અમદાવાદ: ઇન્ડિયન પ્રીમિયર લીગ (IPL) 2026ની ગઇકાલે રમાયેલી રોમાંચક ફાઇનલ મેચ બાદ ગુજરાત ટાઇટન્સ (GT)ની ટીમ માટે રવિવારની રાત અત્યંત મુશ્કેલ સાબિત થઈ છે. એક તરફ ફાઇનલમાં મળેલી હારનું દુઃખ તો બીજી તરફ સુરક્ષાની મોટી ચિંતા. ફાઇનલ બાદ સ્ટેડિયમથી હોટેલ પરત ફરી રહેલી ગુજરાત ટાઇટન્સની ટીમ બસમાં અચાનક ટેકનિકલ ખામી સર્જાતા શોર્ટ સર્કિટ થયું હતું અને જોતજોતામાં બસની અંદર ધુમાડાના ગોટા ફેલાઈ ગયા હતા. સદનસીબે, ડ્રાઇવરની સમયસૂચકતા અને સુરક્ષા સ્ટાફની ત્વરિત કાર્યવાહીને કારણે તમામ ખેલાડીઓ અને સપોર્ટ સ્ટાફને સહીસલામત બહાર કાઢી લેવામાં આવ્યા હતા. આ ઘટનામાં કોઈને પણ ઈજા પહોંચી નથી, પરંતુ ફાઈનલના પરાજય બાદ બનેલી આ આકસ્મિક દુર્ઘટનાએ ખેલાડીઓ અને ચાહકોને ચિંતામાં મૂકી દીધા હતા.
રસ્તા વચ્ચે અટવાઈ ટીમ: સુરક્ષા સ્ટાફની સતર્કતાથી ટળી મોટી દુર્ઘટના
અહેવાલો અનુસાર, રવિવારે (31મી મે) ફાઇનલ મેચ પૂરી થયા બાદ ગુજરાત ટાઇટન્સના ખેલાડીઓ અને સ્ટાફ હોટેલ જવા માટે બસમાં સવાર હતા. બસ જ્યારે રસ્તા પર આગળ વધી રહી હતી ત્યારે અચાનક વાયરિંગમાં શોર્ટ સર્કિટ થવાથી એન્જિન અને કેબિનના ભાગેથી કાળો ધુમાડો નીકળવા લાગ્યો હતો. પરિસ્થિતિની ગંભીરતા પારખીને ડ્રાઇવરે તાત્કાલિક બસને રોડની બાજુમાં ઊભી રાખી દીધી હતી. ઘટનાસ્થળે હાજર સુરક્ષાકર્મીઓએ સમય ગુમાવ્યા વગર તમામ ક્રિકેટરો અને મેડિકલ-કોચિંગ સ્ટાફને બસમાંથી બહાર ઉતારી લીધા હતા. આખી ટીમને થોડા સમય માટે રસ્તાના કિનારે જ ઊભા રહેવું પડ્યું હતું, ત્યારબાદ વૈકલ્પિક બસની વ્યવસ્થા કરીને ટીમને સુરક્ષિત રીતે હોટેલ પહોંચાડવામાં આવી હતી.
'કરેલા પર પાણી': ફાઈનલની હાર બાદ ટીમ માટે મુશ્કેલ રાત
ગુજરાત ટાઇટન્સ માટે રવિવારનો આખો દિવસ આઘાતજનક રહ્યો હતો. એક તરફ રસાકસી ભરેલી IPL 2026ની ફાઇનલ મેચમાં રોયલ ચેલેન્જર્સ બેંગ્લોર (RCB) સામે 5 વિકેટે પરાજય મળતા ટીમનું ટ્રોફી જીતવાનું સપનું રોળાયું હતું, જેના કારણે ખેલાડીઓ પહેલેથી જ માનસિક આઘાતમાં હતા. બે મહિનાની કઠિન મહેનત બાદ ફાઇનલ સુધી પહોંચેલી ટીમને મેદાન પર હારનો સામનો કરવો પડ્યો, અને ત્યારબાદ રસ્તામાં બસ દુર્ઘટના
જેવી ઘટનાએ મુશ્કેલીઓમાં વધારો કર્યો હતો. જોકે, આજના દિવસે જે સૌથી મોટી રાહતની વાત છે તે એ છે કે તમામ દેશી અને વિદેશી ખેલાડીઓ તેમજ ટીમનો સપોર્ટ સ્ટાફ સંપૂર્ણપણે સુરક્ષિત છે. ફાઇનલની હારનો આઘાત તો ટીમ માટે મોટો છે જ, પરંતુ આ આકસ્મિક ઘટનાએ સમગ્ર ક્રિકેટ જગતનું ધ્યાન પોતાની તરફ ખેંચ્યું છે.
