરિકાની ગુપ્તચર એજન્સીઓએ હજુ સુધી આ માહિતીની સ્વતંત્ર રીતે પુષ્ટિ કરી નથી. કેટલાક અધિકારીઓનું કહેવું છે કે, ઇઝરાયલ તરફથી મળેલા ઇનપુટની તપાસ ચાલી રહી છે અને હાલ કોઈ અંતિમ નિષ્કર્ષ પર પહોંચવામાં આવ્યો નથી.
ઇઝરાયલનો દાવો શું છે?
અમેરિકન અખબાર ધ વોલ સ્ટ્રીટ જર્નલ અને CNNના અહેવાલો અનુસાર, ઇઝરાયલની ગુપ્તચર એજન્સીઓએ અમેરિકન અધિકારીઓને ચેતવણી આપી છે કે, ઈરાન ટ્રમ્પને નિશાન બનાવવા માટે ખાસ યોજના ઘડી રહ્યું હોઈ શકે છે. આ રિપોર્ટ્સમાં એવો દાવો કરવામાં આવ્યો છે કે, તાજેતરમાં બંને દેશો વચ્ચે વધેલા સૈન્ય તણાવને જોતા આ પ્રકારની સંભાવનાઓને ગંભીરતાથી લેવામાં આવી રહી છે. જોકે, અમેરિકન સુરક્ષા એજન્સીઓએ આ માહિતી અંગે હજુ સુધી કોઈ સત્તાવાર પુષ્ટિ જાહેર કરી નથી.
સુલેમાનીના મોત બાદ વધ્યો હતો તણાવ
આ સમગ્ર મામલાને 2020ની ઘટનાથી જોડવામાં આવી રહ્યો છે. તે સમયે અમેરિકાના ડ્રોન હુમલામાં ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)ની કુદ્સ ફોર્સના કમાન્ડર જનરલ કાસિમ સુલેમાની માર્યા ગયા હતા. તે સમયથી ઈરાનના અનેક નેતાઓ અને અધિકારીઓ જાહેરમાં સુલેમાનીના મોતનો બદલો લેવાની વાત કરતા રહ્યા છે. મીડિયા રિપોર્ટ્સમાં એવો પણ ઉલ્લેખ કરવામાં આવ્યો છે કે, તાજેતરમાં યોજાયેલા કેટલાક જાહેર કાર્યક્રમોમાં પણ ટ્રમ્પ વિરુદ્ધ સૂત્રોચ્ચાર કરવામાં આવ્યા હતા.
આ પણ વાંચો: ઈરાનમાં ફરી ભડક્યુ યુદ્ધ : અમેરિકા-ઈઝરાયલના હુમલાના દાવા વચ્ચે ટ્રમ્પે નેતન્યાહૂને કર્યો ફોન
ટ્રમ્પે પણ કર્યો દાવો
ડોનાલ્ડ ટ્રમ્પે પણ મીડિયા સાથેની વાતચીત દરમિયાન દાવો કર્યો હતો કે, તેમનું નામ ઈરાનની કથિત "હિટ લિસ્ટ"માં સૌથી ઉપર છે. ટ્રમ્પે કહ્યું કે, તેઓને નિશાન બનાવવાનો પ્રયાસ થઈ શકે છે અને અત્યાર સુધી તેઓ બચ્યા છે, પરંતુ ભવિષ્ય અંગે કંઈ કહી શકાય નહીં. જોકે, ટ્રમ્પના આ નિવેદનની પણ કોઈ સ્વતંત્ર સત્તાવાર પુષ્ટિ ઉપલબ્ધ નથી.
અમેરિકન અધિકારીઓમાં મતભેદ
કેટલાક અમેરિકન અધિકારીઓનું માનવું છે કે, ઇઝરાયલ તરફથી આપવામાં આવેલી માહિતીનો હેતુ અમેરિકા પર ઈરાન વિરુદ્ધ વધુ કડક વલણ અપનાવવા માટે દબાણ વધારવાનો પણ હોઈ શકે છે. અધિકારીઓના જણાવ્યા અનુસાર, ઇઝરાયલ દ્વારા આપવામાં આવેલા ઇનપુટનું વિશ્લેષણ કરવામાં આવી રહ્યું છે અને હાલ સુધી તેની સંપૂર્ણ ચકાસણી થઈ નથી.
અમેરિકા-ઈરાન સંબંધોમાં ફરી તણાવ
તાજેતરના અઠવાડિયાઓમાં અમેરિકા અને ઈરાન વચ્ચે તણાવ ફરી વધ્યો છે. બંને દેશો વચ્ચે હુમલા અને જવાબી કાર્યવાહી બાદ પરિસ્થિતિ વધુ સંવેદનશીલ બની છે. ડોનાલ્ડ ટ્રમ્પ અગાઉ જાહેર કરી ચૂક્યા છે કે, ઈરાન સાથેની સીધી વાતચીત હવે સમાપ્ત થઈ ગઈ છે અને તેઓ આગળ કોઈ ચર્ચા કરવા ઇચ્છતા નથી. જોકે, કેટલાક અમેરિકન અધિકારીઓનો દાવો છે કે પરમાણુ કરારને લઈને પડદા પાછળ હજુ પણ રાજદ્વારી સ્તરે સંપર્ક ચાલુ છે અને આગામી સમયમાં કોઈ સમજૂતીની શક્યતાઓ પર કામ થઈ રહ્યું છે.
હજુ સુધી સત્તાવાર પુષ્ટિ નથી
ઈરાન દ્વારા ટ્રમ્પ વિરુદ્ધ કોઈ નવી હત્યાની યોજના તૈયાર કરવામાં આવી હોવાના દાવાઓ હાલમાં અમેરિકન અને ઇઝરાયલી મીડિયા રિપોર્ટ્સ પર આધારિત છે. અમેરિકાની ગુપ્તચર એજન્સીઓએ હજુ સુધી આ માહિતીની સ્વતંત્ર પુષ્ટિ કરી નથી અને કોઈ સત્તાવાર નિવેદન પણ જાહેર કરવામાં આવ્યું નથી. આથી સમગ્ર મામલે આગામી દિવસોમાં અમેરિકા, ઈરાન અને ઇઝરાયલ તરફથી આવનારી સત્તાવાર માહિતી પર સૌની નજર રહેશે.
