ભારતીય રેલવેમાં ઓનલાઈન ટિકિટ બુકિંગ માટે કરોડો મુસાફરો દ્વારા ઉપયોગમાં લેવાતી IRCTCની નવી અને અપગ્રેડેડ વેબસાઇટનું લોન્ચિંગ હાલ માટે મોકૂફ રાખવામાં આવ્યું છે. અગાઉ એવી ચર્ચા હતી કે નવી વેબસાઇટ 15 જુલાઈથી સામાન્ય લોકો માટે ઉપલબ્ધ થઈ જશે, પરંતુ હવે તાજા માહિતી મુજબ મુસાફરોએ હજુ થોડો વધુ સમય રાહ જોવી પડશે. રેલવે તંત્ર હાલમાં વેબસાઇટના અંતિમ તબક્કાના મૂલ્યાંકન અને વિવિધ હિતધારકોના સૂચનો પર કામ કરી રહ્યું છે.
નવી વેબસાઇટનો મુખ્ય હેતુ ટિકિટ બુકિંગ પ્રક્રિયાને વધુ સરળ, ઝડપી અને વિશ્વસનીય બનાવવાનો છે. ખાસ કરીને તત્કાલ ટિકિટ બુકિંગ દરમિયાન સર્વર પર વધતા લોડને ધ્યાનમાં રાખીને નવી સિસ્ટમમાં મોટા ટેક્નિકલ સુધારા કરવામાં આવ્યા હોવાનું જણાવવામાં આવી રહ્યું છે.
શા માટે મોકૂફ રાખવામાં આવ્યું લોન્ચિંગ?
રેલવે સૂત્રોના જણાવ્યા અનુસાર નવી વેબસાઇટ સંપૂર્ણ રીતે તૈયાર છે. તેમ છતાં તેને તાત્કાલિક લોન્ચ કરવાને બદલે રેલવે વિભાગ વિવિધ સ્ટેકહોલ્ડર્સ, ટેક્નિકલ નિષ્ણાતો અને અન્ય સંબંધિત પક્ષો પાસેથી સૂચનો અને પ્રતિસાદ મેળવી રહ્યો છે. રેલવેનું માનવું છે કે વેબસાઇટ જાહેર કરતા પહેલાં દરેક પ્રકારની તકનિકી ખામીઓ દૂર કરી દેવી જરૂરી છે, જેથી મુસાફરોને ભવિષ્યમાં ટિકિટ બુકિંગ દરમિયાન કોઈ મુશ્કેલી ન પડે. આ કારણે લોન્ચિંગમાં થોડો વિલંબ થયો છે.
હવે ક્યારે લોન્ચ થશે નવી વેબસાઇટ?
તાજેતરની માહિતી મુજબ નવી IRCTC વેબસાઇટ આગામી ત્રણથી ચાર અઠવાડિયામાં જાહેર થઈ શકે છે. જો તમામ પ્રક્રિયા સમયસર પૂર્ણ થશે તો ઓગસ્ટના પ્રથમ અથવા બીજા સપ્તાહ દરમિયાન નવી વેબસાઇટ સામાન્ય લોકો માટે ઉપલબ્ધ કરાવવામાં આવી શકે છે. જોકે રેલવે અથવા IRCTC દ્વારા હજુ સુધી સત્તાવાર લોન્ચ તારીખ જાહેર કરવામાં આવી નથી. તેથી મુસાફરોએ સત્તાવાર જાહેરાતની રાહ જોવી પડશે.
માત્ર 6 સ્ટેપમાં બુક થઈ જશે ટિકિટ
નવી વેબસાઇટનું સૌથી મોટું આકર્ષણ ટિકિટ બુકિંગ પ્રક્રિયાને વધુ ઝડપી બનાવવાનું છે. હાલમાં ટિકિટ બુક કરતી વખતે અનેક સ્ટેપ્સમાંથી પસાર થવું પડે છે, પરંતુ નવી સિસ્ટમમાં જો મુસાફરે પોતાની પ્રોફાઇલમાં મુસાફરોની માહિતી પહેલેથી જ સેવ કરી હશે તો માત્ર 6 સ્ટેપમાં ટિકિટ બુક થઈ શકશે. જો માહિતી સેવ ન હોય તો પણ સમગ્ર પ્રક્રિયા આશરે 8 સરળ સ્ટેપમાં પૂર્ણ થઈ જશે. તેના કારણે ખાસ કરીને તત્કાલ ટિકિટ બુકિંગ દરમિયાન સમયની બચત થશે.
