દુનિયાના અંતને લઈને ઈતિહાસમાં અનેકવાર ભવિષ્યવાણીઓ થતી રહી છે, જેમાંથી મોટાભાગની પાયાવિહોણી સાબિત થઈ છે. વર્ષ 2012માં માયા કેલેન્ડરના આધારે કરવામાં આવેલો વિશ્વના અંતનો દાવો પણ ખોટો પડ્યો હતો. જોકે, હાલમાં ઈઝરાયેલમાં એક અનોખી ઘટનાએ ફરી એકવાર વૈશ્વિક ચર્ચા અને આશંકાઓને જન્મ આપ્યો છે. ઈઝરાયેલમાં જન્મેલી એક રહસ્યમય લાલ વાછરડીને લઈને લોકોમાં ભય અને કુતૂહલ જોવા મળી રહ્યું છે, જેને કેટલાક ધાર્મિક જૂથો વિનાશના પ્રારંભિક સંકેત તરીકે જોઈ રહ્યા છે.
2000 વર્ષ પછી લાલ વાછરડીનો જન્મ
અહેવાલો અનુસાર, ઈઝરાયેલમાં લગભગ 2000 વર્ષોના લાંબા અંતરાલ બાદ પ્રથમ વખત સંપૂર્ણપણે લાલ રંગની વાછરડીનો જન્મ થયો છે. સોશિયલ મીડિયા પર આ સમાચાર વાયુવેગે ફેલાઈ રહ્યા છે. યરૂશલેમ સ્થિત 'Temple Institute' દ્વારા આ અંગેની સત્તાવાર જાણકારી આપવામાં આવી છે. સંસ્થાના જણાવ્યા મુજબ, આ નવજાત વાછરડીનું હાલમાં ખૂબ જ ઝીણવટભર્યું નિરીક્ષણ કરવામાં આવી રહ્યું છે. નિષ્ણાતો એ તપાસી રહ્યા છે કે શું આ વાછરડીના શરીર પર લાલ સિવાય અન્ય કોઈ રંગનો એક પણ વાળ છે કે નહીં.
બાઈબલ અને યહૂદી ધર્મગ્રંથોમાં મહત્વ
ખ્રિસ્તી અને યહૂદી બંને ધર્મગ્રંથોમાં લાલ વાછરડીના જન્મનો ઉલ્લેખ ખૂબ જ ગંભીરતાથી કરવામાં આવ્યો છે. બાઈબલના જણાવ્યા અનુસાર, શુદ્ધ લાલ વાછરડીનો જન્મ એ યહૂદી મસીહાના આગમનનો પૂર્વ સંકેત હોઈ શકે છે. ધાર્મિક માન્યતાઓ મુજબ, આ ઘટના ત્રીજા પવિત્ર મંદિર (Third Temple) ના નિર્માણની પ્રક્રિયા સાથે જોડાયેલી છે. કેટલાક લોકો માને છે કે આ ઘટનાક્રમ વિશ્વમાં મોટા પરિવર્તનો અથવા મહાવિનાશ તરફ દોરી જશે, જેના કારણે લોકોમાં ફાળ પડી છે.
વૈજ્ઞાનિક તપાસ અને જનતાની ચિંતા
ટેમ્પલ ઇન્સ્ટિટ્યૂટે યૂટ્યૂબ પર આ અંગેનો વીડિયો શેર કરીને જણાવ્યું છે કે વાછરડીની તપાસ હજુ ચાલુ છે. જો તે સંપૂર્ણપણે લાલ હોવાનું પ્રમાણિત થશે, તો તે ધાર્મિક દ્રષ્ટિએ અત્યંત મહત્વપૂર્ણ માનવામાં આવશે. બીજી તરફ, મધ્ય પૂર્વના દેશો વચ્ચે ચાલી રહેલા સંઘર્ષના વાતાવરણમાં આ પ્રકારની ભવિષ્યવાણીઓએ સામાન્ય જનતામાં ચિંતા વધારી દીધી છે. ઘણા લોકો તેને આવનારા સંકટ સાથે જોડી રહ્યા છે, જ્યારે બુદ્ધિજીવીઓ તેને માત્ર એક કુદરતી ઘટના ગણાવી રહ્યા છે.
