ઈરાનનો ઈઝરાયલ પર 370 મિસાઈલોથી મોટો હુમલો : 24 લોકોના મોત, 500થી વધુ લોકો ઈજાગ્રસ્ત

મંગળવારે ઈરાને ઈઝરાયલ પર મોટો બદલો લેવાનો હુમલો કર્યો છે. ઈરાની સેનાએ ઈઝરાયલી ગુપ્તચર એજન્સી મોસાદના મુખ્યાલય સહિત અન્ય મહત્વપૂર્ણ સ્થળો પર મોટો હુમલો કર્યો. ઈરાન દ્વારા કરવામાં આવેલા આ બદલો લેવાના હુમલા દરમિયાન ઈઝરાયલ પર 370 થી વધુ મિસાઈલ અને સેંકડો ડ્રોન છોડવામાં આવ્યા હતા. ઈરાનના હુમલામાં ઈઝરાયલમાં અત્યાર સુધીમાં 24 લોકો માર્યા ગયા છે અને 500 થી વધુ ઘાયલ થયા છે. ઈઝરાયલ દ્વારા તેના સેના પ્રમુખ અલી શાદમાનીની હત્યા કર્યા બાદ ઈરાને આ કાર્યવાહી કરી છે. ઈઝરાયલ પર આ ઈરાનનો અત્યાર સુધીનો સૌથી મોટો હુમલો છે.

ઉત્તરી ઈઝરાયલમાં ઘણી જગ્યાએ હુમલા થયા
ઈઝરાયલી સેનાએ જણાવ્યું હતું કે મંગળવારે ફરીથી તેહરાને ઉત્તરી ઈઝરાયલ પર મિસાઈલોથી હુમલો કર્યો હતો જેના કારણે વિસ્ફોટના અવાજો સંભળાયા હતા. બીજી તરફ ઈરાની રાજધાનીમાં દુકાનો બંધ છે અને ગેસ માટે કતારો લાગી છે. મંગળવાર સવારથી જ તેહરાનનો મુખ્ય વિસ્તાર ખાલી થવા લાગ્યો હતો અને ઘણી દુકાનો બંધ રહી હતી. શહેરનું પ્રાચીન 'ગ્રાન્ડ બજાર' પણ બંધ રહ્યું હતું.  તેહરાનથી પશ્ચિમ તરફ જતા રસ્તાઓ પર ટ્રાફિક જામ જોવા મળ્યો હતો. ઘણા લોકો કેસ્પિયન સમુદ્ર ક્ષેત્ર તરફ જતા જોવા મળ્યા હતા.

તેહરાનમાં પેટ્રોલ પંપ પર કતારો, ડોકટરોની રજા રદ
ઇઝરાયલના બદલાને ધ્યાનમાં રાખીને તેહરાનમાં પેટ્રોલ પંપ પર પણ લાંબી કતારો જોવા મળી હતી. ચાલુ સંઘર્ષ વચ્ચે અધિકારીઓએ ડોકટરો અને નર્સોની રજા રદ કરી છે. ઈરાની સરકારી અધિકારીઓ સતત ભાર મૂકી રહ્યા છે કે બધું નિયંત્રણમાં છે અને તેમણે આ સંદર્ભમાં જનતાને કોઈ માર્ગદર્શિકા આપી નથી કે તેઓએ શું કરવું જોઈએ. ઇઝરાયલી સેનાએ તેહરાન પરના હુમલામાં ઈરાનના ટોચના જનરલ અલી શાદમાનીને માર્યા ગયાનો દાવો કર્યો છે. પરંતુ ઈરાને જનરલની હત્યા અંગે તાત્કાલિક કોઈ ટિપ્પણી કરી નથી. જનરલ શાદમાનીને તાજેતરમાં જ અર્ધલશ્કરી દળ રિવોલ્યુશનરી ગાર્ડના ભાગ ખાતમ અલ-અંબિયા સેન્ટ્રલ હેડક્વાર્ટરના વડા તરીકે નિયુક્ત કરવામાં આવ્યા હતા. આ પછી જ ઈરાને ઈઝરાયલ પર હુમલાઓ વધુ તીવ્ર બનાવ્યા.