IND vs SA: ત્રીજી અને નિર્ણાયક વનડેમાં ભારતે દક્ષિણ આફ્રિકાને 9 વિકેટે ધૂળ ચટાડી ત્રણ મેચની શ્રેણી 2-1થી જીતી લીધી. ટોસ જીતીને પ્રથમ બોલિંગ પસંદ કરનારી ટીમ ઇન્ડિયાએ કુલદીપ યાદવ અને પ્રસિદ્ધ કૃષ્ણાની ઘાતક બોલિંગની મદદથી દક્ષિણ આફ્રિકાને 270 રનમાં ઓલઆઉટ કરી દીધું હતું. જવાબમાં યશસ્વી જયસ્વાલની અણનમ 116 રનની તોફાની સદી અને રોહિત શર્મા (75) તથા વિરાટ કોહલી (65*)ની અડધી સદીઓની મદદથી ભારતે માત્ર 39.5 ઓવરમાં જ 271 રનનો લક્ષ્યાંક હાંસલ કરી લીધો.
પ્રથમ ઇનિંગ્સ: ડી કોકની સદી વ્યર્થ, કુલદીપ-પ્રસિદ્ધનો જલવો
દક્ષિણ આફ્રિકા તરફથી ક્વિન્ટન ડી કોકે 106 રનની શાનદાર સદી ફટકારી હતી અને કેપ્ટન ટેમ્બા બાવુમા (48) સાથે બીજી વિકેટ માટે 114 રનની મહત્વની ભાગીદારી કરી હતી. જોકે બંનેના આઉટ થતાં જ ટીમ ઢેફાઈ પડી. કુલદીપ યાદવ અને પ્રસિદ્ધ કૃષ્ણાએ 4-4 વિકેટ ઝડપીને દક્ષિણ આફ્રિકાને 300થી ઘણી નીચે રોકી દીધું.
બીજી ઇનિંગ્સ: જયસ્વાલ-રોહિતની 155 રનની ઓપનિંગ ભાગીદારી
રોહિત શર્મા અને યશસ્વી જયસ્વાલે પ્રથમ વિકેટ માટે 155 રન ઉમેરીને દક્ષિણ આફ્રિકન બોલરોની બધી આશાઓ ઠગી નાખી. રોહિતે 73 બોલમાં 7 ચોગ્ગા અને 3 છગ્ગા સાથે 75 રન બનાવ્યા. તેના આઉટ થયા બાદ વિરાટ કોહલીએ જયસ્વાલ સાથે મળીને બીજી વિકેટ માટે અણનમ 116 રનની ભાગીદારી કરી અને મેચને એકતરફી બનાવી દીધી.
યશસ્વી જયસ્વાલે 116 રનની મેચવિનિંગ ઇનિંગ રમી
યશસ્વી જયસ્વાલે 121 બોલમાં 12 ચોગ્ગા અને 2 છગ્ગા સાથે અણનમ 116 રનની મેચવિનિંગ ઇનિંગ રમી, જ્યારે વિરાટ કોહલીએ માત્ર 45 બોલમાં 6 ચોગ્ગા અને 3 છગ્ગા સાથે અણનમ 65 રન ફટકાર્યા. આ જીત સાથે ભારતીમે ઘરઆંગણે દક્ષિણ આફ્રિકા સામેની વનડે શ્રેણી પોતાને નામ કરી લીધી અને ICC વનડે રેન્કિંગમાં પણ મજબૂત સ્થિતિ જાળવી રાખી.
