ભારતીય ટીમના પૂર્વ ઓલરાઉન્ડર ઇરફાન પઠાણ આજકાલ સોશિયલ મીડિયા અને ઈન્ટરવ્યુમાં પોતાની સ્પષ્ટવક્તા શૈલીને કારણે હેડલાઈન્સમાં રહેતા હોય છે. હાલમાં જ એક ઈન્ટરવ્યુ દરમિયાન તેમણે એક જૂની ઘટનાનો ખુલાસો કર્યો છે. જ્યારે તેમનો પાકિસ્તાનના પૂર્વ કપ્તાન શાહિદ આફ્રિદી સાથે ફ્લાઇટમાં ઝઘડો થયો હતો અને તેમણે આફ્રિદીને એવો જવાબ આપ્યો કે, આફ્રિદી ચૂપ થઈ ગયા.
2006 પાકિસ્તાન પ્રવાસ, ફ્લાઇટમાં અથડામણ
પઠાણે હાલમાં એક ઈન્ટરવ્યુ જણાવ્યું હતું કે, 2006માં ભારત મેચ રમવા માટે પાકિસ્તાનના પ્રવાસે ગયું હતું. બંને ટીમો માટે કરાચીથી લાહોર જવા માટે ફક્ત એક જ ફ્લાઇટનું આયોજન કરવામાં આવ્યું હતું. બધા ખેલાડીઓ સાથે મુસાફરી કરી રહ્યા હતા, ત્યારે આફ્રિદીએ ઇરફાન પર મજાક કરી અને તેના વાળ બગાડ્યા અને મજાકમાં તેને 'બાળક' કહ્યો. ઇરફાનને આ બિલકુલ ગમ્યું નહીં અને તેણે આફ્રિદીને જવાબ આપ્યો, "તમે ક્યારથી મારા પિતા બન્યા?" આ સાંભળીને આફ્રિદી ખૂબ ગુસ્સે થયો અને ઇરફાન પઠાણને અભદ્ર શબ્દો બોલવા લાગ્યો.
ઈરફાન પઠાણનો જવાબ
આ ઘટના પછી મામલો વધુ થઇ ગયો. ફ્લાઇટમાં પઠાણે મજાકમાં પાકિસ્તાનના ઓલરાઉન્ડર અબ્દુલ રઝાકને પૂછ્યું કે, પાકિસ્તાનમાં કયા પ્રકારનું માંસ મળે છે. રઝાકે પઠાણને પૂછ્યું કે તે આવું કેમ પૂછી રહ્યો છે અને પછી તેને પાકિસ્તાનમાં ઉપલબ્ધ વિવિધ પ્રકારના માંસ વિશે કહ્યું, પરંતુ પછી પઠાણે તેની બાજુમાં બેઠેલા આફ્રિદી વિશે મજાક કરી અને કહ્યું, "શું અહીં કૂતરાનું માંસ પણ મળે છે?" ઇરફાને ખુલાસો કર્યો કે રઝાક આ સાંભળીને આશ્ચર્યચકિત થઈ ગયો, જ્યારે નજીકમાં બેઠેલા આફ્રિદી પણ વિચારી રહ્યો હતો. ત્યારે, પઠાણે આફ્રિદીને કહ્યું, "આફ્રિદીએ કૂતરાનું માંસ ખાધું હશે, તેથી જ તે આટલો બધો ભસી રહ્યો છે."
આફ્રિદી ચૂપ રહ્યો
પઠાણના મતે, આ ટિપ્પણી પછી આફ્રિદી આખી મુસાફરી દરમિયાન ચૂપ રહ્યો અને ત્યારબાદ પઠાણ સાથે કંઈ બોલ્યો નહીં. ઇરફાને હસતાં હસતાં કહ્યું, "તે સમજી ગયો કે તે મને મૌખિક યુદ્ધમાં હરાવી શકશે નહીં. તે પછી તેણે ક્યારેય મને કંઈ કહ્યું નહીં."
