Thailand : ભારતીય પ્રવાસીઓ માટે વિદેશ પ્રવાસ હવે ફક્ત સપનામાં નહીં, પરંતુ હકીકતમાં પણ સરળ બની રહ્યો છે. વધતી મોંઘવારી વચ્ચે પણ IRCTC ફરી એકવાર એવું પેકેજ લઈને આવ્યું છે, જે ખાસ કરીને મધ્યમવર્ગીય પ્રવાસીઓને ધ્યાનમાં રાખીને બનાવવામાં આવ્યું છે. થાઈલેન્ડના લોકપ્રિય શહેરો - બેંગકોક અને પટાયા - હવે માત્ર 50 હજારથી પણ ઓછા ખર્ચમાં માણી શકાય છે. આ પેકેજ ફક્ત સસ્તું જ નથી, પણ તેમાં આપવામાં આવતી સુવિધાઓ અને સ્થળોની વિવિધતા તેને વધુ આકર્ષક બનાવે છે.
શું છે આ ટૂર પેકેજની ખાસિયત?
IRCTC દ્વારા રજૂ કરાયેલું ‘Treasures of Thailand’ પેકેજ 3 રાત અને 4 દિવસ માટેનું છે, જેમાં મુસાફરોને સંપૂર્ણ રીતે ગોઠવાયેલ પ્રવાસનો અનુભવ મળે છે. આ ટૂર 24 એપ્રિલ 2026 ના રોજ હૈદરાબાદથી શરૂ થશે અને કુલ 30 મુસાફરો માટે ગ્રુપ ટૂર તરીકે આયોજન કરવામાં આવ્યું છે. આ પેકેજમાં ફ્લાઈટ ટિકિટ, હોટલ સ્ટે, લોકલ ટ્રાન્સફર, ગાઇડેડ ટૂર અને ત્રણેય સમયનું ભોજન સામેલ છે, જેથી પ્રવાસીઓએ અલગથી કોઈ ખાસ આયોજન કરવાની જરૂર રહેતી નથી.
પટાયા : બીચ, શો અને કુદરતી સૌંદર્યનો સંગમ
પટાયા થાઈલેન્ડનું સૌથી લોકપ્રિય બીચ ડેસ્ટિનેશન માનવામાં આવે છે. અહીંનું મુખ્ય આકર્ષણ છે કોરલ આઈલેન્ડ, જ્યાં સફેદ રેતી અને પારદર્શક પાણી પ્રવાસીઓને એક અલગ જ અનુભવ આપે છે. અહીં તમે પેરાસેલિંગ, સ્નોર્કેલિંગ અને સ્કૂબા ડાઇવિંગ જેવી એડવેન્ચર એક્ટિવિટીઝનો આનંદ માણી શકો છો. આ સિવાય, પટાયાનો પ્રસિદ્ધ અલ્કાઝર કેબારે શો વિશ્વભરમાં જાણીતો છે. આ શોમાં લાઇટિંગ, મ્યુઝિક અને નૃત્યનો અદ્ભુત સમન્વય જોવા મળે છે, જે પ્રવાસીઓને મંત્રમુગ્ધ કરી દે છે. નોંગ નૌચ ટ્રોપિકલ ગાર્ડન પણ આ ટૂરનો મહત્વપૂર્ણ ભાગ છે. અહીં વિવિધ પ્રકારના છોડ, કલાત્મક ગાર્ડન ડિઝાઇન અને થાઈ સંસ્કૃતિના શો જોવા મળે છે. કુદરત અને સંસ્કૃતિને નજીકથી અનુભવું હોય તો આ સ્થળ ખૂબ જ ખાસ છે.
બેંગકોક : આધુનિકતા અને સંસ્કૃતિનું અનોખું મિશ્રણ
થાઈલેન્ડની રાજધાની બેંગકોક તેની આધુનિકતા અને પરંપરાગત સંસ્કૃતિ માટે જાણીતી છે. અહીં પ્રવાસીઓને ગ્રાન્ડ પેલેસ અને મંદિરોની મુલાકાત કરાવવામાં આવશે, જ્યાં થાઈલેન્ડના ઈતિહાસ અને ધર્મની ઝલક મળે છે. સફારી વર્લ્ડ અને મરીન પાર્ક પરિવાર સાથે ફરવા માટે ખૂબ જ ઉત્તમ સ્થળ છે. અહીં વિવિધ પ્રકારના જંગલી પ્રાણીઓ, ડોલ્ફિન શો અને લાઈવ એનિમલ પરફોર્મન્સ જોવા મળે છે. બાળકો માટે આ અનુભવ ખૂબ જ યાદગાર બની શકે છે. બેંગકોકના લોકલ માર્કેટ અને સ્ટ્રીટ ફૂડ પણ પ્રવાસીઓને ખાસ આકર્ષે છે. અહીં થાઈ ફૂડ સાથે શોપિંગનો પણ ભરપૂર આનંદ માણી શકાય છે.
પ્રવાસનો ખર્ચ
ખર્ચની વાત કરીએ તો, જો તમે ત્રણ વ્યક્તિ સાથે (Triple Sharing) મુસાફરી કરો છો તો વ્યક્તિ દીઠ આશરે 49,450 રૂપિયા ખર્ચ થશે. ડબલ ઓક્યુપન્સી માટે પણ આટલો જ ચાર્જ છે, જ્યારે એકલા રહેવા માટે (Single Occupancy) 57,820 રૂપિયા ચૂકવવા પડશે. બાળકો માટે તેમની ઉંમર મુજબ 42,420 થી 47,440 રૂપિયાની વચ્ચે અલગથી ચાર્જ રાખવામાં આવ્યો છે.
શું-શું મળશે પેકેજમાં?
હૈદરાબાદથી રિટર્ન ફ્લાઈટ ટિકિટ
3 રાત માટે હોટલ સ્ટે
બ્રેકફાસ્ટ, લંચ અને ડિનર
કોરલ આઈલેન્ડ ટૂર
અલ્કાઝર શો
નોંગ નૌચ ગાર્ડન મુલાકાત
બેંગકોક ટેમ્પલ ટૂર
સફારી વર્લ્ડ અને મરીન પાર્ક
ટ્રાવેલ ઇન્શ્યોરન્સ અને ગાઇડ
બુકિંગ કેવી રીતે કરવું
જો તમે આ સુંદર દેશની મુલાકાત લેવા માંગતા હોવ, તો IRCTCની સત્તાવાર વેબસાઇટ પર જઈને વધુ વિગતો મેળવી શકો છો. પ્રવાસીઓ IRCTC ટુરિઝમની લિંક પર જઈને સીધું ઓનલાઈન બુકિંગ પણ કરાવી શકે છે. ઓછા બજેટમાં વિદેશ ફરવા માંગતા લોકો માટે આ એક શ્રેષ્ઠ તક છે.