કેપ્ચા કોડની ઝંઝટથી મળશે રાહત
નવી વેબસાઇટમાં સૌથી વધુ ચર્ચિત ફીચર્સમાં કેપ્ચા (Captcha) દૂર કરવાની વ્યવસ્થા સામેલ છે. હાલમાં લોગિન સમયે કેપ્ચા દાખલ કરવું ફરજિયાત હોય છે, જેના કારણે ઘણા મુસાફરોને મુશ્કેલી પડતી હતી. નવી સિસ્ટમમાં સામાન્ય લોગિન દરમિયાન અદ્યતન સુરક્ષા વ્યવસ્થા લાગુ કરવામાં આવશે, જેના કારણે યુઝર આઈડી અને પાસવર્ડથી જ સરળતાથી લોગિન કરી શકાશે. જોકે સુરક્ષાના હેતુસર કેટલીક વિશેષ પરિસ્થિતિઓમાં વધારાની ચકાસણી યથાવત રહી શકે છે.
આ પણ વાંચો: ભારત-બ્રિટન FTA આજથી અમલમાં : હવે લક્ઝરી કાર, સ્કૉચ વ્હિસ્કી સહિત અનેક વસ્તુઓ થઈ શકે સસ્તી
ધીમા ઇન્ટરનેટ પર પણ કરશે ઝડપી કામ
IRCTCએ નવી વેબસાઇટનું ઈન્ટરફેસ હળવું (લાઇટવેઇટ) અને વધુ ઝડપી બનાવવાનો પ્રયાસ કર્યો છે. કંપનીનો દાવો છે કે ઓછી ઇન્ટરનેટ સ્પીડ પર પણ વેબસાઇટ સરળતાથી કાર્ય કરશે અને પેજ હેંગ થવાની અથવા લાંબા સમય સુધી લોડ થવાની સમસ્યા ઘટશે. ખાસ કરીને ગ્રામ્ય વિસ્તારો અથવા ઓછી નેટવર્ક સ્પીડ ધરાવતા વિસ્તારોના મુસાફરોને તેનો સીધો લાભ મળી શકે છે.
તત્કાલ ટિકિટ બુકિંગ થશે વધુ સરળ
દરરોજ સવારે તત્કાલ ટિકિટ શરૂ થતાં જ લાખો લોકો એકસાથે વેબસાઇટ પર લોગિન કરતા હોવાથી સર્વર પર ભારે લોડ આવે છે. પરિણામે વેબસાઇટ ધીમી પડી જાય છે અને ઘણી વખત કન્ફર્મ ટિકિટ મેળવવામાં મુશ્કેલી પડે છે. નવી વેબસાઇટમાં વધુ ક્ષમતાવાળા સર્વર અને સુધારેલી ટેક્નિકલ વ્યવસ્થા લાગુ કરવામાં આવી રહી છે. તેના કારણે તત્કાલ ટિકિટ બુકિંગ વધુ સરળ અને ઝડપી બનવાની અપેક્ષા વ્યક્ત કરવામાં આવી રહી છે.
UPI અને iPay દ્વારા ઝડપી પેમેન્ટ
ટિકિટ બુકિંગ દરમિયાન ઘણી વખત પેમેન્ટ નિષ્ફળ જવાની ફરિયાદો પણ સામે આવતી હતી. નવી વેબસાઇટમાં પેમેન્ટ ગેટવેને વધુ મજબૂત બનાવવામાં આવ્યો છે. IRCTC-iPay અને UPI જેવા વિકલ્પોને વધુ સરળ રીતે રજૂ કરવામાં આવશે જેથી મુસાફરો ઝડપથી ચુકવણી પૂર્ણ કરી શકે. પેમેન્ટ સફળ થવાનો દર પણ વધે તેવી અપેક્ષા છે.
મુસાફરો માટે કેમ મહત્વપૂર્ણ છે આ અપગ્રેડ?
IRCTCની વેબસાઇટનો દરરોજ લાખો લોકો ઉપયોગ કરે છે. ખાસ કરીને તહેવારો, વેકેશન અને તત્કાલ બુકિંગ દરમિયાન વેબસાઇટ પર ભારે ટ્રાફિક રહે છે. આવી સ્થિતિમાં નવી ટેક્નોલોજી આધારિત વેબસાઇટ મુસાફરો માટે વધુ વિશ્વસનીય સેવા પૂરી પાડી શકે છે.
જો રેલવેની યોજના મુજબ તમામ નવા ફીચર્સ સફળતાપૂર્વક અમલમાં આવશે તો ઓનલાઈન ટિકિટ બુકિંગનો અનુભવ અગાઉ કરતાં વધુ સરળ, ઝડપી અને સુવિધાજનક બની શકે છે. જોકે નવી વેબસાઇટના તમામ ફીચર્સ અને તેની અંતિમ લોન્ચ તારીખ અંગેની સત્તાવાર માહિતી IRCTC દ્વારા જાહેર થયા બાદ જ સ્પષ્ટતા થશે.
