ઈઝરાયેલ-ઈરાન યુદ્ધમાં અત્યાધુનિક હથિયારોનો ખેલ : ટોમહોક્સથી લઈને બંકર બસ્ટર સુધીની તાકાતનું પ્રદર્શન

મધ્ય પૂર્વમાં વણસેલી સ્થિતિ વચ્ચે ઈઝરાયેલ અને અમેરિકાએ ઈરાનના સૈન્ય અને પરમાણુ મથકોને નિશાન બનાવીને મોટા પાયે હુમલા તેજ કર્યા છે. ઈઝરાયેલના 'ઓપરેશન રોરિંગ લાયન' અને અમેરિકાના 'ઓપરેશન એપિક ફ્યુરી' હેઠળ તેહરાન, ઈસ્ફહાન અને શિરાજ જેવા મુખ્ય શહેરોમાં લાંબી દૂરીની મિસાઈલો અને સ્ટીલ્થ એરક્રાફ્ટ દ્વારા સચોટ પ્રહાર કરવામાં આવ્યા છે. સામા પક્ષે ઈરાને પણ આક્રમક વલણ અપનાવીને ઈઝરાયેલ અને ખાડી દેશોમાં આવેલા અમેરિકી સૈન્ય મથકો પર મિસાઈલ મારો ચલાવ્યો છે.

અમેરિકા અને ઈઝરાયેલના ઘાતક હથિયારો

ટોમહોક (Tomahawk) ક્રૂઝ મિસાઈલ

અમેરિકી નૌકાદળનું આ સૌથી ભરોસાપાત્ર હથિયાર છે. આ સબસોનિક મિસાઈલ સમુદ્રમાં રહેલા જહાજો કે સબમરીનમાંથી છોડી શકાય છે. તેની ખાસિયત એ છે કે તે રડારથી બચવા માટે જમીનથી માત્ર 30-50 મીટરની ઊંચાઈએ ઉડે છે. અંદાજે 1,600 કિગ્રા વજન ધરાવતી આ મિસાઈલ 880 કિમી પ્રતિ કલાકની ઝડપે 1,600 કિમી દૂરના લક્ષ્યને પણ ભેદી શકે છે.

સ્ટીલ્થ ફાઈટર જેટ્સ: F-35I અને F-15I

ઈઝરાયેલ પાસે દુનિયાનું સૌથી એડવાન્સ ફાઈટર જેટ F-35I 'અદીર' છે. તેમાં ખાસ ઈઝરાયેલી સોફ્ટવેર અને હાર્ડવેર ફીટ કરવામાં આવ્યા છે, જે તેને દુશ્મનના રડારમાં પકડાવા દીધા વગર સુરક્ષિત વિસ્તારોમાં ઘૂસીને હુમલો કરવાની ક્ષમતા આપે છે. આ ઉપરાંત, F-15I 'રામ' ભારે માત્રામાં બોમ્બ અને મિસાઈલ લઈને લાંબા અંતર સુધી સચોટ પ્રહાર કરવા માટે જાણીતું છે.

બંકર બસ્ટર અને સ્માર્ટ બોમ્બ

જમીનની અંદર ઊંડે સુધી છુપાયેલા કમાન્ડ સેન્ટર કે ન્યુક્લિયર પ્લાન્ટ્સને તોડવા માટે GBU-28 બંકર બસ્ટર બોમ્બનો ઉપયોગ કરવામાં આવી રહ્યો છે. આ 5,000 પાઉન્ડનો બોમ્બ મજબૂત કોંક્રિટને પણ ચીરી નાખે છે. સાથે જ SPICE અને JDAM જેવી કિટ્સ સામાન્ય બોમ્બને 'સ્માર્ટ બોમ્બ'માં ફેરવી દે છે, જે GPS જામિંગ હોય તો પણ ઈલેક્ટ્રો ઓપ્ટિકલ ગાઈડન્સની મદદથી લક્ષ્યને ચોકસાઈથી હિટ કરે છે.

ઈરાનનો વળતો પ્રહાર અને બેલેસ્ટિક મિસાઈલ પાવર

ઈરાને પોતાની મિસાઈલ શક્તિના જોરે વળતો જવાબ આપ્યો છે. તેના ભાથામાં મુખ્યત્વે ત્રણ મિસાઈલો મહત્વની છે:

• શહાબ-3: આ લિક્વિડ ફ્યુઅલ આધારિત મિસાઈલ છે જે સમગ્ર ઈઝરાયેલને પોતાની ઝપેટમાં લેવાની ક્ષમતા ધરાવે છે.

• ઈમાદ (Emad): વર્ષ 2015માં રજૂ કરાયેલી આ ઈરાનની પ્રથમ પ્રિસિઝન ગાઈડેડ મિસાઈલ છે, જે અત્યંત સચોટતાથી નિશાન સાધે છે.

• ગદર (Ghadr): આ શહાબ-3નું અપગ્રેડેડ વર્ઝન છે, જે વધુ રેન્જ અને સ્પીડ સાથે મધ્ય પૂર્વના કોઈપણ ખૂણે ત્રાટકી શકે છે.

આ સિવાય ઈઝરાયેલ એરોસ્પેસ ઈન્ડસ્ટ્રીઝ દ્વારા નિર્મિત 'હેરોન' અને 'ઈટન' જેવા ડ્રોન સતત ઈરાની સરહદો પર દેખરેખ રાખી રહ્યા છે અને જાસૂસી મિશન પાર પાડી રહ્યા છે. હાલમાં બંને પક્ષે અત્યાધુનિક ટેકનોલોજીનો ઉપયોગ થતા આ જંગ વધુ ભયાનક બની રહ્યો છે.