મધ્ય પૂર્વમાં ચાલી રહેલા ભીષણ સંઘર્ષ વચ્ચે ઈરાનના સર્વોચ્ચ નેતા મોજ્તબા ખામેનેઈએ આક્રમક વલણ અપનાવતા વિશ્વભરમાં ખળભળાટ મચી ગયો છે. ઈરાને વ્યૂહાત્મક રીતે અત્યંત મહત્વપૂર્ણ ગણાતા સ્ટ્રેટ ઓફ હોર્મુઝને બ્લોક કરી દેવાની સત્તાવાર જાહેરાત કરી છે. આ નિર્ણયના પરિણામે વૈશ્વિક સ્તરે એનર્જી સપ્લાય ચેઈન ખોરવાઈ જવાની ભીતિ સેવાઈ રહી છે. ખામેનેઈએ સ્પષ્ટ શબ્દોમાં ચેતવણી આપી છે કે તે અમેરિકા દ્વારા કરવામાં આવેલા હુમલાઓમાં થયેલા પ્રત્યેક મૃત્યુનો વેર વાળશે. તેમણે વધુમાં જણાવ્યું હતું કે ઈરાન આ યુદ્ધમાં નવા મોરચા ખોલવાની ક્ષમતા ધરાવે છે જેની દુશ્મન દેશોને કલ્પના પણ નહીં હોય.
અમેરિકી સૈન્ય મથકો પર હુમલાની ધમકી
ગુરુવારે એટલે કે 12 March 2026 ના રોજ સરકારી ટેલિવિઝન પર એક સમાચાર વાચક દ્વારા સર્વોચ્ચ નેતાનો સંદેશ પ્રસિદ્ધ કરવામાં આવ્યો હતો. આ સંદેશમાં ખામેનેઈએ ખાડી દેશોમાં કાર્યરત અમેરિકી મિલિટરી બેઝને તાત્કાલિક અસરથી બંધ કરવાની માંગ કરી છે. તેમણે સંકેત આપ્યો હતો કે જો આ સૈન્ય મથકો કાર્યરત રહેશે તો તેને નિશાન બનાવવામાં આવશે. ઈરાની નેતાએ ભારપૂર્વક જણાવ્યું હતું કે યુદ્ધમાં જીવ ગુમાવનારા નાગરિકોના બદલામાં તેઓ દુશ્મન દેશો પાસેથી વળતર વસૂલશે અને જો તે ચૂકવવામાં નહીં આવે તો તેમની સંપત્તિઓ જપ્ત કરીને નાશ કરી દેવામાં આવશે.
વ્યૂહાત્મક માર્ગનો હથિયાર તરીકે ઉપયોગ
સ્ટ્રેટ ઓફ હોર્મુઝ પર ઈરાનનો પક્ષ રજૂ કરતા મોજ્તબા ખામેનેઈએ કહ્યું હતું કે યુદ્ધમાં દબાણ લાવવા માટે આ દરિયાઈ માર્ગને બંધ રાખવો અનિવાર્ય છે. તેમણે પાડોશી દેશો સાથે મૈત્રીપૂર્ણ સંબંધોની હિમાયત તો કરી પરંતુ સાથે સાથે તેમને ચેતવણી પણ આપી છે કે તેઓ પોતાના દેશમાં અમેરિકી સેનાને આશરો ન આપે. ઈરાન આ માર્ગનો ઉપયોગ એક સુરક્ષા કવચ તરીકે કરીને વૈશ્વિક દબાણ વધારવાની નીતિ પર કામ કરી રહ્યું છે.
શહીદોનું લોહી એળે નહીં જાય
દક્ષિણ ઈરાનના મીનાબ શહેરમાં થયેલા હુમલાનો ઉલ્લેખ કરતા ખામેનેઈએ ભાવુક અને આક્રોશિત નિવેદન આપ્યું હતું. ઉલ્લેખનીય છે કે યુદ્ધના પ્રારંભિક તબક્કામાં મિસાઈલ હુમલાને કારણે ત્યાંની એક કન્યા શાળા સંપૂર્ણપણે ધ્વસ્ત થઈ ગઈ હતી. આ ઘટનાને યાદ કરતા તેમણે કહ્યું હતું કે ઈરાન પોતાના નાગરિકોની હત્યાને ક્યારેય ભૂલશે નહીં અને દરેક શહીદના લોહીના ટીપાનો હિસાબ લેવામાં આવશે. ઈરાની પ્રશાસન બદલો લેવા માટે કોઈ પણ હદ સુધી જવાની તૈયારી દર્શાવી રહ્યું છે.
